މާދަމާއިން ފެށިގެން، ސަރުކާރު މުވައްޒަފުންގެ މަސައްކަތުގެ ރަސްމީ ގަޑިއަކީ ހެނދުނު އަށަކުން މެންދުރު ފަހު ދޭކަށް ބަދަލުކުރަން ކެބިނެޓުން މިއަދު ނިންމައިފި އެވެ.
"ސަރުކާރުގެ ރަސްމީ މަސައްކަތު ގަޑިއަކީ، ހެނދުނު 8.00 ން މެންދުރުފަހު 2.00 އަށް ކަމަށް ހަމަޖެއްސެވުމަށް ވަޒީރުންގެ މަޖިލީހުން އެރުވި ލަފާފުޅުގެ މަތިން ރައީސުލްޖުމްހޫރިއްޔާ މި ނިންމެވީ، ސަރުކާރުގެ ވަޒީފާ އަދާކުރާ މުވައްޒަފުން، ޢާއިލާއާއެކު ހޭދަކުރަން ލިބޭ ވަގުތު އިތުރު ކުރެއްވުމަށާއި ސަރުކާރުގެ ވަޒީފާގެ އިތުރުން ޕްރައިވެޓް ސެކްޓަގައި ވަޒީފާ އަދާކުރުމަށް ފުރުޞަތު ދެއްވުމަށާއި، ދިވެހި ޒުވާނުންނަށް ކުޅިވަރު ކުޅުމާއި، ތަޢުލީމު ޙާޞިލުކުރުމާއި، ފަންނީ ރޮނގުން ކުރިއަށް ދިޔުމުގެ ފުރުޞަތު އިތުރަށް ފަހިކޮށްދެއްވުމަށްޓަކަ އެވެ،" ރައީސް އޮފީހުގެ ވެބްސައިޓްގައިވެ އެވެ.
ރައީސް އޮފީހުގެ ވެބްސައިޓްގައި ބުނެފައިވާ ގޮތުގައި ސަރުކާރުގެ ރަސްމީ ގަޑި ކުޑަކުރީ ބްރޭކްގެ ވަގުތުގެ ގޮތުގައި 30 މިނިޓު ދޭ ގޮތަށެވެ. މިހާރު ސަރުކާރު މުވައްޒަފުން މަސައްކަތް ކުރަނީ ހެނދުނު އަށަކުން މެންދުރު ފަހު ތިނަކަށެވެ. އަދި މެންދުރު 12:00 އިން 1:00 އަށް އެއް ގަޑިއިރުގެ ބްރޭކެއް ދެ އެވެ.