އައްޑޫ ސިޓީ، ހިތަދޫގައި ފާއިތުވި އަންގާރަ ދުވަހު ހިނގި ނުރައްކާތެރި އެކްސިޑެންޓްގައި ލިބުނު ޒަޚަމްތަކަށް ފަރުވާދިނުމަށް މާލެ ފޮނުވާލި މުޙައްމަދު އަފްޒަލްގެ ހާލު މިހާރު ރަނގަޅު ކަމަށް އައިޖީއެމްއެޗް އިން ބުނެފިއެވެ.
އައިޖީއެމްއެޗްގެ މީޑިޔާ އޮފިޝަލް ޒީނަތު ހަބީބް 'އައްޑޫލައިވް' އަށް މައުލޫމަތު ދެމުން ވިދާޅުވި ގޮތުގައި، އަފްޒަލްގެ ހާލު މިހާރު ރަނގަޅު ކަމަށެވެ. ޒީނަތު ވިދާޅުވި ގޮތުގައި އަފްޒަލް މިހާރު ހޮސްޕިޓަލްގެ ވޯޑަށް ބަދަލުކޮށްފައިވާ ކަމަށާއި އޭނާގެ ބޮލަށް ސީރިއަސް އަނިޔާތަކެއް ލިބިފައި ނުވާކަމަށެވެ.
އަފްޒަލް އެކްސިޑެންޓް ވެފައިވަނީ ލިންކް ރޯޑުން ރައްޓެއްސަކާއި އެއްކޮށް ސައިކަލްގައި ދުއްވާފައި ދަނިކޮށް ގޯޅިއަކުން ކުއްލިއަކަށް ނިކުތް ކާރެއް ފެނިގެން ބުރަކި ޖައްސާލުމުން ސައިކަލް ކަހާލައިގެން ގޮސް ގެންނެވެ. ކޯހެރަ ކެފޭ ކައިރިން ހިނގި މި އެކްސިޑެންޓް ހިނގި އިރު އަފްޒަލް ހުރީ ސައިކަލްގެ ފަހަތުގައެވެ.
އައްޑޫ ސިޓީގައި ނުރައްކާތެރި އެކްސިޑެންޓްތައް ކޮންމެ ދުވަހަކު ހެން ހިނގަމުން ދާއިރު، ކަމާޢި ބެހޭ ފަރާތްތަކުން އެކްސިޑެންޓްތައް ހުއްޓުވުމަށް އެކަށީގެންވާ ފިޔަވަޅުތަކެއް އަޅަމުން ނުގެންދާ ކަން ފާހަގަކޮށްލެވެއެވެ.