ދިވެހިރާއްޖޭގެ ފަސްޓްލޭޑީ ފާތިމަތް އިބްރާހިމްގެ މައިބަދާގައި ރެނދު ލައްވާލާފައިވަނީ ރައީސުލް ޖުމްހޫރިއްޔާ އަބްދުﷲ ޔާމީންގެ ހިޔަނީގައިވާ "ސިއްރު އަތުން" ކަމަށް އެސްޓީއޯގެ ކުރީގެ އެމްޑީ އާދަމް އާޒިމް ވިދާޅުވެއްޖެއެވެ.
އާޒިމް މިގޮތަށް ވިދަޅުވެފައިވަނީ އެމްޑީޕީ އިން އައްޑޫ ސިޓީގައި ބޭއްވި ޖަލްސާގައި ވާހަކަ ދައްކަވަމުންނެވެ. އައްޑޫ ސިޓީގެ ގިނަ އަދަދެއްގެ ބަޔަކު ބައިވެރިވި ޖަލްސާގައި ވާހަކަ ދައްކަވަމުން އާޒިމް ވިދާޅުވި ގޮތުގައި ރާއްޖޭގައި އަނިޔާވެރިކަން އިންތިހާ އަށް ގޮސްފައިވާ ކަމަށާއި އަނިޔާވެރި ޖަރީމާތައް ހިންގަނީ ރައީސް އަބްދުﷲ ޔާމީންގެ ހިޔަނީގައިވާ "ސިއްރު އަތުން" ކަމަށެވެ.
." މިއަދު މި ވަނީ ރައީސް ޔާމީންގެ އަނބިކަނބަލުންގެ މައިބަދާގައި ރެނދު ލައްވާލާފައި އެ ސިއްރު އަތުން. އެވަރުން ވެސް މަނިކުފާނަށް ތި އުޅުއްވަނީ އެ ސިއްރު އަތް ތިރިކޮށްލައްވަން ނުކުރިގެން " އާޒިމް ވިދާޅުވިއެވެ.
ރައީސް ޔާމީންގެ "ސިއްރު އަތުން" ހިންގަވާ ކަންތަކުގެ ސަބަބުން އެންމެ ފަހުން އަނބިކަނބަލުންނަށް އަނިޔާވި ނަމަވެސް އަދިވެސް ރައީސް ޔާމީން އެ "ސިއްރު އަތް" ތިރިކޮށްލައްވަން ބޭނުން ނުވާކަމަށް އާޒިމް ވިދާޅުވިއެވެ.
ރޭގެ ޖަލްސާގައި އާޒިމް ވިދާޅުވި ގޮތުގައި، ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އަވަހާރަކޮށްލުމާއި ރާއްޖެ ޓީވީ ރޯކޮށްލުމާއި އެ ޓީވީގައި ކުރިން މަސައްކަތް ކުރި އިބްރާހީމް ވަހީދު (އަސްވާޑް) އަށް ދިން ހަމަލާ އާއި 24 ކިލޯގެ މަސްތުވާތަކެތި ރާއްޖެ އެތެރެ ކުރުން ފަދަ ކަންކަމަކީ ރައީސް ޔާމީންގެ "ސިއްރު އަތުން" ހިންގާފައިވާ ޖަރީމާތައް ކަމަށެވެ.
“އެ ސިއްރު އަތުން ނޫންތޯ ރައީސްް ނަޝީދު ޖަލަށް ލީ. އެ ސިއްރު އަތުން ނޫންތޯ ފްރޭމްކޮށް ކާނަލް ނާޒިމް ޖަލަށް ލެއްވީ. ހަމަ އެ އަތުން ނޫންތޯ ޝެއިހް އިމްރާން ޖަލަށް ލައި އަނިޔާ ދެމުން އެ ދަނީ،” އާޒިމް ވިދާޅުވި އެވެ.
މީގެ އިތުރުން ނައިބް ރައީސް ޑރ.ޖަމީލް ބޭރުކޮށްލުމަށާއި، ދިއްގަރު ދާއިރާގެ ކުރީގެ މެންބަރ އަހްމަދް ނާޒިމް އާއި ރައީސް ނަޝީދުގެ ޤާނޫނީ ވަކީލް މަހްފޫޒް ސަޢީދަށް ވެސް އަނިޔާ ދީފައި ވަނީ ރައީސް ޔާމީންގެ "ސިއްރު އަތުން" ކަމަށް އާޒިމް ވަނީ ވިދާޅުވެފައެވެ.
“ގަބޫލް ކުރައްވާ މި ދެންނެވި ހުރިހާ ކަމެއް ފޮރުވިފައިވާ ސިއްރު އަތުން ކުރަައްވަމުން ދަނީ. އަޅުގަނޑު ރައިސް ޔާމީނަށް ދަންނަވާލަން ބޭނުން ވަނީ މި ހުރިހާ ކަމެއް އެންމެ ރަނގަޅަށް ދެނެވަޑައިގަންނަވާނެ ބޭފުޅަކީ ތިއީއޭ.” އާޒިމް ވިދާޅުވި އެވެ.
ކުރީގެ ރައީސް މުހައްމަދު ނަޝީދަކީ ރާއްޖޭގެ އެތައް ހާސް ބައެއްގެ ތާއީދު ލިބިވަޑައިގެންފައިވާ ބޭފުޅެއް ކަން ފާހަގަކުރައްވައި އާޒިމް ވިދާޅުވީ 2018 ގައި ނަޝީދު ވެރިކަމަށް ގެންނަވާނެ ކަމަށެވެ.