އައްޑޫ ސިޓީގައި ރޭ އެމްޑީޕީ އިން ބޭއްވި ޖަލްސާ އާއި މިނިވަން50 ފާހަގަކުރުމަށް ބޭއްވި 'ފުނަ' ހަރަކާތް ވެގެން ދިޔައީ އެމްޑީޕީ އާއި ޕީޕީއެމް ސަޕޯޓަރުންގެ މެދުގައި އޮތް ވާދަވެރިކަން ފެނިގެންދިޔަ ކަމަކަށެވެ. އެ ހަރަކާތުގެ ތެރެއިންނެއް ނޫނެވެ. ހަރަކާތުގެ ފޮޓޯތަކާއި ޚަބަރުތައް ފެތުރުމުގައެވެ.
އެމްޑީޕީ ސަޕޯޓަރުންގެ ބަހުން ނަމަ ފޭދޫގައި ބޭއްވި ފުނަ ހަރަކާތަށް ދިޔައީ ސްކޫލް ކުދިންނާއި، ޓީޗަރުންނެވެ. އެވެސް މަޖުބޫރުކޮށްގެން ކަމަށެވެ. ޕީޕީއެމް އަށް ތާއީދު ކުރާ މީހުން ބުނާގޮތުގައި އައްޑޫ އެމްޑީޕީ ޖަލްސާއަށް ދިޔައީ މަދު ބަޔެކެވެ. "ހާހެއްހާ މީހުން ވެސް ހަމައެއް ނުވެއެވެ.
ފޭދޫގައި ބޭއްވި 'ފުނަ' ހަރަކާތް
'ފުނަ' ހަރަކާތް ރަސްމީކޮށް އިއްޔެ އައްޑޫގައި ފައްޓަވައި ދެއްވުމުގެ ރަސްމިއްޔާތުގައި ބައިވެރިވެފައިވަނީ ހޯމް މިނިސްޓްރީގެ ޑެޕިއުޓީ މިނިސްޓަރ މާޒް ސަލީމް އާއި ފޭދޫ ދާއިރާގެ މެންބަރ އިބްރާހިމް ދީދީ(އައިބީ) އެވެ.
ހަރަކާތުގައި މައިގަނޑު ގޮތެއްގައި ބައިވެރިވެފައިވަނީ، ސްކޫލްތަކުގެ ކުދިންނާއި އިސްވެރިންގެ އިތުރުން ފޭދޫގެ ރައްޔިތުންކަން ފާހަގަކޮށްލެވެއެވެ. އެހެން ނަމަވެސް އައްޑޫ ސިޓީގެ އެހެން އަވަށް ތަކުގެ ރައްޔިތުން ވެސް ކޮންމެވެސް ވަރަކަށް ބައިވެރިވެފައިވެއެވެ.
ބޮޑު ޚަރަދެއް ކޮށްގެން ހިންގި 'ފުނަ' ހަރަކާތުގެ ކުޅިވަރުތައް ބަލާލުމަށް އައްޑޫގެ އެހެން ރަށްތަކުގެ ރައްޔިތުންނަށް ނުދެވުނު ކަމުގައި ވިޔަސް ގޮނޑިތައް ފުރާލަން ބިދޭސީން ވެސް ވަނީ ގޮސްފައެވެ.
ރާއްޖޭގެ ސަޤާފީ ކުޅިވަރުތައް ބަލާލުމަށް ބިދޭސީން ވެސް ހުރި ޝައުޤުވެރިކަމެއްގެ ބޮޑުކަމުން ދިޔައީ ކަމަށް ވެދާނެއެވެ. އެހެން ނަމަވެސް ބިދޭސީންގެ ފޮޓޯތައް ނަގަން ފެށުމުން ބައެއް މީހުން އެކަމަށް ހުރަސް އެޅުމަކީ ހިތާމަ ކުރަން ޖެހޭ ކަމެކެވެ.
ހިތަދޫގައި ބޭއްވި އެމްޑީޕީ ޖަލްސާ
ގިނަ ދުވަސްތަކަކަށް ފަހު އައްޑޫ ސިޓީގައި އެމްޑީޕީގެ ޖަލްސާއެއް ބާއްވާން ހަމަޖެއްސީ މިދިޔަ މަހުގެ 25 ވަނަ ދުވަހުއެވެ. "ޓިކެޓް ނުލިބުން" ފަދަ އުޒުރުތަކާއި އެކު ޖަލްސާ ފަސްކުރެވިގެން ދިޔުމާއި އެކު އެމްޑީޕީ އަށް ގިނަ ބައެއްގެ ފާޑުކިޔުންތައް އަމާޒުވެގެން ދިޔައެވެ. އެހެން ކަމުން ރޭގެ ޖަލްސާއަށް އެމްޑީޕީގެ ގިނަ މެންބަރުން ދިޔައީ އައްޑޫގައި އެމްޑީޕީ ފޮހެވިގެން ދިޔަ ކަމަށް ބައެއް ފަރާތްތަކުން ދައްކާ ވާހަކަތަކަށް ރައްދު ދިނުމަށެވެ.
އައްޑޫގައި މީގެ ކުރިން އެމްޑީޕީގެ ފަރާތުން ބޭއްވި ޖަލްސާތަކެކޭ އެއްފަދައިން ރޭގެ ޖަލްސާގައި ވެސް ގިނަ އަދަދެއްގެ އަންހެނުން ބައިވެރި ވެފައިވާކަން ފާހަގަކޮށްލެވެއެވެ. މިހާތަނަށް ބޭއްވި އިންތިހާބްތަކުގައި އެމްޑީޕީއަށް ތާއީދު ބޮޑުކަން ހާމަވެފައިވާ އައްޑޫގައި ބޭއްވި ޖަލްސާއަށް ފަހު އެޕާޓީގެ މެންބަރުން ވަނީ މަގުމަތީގައި ހިނގާލުމެއް ބާއްވާފައެވެ.
ބައެއް ފަރާތްތަކުން ސޯޝަލް މީޑިޔާގައި އެމްޑީޕީގެ ޖަލްސާގައި ބައިވެރިވީ މަދު ބަަޔަކު ކަމަށް ބުންޏަސް ގިނަ އަދަދެއްގެ މީހުން ޖަލްސާގައި ބައިވެރިވެފައިވާ ކަން ފާހަގަކޮށްލެވެއެވެ. އެހެންނަމަވެސް އެމްޑީޕީގެ ހަރަކާތްތަކުގައި އިސްކޮށްއުޅުއްވާ ބޭފުޅަކު ވިދާޅުވި ގޮތުގައި، އެކަށީގެންވާ މިންވަރަކަށް ޖަލްސާ ޕްރޮމޯޓް ކުރެވުނު ނަމަ މާ ގިނަ މީހުން ޖަލްސާއަށް ދާނެ ކަމަށެވެ.
އެމްޑީޕީ މެންބަރުން ބުނާގޮތުގައި ސްކޫލް ކުދިންނާއި ޓީޗަރުންނަށް ދައުވަތު ދީގެން ސަރުކާރުން ހިންގި ފުނަ ހަރަކާތަކީ، ޕީޕީއެމްގެ ހަރަކާތެއް ނޫން ކަމަށާއި އެހެން ނަމަވެސް އެއީ ޤައުމީ ހަރަކާތެއް ކަމަށެވެ. އަދި އެމްޑީޕީ އިން ބުނާގޮތުގައި އެޕާޓީގެ ޖަލްސާއަށް ދިޔަ އެއްވެސް މީހަކީ މަޖުބޫރުކޮށްގެން ގެންދިޔަ މީހެއް ނޫން ކަމަށެވެ.
ކޮންމެ އަކަސް ޕީޕީއެމްގެ މެންބަރުން ބުނާގޮތުގައި، 'ފުނަ' ހަރަކާތަކީ އެ ޕާޓީއަށް ތާއީދު އޮތް މިންވަރު ހާމަވެގެންދާ ކަމެކެވެ. އެހެން ނަމަވެސް މިވާހަކަތަކަށް އަޑު އިވުމުން އެމްޑީޕީގެ މެންބަރުން ބުނަނީ އެމީހުން ގާތަށް ވެސް ހިނި އަންނަ ކަމަށެވެ.
'ފުނަ' ހަރަކާތާއި އެމްޑީޕީ ޖަލްސާ އަށް ބަލާއިރު އެންމެ ގިނަ ބަޔަކު ދިޔައީ ކޮންތަނަކަށް ހެއްޔެވެ ؟ ގޮތެއް ނިންމާނީ ކިޔުންތެރިންނެވެ.