ސ. ގަމުގެ ބޮޑު ފާލަން މަތިން ހިލަ ބަރުކޮށްގެން ލޮރީއެއް ދަނިކޮށް ، ފާލަމުގެ ތަންގަނޑެއް ކަނޑައިގެން ގޮސް ފާލަމަށާއި ލޮރީއަށް ބޮޑެތި ގެއްލުންތަކެއް ލިބިއްޖެއެވެ.
މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ގަން އެއާޕޯޓުގެ މަސައްކަތް ކުރާ ހޯގާޑުގެ ލޮރީއެއް ފާލަން މަތިން ދުއްވާފައި ދަނިކޮށެވެ. މި ހާދިސާގައި ލޮރީ އަށް ގެއްލުން ލިބިފައިވި ނަމަވެސް ލޮރީ އިން ދަތުރުކުރި އެއްވެސް މީހަކަށް އަނިޔާއެއް ވެފައެއް ނުވެއެވެ.
މިވަގުތު ގަން ފާލަމުގައި ހުރި 'އައްޑޫލައިވް'ގެ ނޫސްވެރިޔާ ބުނި ގޮތުގައި، ހިލަ ބަރުކޮށްގެން ދިޔަ ލޮރީ އަށް ވެސް ވަރަށް ބޮޑަށް ގެއްލުން ލިބިފައިވާ ކަމަށެވެ. ގަމުގެ ފާލަމަށް މީގެ ކުރިން ވެސް ހޯގާޑުގެ ފަރާތުން ހިލަ އާއި ސިމެންތި ބާލަނިކޮށް ގެއްލުންތަކެއް ލިބިފައިވެއެވެ. ނަމަވެސް އެ ގެއްލުންތައް ހޯގާޑުގެ ފަރާތުން ވަނީ މަރާމާތުކޮށްދީފައެވެ.
ގަމުގެ ހުރިހާ ތަނެއް ބެލެހެއްޓުމުގެ ޒިންމާ އުފުލަމުން އަންނަ އައްޑޫ އިންޓަނެޝަނަލް އެއާޕޯޓް ކޮމްޕެނީ (އޭއައިއޭ) ގެ ބަހެއް މިކަމުގައި ހޯދާލުމަށް ކުރި މަސައްކަތް އަދި ވަނީ ކާމިޔާބުވާގޮތް ނުވެފައެވެ.
ގަމުގެ ބޮޑު ފާލަމަކީ އިނގިރޭސިން އައްޑޫގައި ތިބި ދުވަސްވަރު ހަދާފައިވާ ބަނދަރެކެވެ.
