މިނިވަން50 އާއި ގުޅިގެން ކުރިއަށް ގެންދާ "ފުނަ" ހަރަކާތުގެ އިންތިޒާމްތައް ވަރަށް ފުރިހަމަ ކަމަށް ހޯމް މިނިސްޓްރީގެ ޑެޕިއުޓީ މިނިސްޓަރު މާޒް އަހުމަދު ސަލީމް ވިދާޅުވެއްޖެއެވެ.
މިއަދު އައްޑޫ ސިޓީ ފޭދޫގައި ފެށި 'ފުނަ' ހަރަކާތްތަކާއި ބެހޭގޮތުން 'އައްޑޫލައިވް' އިން ދެންނެވި ސުވާލަކަށް ޖަވާބު ދެއްވަމުން މާޒް ސަލީމް ވިދާޅުވި ގޮތުގައި 'ފުނަ' ހަރަކާތުގައި ބައިވެރިވި ފަރާތްތަކާއި އަދި ކުޅިބަލަން އައި ފަރާތްތަކަށް ބަލާއިރު މި ހަރަކާތަށް ވަރަށް ބޮޑު ތަރުހީބެއް ލިބިގެން ގޮސްފައިވާ ކަން އެނގޭ ކަމަށެވެ.
މާޒް ސަލީމް ވިދާޅުވި ގޮތުގައި މިހާތަނަށް 'ފުނަ' ހަރަކާތް ބޭއްވި ހުރިހާ ރަށެއްގެ ތައްޔާރީތައް ފަދައިން ފޭދޫ 'ފުނަ' ހަރަކާތަށް ތައްޔާރުކޮށްފައި އޮތީ ވަރަށް ފުރިހަމަ އަށް ކަމަށާއި އަދި އިންތިޒާމްތައް ވެސް ވަރަށް ރަގަޅަށް ހަމަޖެހިފައިވާ ކަން ފާހަގަކުރެވޭ ކަމަށެވެ.
މާދަމާގެ ނިޔަލަށް ކުރިއަށްދާ 'ފުނަ' ހަރަކާތައް އައްޑޫ ސިޓީ ފޭދޫ ތައްޔާރު ކުރުމުގެ މަސައްކަތް ކޮށްފައިވަނީ ފޭދޫގެ އަމިއްލަ ޖަމިއްޔާއެއް ކަމުގައި ވާ އެފްވައިސީގެ ފަރާތުންނެވެ.