ދިވެހިރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އަށް ރައްކާތެރިކަން ދެއްވުން އެދި ޚާއްސަ ދުޢާއެއް ކުރުމަށް ރާއްޖޭގެ ހުރިހާ އިމާމުންނަށް އިސްލާމިކް މިނިސްޓްރީ އިން އަންގައިފިއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ކޮންމެ ނަމާދަކަށް ފަހު މިސްކިތްތަކުގައި ޚާއްސަ ދުޢާއެއް ކިޔުމަށް އިސްލާމިކް މިނިސްޓްރީ އިން އަންގާފައިވަނީ ސެޕްޓެމްބަރ މަހުގެ 29 ވަނަ ދުވަހުއެވެ.
ސެޕްޓެމްބަރ 29 އިން ފެށިގެން އެއް މަސް ދުވަހުގެ މުއްދަތަށް ކިޔުމަށް އަންގާފައިވާ މި ދުޢާ އައްޑޫ ސިޓީގެ އިމާމުންނާ ޙަވާލުކޮށް ނިމިފައިވަނީ ބުރާސްފަތި ދުވަހުގެ ނިޔަލަށެވެ.
'އައްޑޫލައިވް' އާއި ވާހަަކަ ދެއްކި އައްޑޫގެ އިމާމަކު ބުނިގޮތުގައި އިސްލާމިކް މިނިސްޓްރީ އިން އަންގާފައިވަނީ ކޮންމެ ނަމާދަކަށް ފަހު ދުޢާ ކިޔުމަށް ކަމަށާއި އެހެން ނަމަވެސް އެކަން އެގޮތަށް ކުރުމަކީ ބިދުޢައެއް ކަމަށް ބައެއް އިލްމުވެރިން ފަތުވާދެއްވި ކަމަށެވެ. އެހެންވެ އެކަމާ ގުޅޭގޮތުން އިސްލާމިކް މިނިސްޓްރީއަށް ފޯނުން ގުޅުމުން، މިނިސްޓްރީގެ ދީނީ ހޭލުންތެރިކަން އިތުރު ކުރުމާބެހޭ ބައިގެ އިސް ބޭފުޅަކު ވަނީ، ޤުނޫތު ނާޒިލާގެ ގޮތުގައި އެ ދުޢާ ކިޔުމަށް ހުއްދަ ދެއްވާފައެވެ.
"ޓެރަރިޒަމްގެ ޢަމަލްތަކުންނާއި މަކަރުވެރިންގެ މަކަރުތަކުންނާއި ހަސަދަވެރިންގެ ހަސަދަތަކުން އަޅަމެންގެ ވަލިއްޔުލް އަމުރާއި، ރައްޔިތުންނާއި އަޅަމެންގެ ރާއްޖެ ސަލާމަތް ކުރައްވައި ރައްކާތެރި ކުރައްވާދޭވެ!" އިސްލާމިކް މިނިސްޓްރީ އިން ރާއްޖޭގެ ހުރިހާ މިސްކިތަކަށް ފޮނުވާފައިވާ ދުޢާގައި ވެއެވެ.
ރައީސް ޔާމީން އަށް ރައްކާތެރިކަން ދެއްވުމަށް އެދި ދުޢާއެއް ކުރުމަށް އިސްލާމިކް މިނިސްޓްރީ އިން އަންގާފައިވާއިރު ސަރުކާރުގެ 'އަނިޔާވެރިކަމާއި ދެކޮޅަށް' އިދިކޮޅު ފަރާތްތަކުން އިސްލާމީ މަރުކަޒުގެ ބޭރުގައި ކޮންމެ ހުކުރު ދުވަހަކު ދުޢާ ކުރަމުން ގެންދާތީ އެކަން ހުއްޓުވުމަށް ފުލުހުން ވެސް ފޮނުވާފައިވެއެވެ.