ސޯޝަލް މީޑިޔާގައި އެންމެ ހަރަކާތްތެރި ބަޔަކު އުޅޭ ޤައުމަކީ ރާއްޖެއެވެ. ޤައުމުގައި ސިޔާސީ ގޮތުން ހިނގާ ކޮންމެ ކަމަކާއި އެކު ސޯޝަލް މީޑިޔާގައި ބޮޑެތި 'ހަނގުރާމަތައް' ފެށިގެންދެއެވެ. އެއްބަޔަކު މަސައްކަތް ކުރަނީ އެބަޔަކު ތާޢީދުކުރާ ބަޔެއްގެ ކުށެއް ނެތް ކަން ސާބިތުކޮށްދެވޭތޯއެވެ. އަދި އަނެއް ބަޔަކު މަސައްކަތް ކުރަމުން ގެންދަނީ ވަކި ބައެއްގެ ބޮލުގައި ތުހުމަތުތަކެއް އަޅުވާލެވޭތޯއެވެ.
ރައީސް ޔާމީންގެ ލޯންޗްކޮޅުގައި އެއްޗެއް ގޮވި ހާދިސާއަށް ފަހު ސޯޝަލް މީޑިޔާ ބަދަލުވެގެން ދިޔައީ ތަހުގީގީ އިދާރާތަކުގެ މަހާސިންތާ އަކަށެވެ. ކޮންމެ މީހަކު ވެސް އެމީހަކަށް ފެންނަ ގޮތަކަށް ލޯންޗް ކޮޅުގައި އެއްޗެއް ގޮވި ހާދިސާގެ ވާހަކަ ދައްކަން ފެށިއެވެ. އެއްބަޔަކަށް އެއީ ބޮމެކެވެ. އަނެއް ބަޔަކު ބުނި ގޮތުގައި އެއީ ކުޅެލި ޑްރާމާއެކެވެ. މިހެން ގޮސް އެތައް ވާހަކައެކެވެ.
ލޯންޗްގައި އެއްޗެއް ގޮއްވާލީ، އެކަން ކުރީ އަދީބް !
ސޯޝަލް މީޑިޔާގައި ހިންގި "ތަހުގީގް" ކުރި ބައެއް ފަރާތްތަކުން ނިންމާފައިވާ ގޮތުގައި ލޯންޗްގައި އެއްޗެއް ގޮއްވާލި ހާދިސާއަކީ ނައިބު ރައީސް އަދީބް ރާވައިގެން ރައީސް ޔާމީން އަވަހާރަކޮށްލުމަށް ހިންގި ޖަރީމާއެކެވެ. އެމީހުން ވަނީ އަދީބާއި ދެކޮޅަށް ގިނަ އަދަދެއްގެ "ހެކި" ތަކެއް ވެސް ހުށަހަޅާފައެވެ. އޭގެ ތެރޭގައި ރައީސް ބަލައި ފާލަން ދޮށަށް އަދީބު ވަޑައިގެންފައި ނުވުމާއި، އެ ހާދިސާ ހިނގުމަށްފަހު ގިނަ އިރުތަކެއް ވީ އިރުވެސް އަދީބު ފިއްލަވައިގެން އުޅުއްވި ކަމަށް ވެސް އެއްބަޔަކު ބުނެފައިވެއެވެ. މިފަދަ ގޮތަކަށް ވާހަކަ ދައްކަވަމުން ގެންދަވަނިކޮށް އަދީބު ފެނިވަޑައިގަތީ ރައީސް ޔާމީނާއި އެއްކޮށް އައިޖީއެމްއެޗްގައި ހުންނަވަނިކޮށެވެ.
"އަދީބް ނޫޅުއްވާ ޓްވީޓް ކޮށްގެން މަޝްހޫރުވާކަށް. އެބޭފުޅާ ހުންނެވީ އެވަގުތު ރައީސްގެ އަރިހުގައި ހޮސްޕިޓަލުގައި . އެއީ ހަގީގީ ނައިބް ރައީސުންނަކީ. " އަދީބް އާއި ގާތް ގުޅުމެއް އޮންނަ ބޭފުޅަކު ބުންޏެވެ.
ސޯޝަލް މީޑިޔާގެ އިތުރުން ބައެއް ނޫސްތަކުން ވެސް ވަނީ އަދީބުއަށް ޝައްކު ކުރެވޭ ކަމަށް ބުނެ ވާހަކަތަކެއް ފަތުރާފައެވެ. އެހެން ނަމަވެސް މިހާތަނަށް އަދީބުގެ ފަރާތުން އަދި ސަރުކާރުގެ ފަރާތުން ވެސް އެކަމާއި ވަކި އެއްޗެއް ބުނެފައެއް ނުވެއެވެ. ނައިބު ރައީސް އަދީބަށް އެންމެ ފުރިހަމަ އަށް އިތުބާރު ކުރައްވާ ކަމަށް ރައީސް ޔާމީން މީގެ ކުރިން ވިދާޅުވެފައިވާއިރު، އެ އިތުބާރު ނެތްކަމަށް ބުނެ ބައެއް ފަރާތްތަކުން ގެންދަނީ ވާހަކަ ދައްކަމުންނެވެ.
ރައީސް ޔާމީންގެ ރޭވުމެއް، އެއީ ހަމްދަރުދީ ހޯދަން ކުރި ކަމެއް !
ރާއްޖޭގެ ރައްޔިތުން ސިޔާސީ ވެފައިވާ މިންވަރަށް ބަލާއިރު، ކޮންމެ މީހަކީ ވެސް އިޤްތިސާދީ މާހިރެކެވެ. ދީނީ ޢިލްމުވެރިޔެކެވެ. އަދި އިންވެސްޓިގޭޝަން އޮފިސަރެއް ވެސް މެއެވެ. ވާނީ ވެސް އެހެންތާއެވެ. ސިޔާސީ މައިދާނުގައި އެބޭފުޅުން ބަތަލުން ކަމުގައި ބަލައިގަންނަ ބޭފުޅުންގެ ހާލުވެސް ހަމަ ހުރީ އެފަދަ ގޮތަކަށް ވީމައެވެ. ރައީސްގެ ލޯންޗް ކޮޅުގައި އެއްޗެއް ގޮވުމަކީ އާދައިގެ ކަމެއް ނޫނެވެ. އެއީ ވަރަށް ސީރިއަސް މައްސަލައެކެވެ.
ސޯޝަލް މީޑިޔާގައި ހަރަކާތްތެރިވާ "އިންވެސްޓިގޭޝަން އޮފިސަރުން" ގެ ތެރެއިން އެއްބައި މީހުން "ތަހުގީގް" ކުރުމުން ހާމަވެފައިވަނީ އެއީ ރައީސް ޔާމީން އަމިއްލަ ފުޅަށް ކުރެއްވި ކަމެއްގެ ގޮތުގައެވެ. އެއީ ރައީސް ޔާމީން "ކުޅުނު ޑްރާމާއެއް" ކަމަށާއި ބޭނުމަކީ ރައްޔިތުންގެ ހަމްދަރުދީ ހޯދުން ކަމަށް އެމީހުން ބުނެއެވެ. މާގިނަ ހެކިތަކެއް ދައްކާފައި ނުވި ނަމަވެސް ސަރުކާރާއި ދެކޮޅު ފަރާތްތަކުން ވަނީ މި މީހުންގެ "ތަހުގީގް" ބަލައިގަނެފައެވެ.
އެހެން ނަމަވެސް ރައީސް ޔާމީން އަމިއްލަފުޅަށް ރޭއްވެވި ނަމަ އެމަނިކުފާނުގެ އަނބިކަނބަލުންގެ ފުރާނައަށް ގެއްލުން ވިޔަސް ވަރިހަމަ ކަމަށް ނިންމެވީ ހެއްޔެވެ ؟
ޕީޕީއެމްގެ ކައުންސިލްގައި ހިމެނިވަޑައިގަންނަވާ ބޭފުޅަކު ވިދާޅުވި ގޮތުގައި، ސަރުކާރާއި ދެކޮޅު ފަރާތްތަކުން އުޅެނީ ކޮންމެ ކަމެއް ވެސް ސިޔާސީ ކުރަން ކަމަށާއި، އެހެން ކަމުން ކޮންމެ ފަދަ ވާހަކައެއް ވެސް އެމީހުން ދައްކަވާފާނެ ކަމަށެވެ. ރައީސް ޔާމީން ޕަބްލިސިޓީ ހޯއްދަވަން އަނބިކަނބަލުންގެ ފުރާނަ އަށް ނުރައްކާވާން ދޫކޮށްލަވާ ފާނެތޯ އޭނާ ސުވާލު އުފެއްދިއެވެ.
"ރައީސް ޔާމީން އެމަނިކުފާނުގެ އަނބިކަނބަލުންގެ ފުރާނަ ދިޔައަސް ވަރިހަމަ ކަމަށް ޖާނުން ފިދާވާން އުޅުއްވީ ؟" ކައުންސިލް މެންބަރ ވިދާޅުވިއެވެ.
އެމްޑީޕީގެ ހަމަލާއެއް ! ބޭނުމަކީ ރައީސް ދުއްވާލުން
ސަރުކާރަށް ތާއީދު ކުރާ "އިންވެސްޓިގޭޝަން އޮފިސަރުން" ހިންގި އަވަސް "ތަހުގީގުން" ހާމަވި ގޮތުގައި، އެކަން ކޮށްފައިވަނީ ސީދާ އެމްޑީޕީ އަޑީގައި އޮވެގެންނެވެ. ހެއްކެއް ގޮތުގައި އެމީހުން ފާހަގަކުރާ އެއްކަމަކީ ލޯންޗްގައި އެއްޗެއް ގޮވުމުގެ ކުރިން އެމްޑީޕީގެ ޖަލްސާއެއްގައި ތަސްމީން އަލީ، "އެމްޑީޕީ މެންބަރުންނަށް ވަރަށް އަވަހަށް އުފާވެރި ޚަބަރެއް ލިބޭނެ ކަމަށް" ވިދާޅުވެފައިވާތީ އެކަމަށެވެ.
މީގެ އިތުރުން، ސޯޝަލް މީޑިޔާގައި ސަރުކާރަށް ޕްރޮމޯޓްކުރާ ޕޭޖްތަކުން ވެސް ވަނީ އެމްޑީޕީ އިން "ވޯޓަކުން ރައީސް ޔާމީން ބަލިނުކުރެވޭނެ ކަން އެނގުމުން ބޮން ގޮއްވަން ފެށީތޯ" ސުވާލު އުފައްދާފައެެވެ.
އެމްޑީޕީގެ ހަރަކާތްތަކުގައި އިސްކޮށް އުޅުއްވާ ބޭފުޅަކު ވިދާޅުވި ގޮތުގައި ތަސްމީން ވިދާޅުވި އުފާވެރި ޚަބަރަކީ، އދ ގެ ނިންމުން ކަމަށާއި، ޕްރޮޕެގަންޑާ ފަތުރަނީ ސަރުކާރުން ކަމަށެވެ.
ލޯންޗްގައި އެއްޗެއް ގޮވުމާއި އެކު އެކަމުގެ ސީރިއަސް ކަން އިހްސާސް ކުރެވިގެން، ފުލުހުންނާއި ސިފައިންނަށް ވުރެ ކުރިން ސޯޝަލް މީޑީޔާގައި ބައެއް މީހުން "ތަހުގީގް" ނިންމާލައިފިއެވެ. އެކަމުގެ ޙުކުމް ކުރިއަށް އޮތް މަދު ދުވަސްތަކުގެ ތެރޭގައި ނުއިއްވާނެ ކަމެއް ވެސް ނޭނގެއެވެ. އެއްބަޔަކަށް އެއީ "އަލިފާން ރޯނުވާ ޒާތުގެ ބޮމެކެވެ". އަނެއް ބަޔަކަށް އެއީ ލޯންޗް ތެރެއިން އަރައިގެން އައި "ސިޔާސީ ގޭސް ގަނޑެކެވެ."
މިއީ ސިޔާސީ ވެފައިވާ އަޅުގަނޑުމެންގެ ދިވެހި މުޖްތަމަޢްގެ ޙާލެވެ. ރައީސްގެ ލޯންޗް ކޮޅުގައި ވަނީ އެއްޗެއް ގޮވައިފައެވެ. އެ ގޮވި އެއްޗަކީ ލޯންޗްގެ އިންޖީނު ކަމަށް ވިޔަސް އަދި އޭސީ ކަމަށް ވިޔަސް އެއީ ސީރިއަސް މައްސަލައެކެވެ. މީހަކަށް ފެންނަ ގޮތަކަށް ވާހަކަ ދެއްކުމުގެ ބަދަލުގައި ކަމާއި ބެހޭ އިދާރާތަކުން ކުރައްވާ ތަހުގީގް ނިމެންދެން މަޑުކޮށްލެއްވުން ކީއްތޯއެވެ ؟