އައްޑޫ ސިޓީގައި ޕީޕީއެމްގެ ފަރާތުން ބާއްވަން އުޅުނު ސައިކަލް ބުރު ފަސްކޮށްފިއެވެ.
ޕީޕީއެމްގެ އޮފިޝަލަކު 'އައްޑޫލައިވް' އަށް މައުލޫމާތު ދެއްވަމުން ބުނިގޮތުގައި، މިމަހުގެ 4 ވަނަ ދުވަހު ބާއްވަން ހަމަޖެއްސި ސައިކަލް ބުރު ދެން ބާއްވާނެ ދުވަހެއް ފަހުން އިއުލާން ކުރާނެ ކަމަށެވެ. އޮފިޝަލް ބުނި ގޮތުގައި ސައިކަލް ބުރު ފަސްކޮށްފައިވަނީ ރައީސް އާއި ނައިބް ރައީސްގެ ސަލާމަތީ ސަބަބުތަކަށްޓަކައި އައްޑޫ އަށް ވަޑައިގަންނަވަން އޮތް ދަތުރު ކެންސަލް ވުމާއި ގުޅިގެން ކަމަށެވެ.
"ރައީސް އާއި ނައިބް ރައީސް ވަޑައިނުގަންނަވާތީ ލަސްކުރީ . ދެން ބާއްވާނެ ދުވަހެއް ފަހުން އަންގާނަން" އޮފިޝަލް ވިދާޅުވިއެެވެ.
ޕީޕީއެމްގެ އޮފިޝަލަކު މިހެން ބުނެފައިވި ނަމަވެސް ފޭސްބުކްގައި "ރައީސް ޔާމީން2018 – ޔަޤީން އައްޑޫ ސައިކަލް ބުރުގެ" ނަމުގައި ޕްރޮމޯޓް ކުރަމުން ގެންދާ އިވެންޓެއްގައި ބުނެފައިވަނީ މިމަހުގެ 5 ވަނަ ދުވަހު ސައިކަލް ބުރު އޮންނާނެ ކަމަށެވެ.
"އެންމެ ބިޔަ އެންމެ ބޮޑު" ސައިކަލް ބުރު ޕްރޮމޯޓްކުރުމުގެ ހަރަކާތްތައް ސޯޝަލް މީޑިޔާގައި ކުރިއަށް ގެންގޮސްފައިވާއިރު، ޕީޕީއެމް އިން ބުނެފައިވާ ގޮތުގައި އެ ސައިކަލް ބުރު ވެގެން ދާނީ ރާއްޖޭގެ ތާރީޚުގައި ބާއްވާ އެންމެ ބިޔަ އަދި ބޮޑު ސައިކަލް ބުރަށް ކަމަށެވެ.