"އިސްލާމީ ޝަރީއަތާއި ، ދިވެހިރާއްޖޭގެ ޖުމްހުރިއްޔާގެ ޤާނޫނުއަސާސީއާ އެއްގޮތްވާ ގޮތުގެމަތިން، ދިވެހިރާއްޖޭގައި އިންސާނީ ޙައްޤުތައް ރައްކާތެރުކޮށް ދަމަހައްޓައި، އެފަދަ ޙައްޤުތައް ކުރިއެރުވުމަށް މަސައްކަތް ކުރުމެވެ. " މިއީ ދިވެހިރާއްޖޭގެ ރައްޔިތުންގެ އިންސާނީ ޙައްޤުތައް ހިމާޔަތްކުރުމުގެ ޒިންމާއުފުލާ، ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ގެ މަޤްސަދު ކަމުގައި އެ މުއައްސަސާގެ ވެބްސައިޓްގައި ލިޔެފައިވާ ޢިބާރާތްކޮޅެވެ.
އެހެން ނަމަވެސް ދިވެހިރާއްޖޭގެ ރައްޔިތުންގެ ތެރެއިން އެޗްއާރްސީއެމް ފާހަގަ ކުރަނީ އަބަދުވެސް ކުށްވެރިންނާއި ބޮޑެތި ސިޔާސީ މީހުންގެ ދިފާޢުގައި ބަޔާންތައް ނެރޭ މުއައްސަސާއެއްގެ ގޮތުގައެވެ. ސަބަބުތަކެއް ނެތިއެއް ވެސް ނޫނެވެ. ނިކަމެތި ރައްޔިތު މީހާއަށް ލިބޭ ގެއްލުންތަކާއި ބެހޭ ގޮތުން އެޗްއާރްސީއެމްގެ ފަރާތުން ބައެއް ފަހަރު ބަޔާނެއް ވެސް ނެރެފައެއް ނުވެއެވެ. ޖަލުތަކުގައި ބޮޑެތި ކުށްކޮށްގެން ބަންދުކޮށްފައިވާ މީހުންގެ ދިފާޢުގައި އެޗްއާރްސީއެމް އިން ވާހަކަ ދައްކާ ކަމަށާއި އެ ކުށްވެރިންގެ ސަބަބުން އަނިޔާ ލިބޭ މީހުންގެ ހައްޤުގައި އެޗްއާރްސީއެމުން ބަހެއް ނުބުނާތީ ކޮމިޝަނުގެ އިޚްލާސްތެރިކަމާއި މެދު ގިނަ ބަޔަކު ސުވާލު އުފައްދައެވެ.
ރޭ އައްޑޫ ސިޓީގައި ހުންނަ އެޗްއާރްސީއެމްގެ އޮފީހުގެ ސެކިއުރިޓީ ގާޑަށް ގްރޫޕަކުން ހަމަލާދިނުމުގެ ސަބަބުން ސީރިއަސް ޒަޚަމްތަކެއް ލިބިގެން އޭނާ އަށް ހިތަދޫ ރީޖަނަލް ހޮސްޕިޓަލުގައި އަންނަނީ ފަރުވާ ދެމުންނެވެ. އެޗްއާރްސީއެމްގެ އޮފީސް ހިމާޔަތް ކުރުމުގެ ވާޖިބު އަދާކުރަމުން ދަނިކޮށް ގްރޫޕަކުން އައިސް ސެކިއުރިޓީ ގާޑަށް ހަމަލާދީ މާރާމާރީ ހިންގުމުގެ ސަބަބުން އޭނާގެ މޭކަށިގަނޑުގެ ހަތަރު ތަނަކުން ރެނދުލާފައި ވާއިރު މިހާތަނަށް ވެސް އެޗްއާރްސީއެމްގެ ފަރާތުން އެކަން ކުށްވެރިކޮށް ބަޔާނެއް ނެރެފައި ނުވެއެވެ.
'އައްޑޫލައިވް' އަށް އެނގިފައިވާގޮތުގައި ސެކިއުރިޓ ގާޑަށް ހަމަލާދީފައިވަނީ އޭނާ އެޗްއާރްސީއެމްގެ އޮފީހަށް ޑިއުޓީއަށް އައި މަގުމަތީގައި، އެ އޮފީހާ ދުރު ނޫން ހިސާބަކުންނެވެ. ރޭގެ ހާދިސާގެ ސަބަބުން އާއިލާއަކަށް ލިބިގެންދިޔައީ ހިތްދަތިކަމެކެވެ. މިރެއިން ފެށިގެން ސެކިއުރިޓީ ގާޑުން ތިބޭނީ ހަމަގައިމުވެސް ބިރުވެރިކަމެއްގެ ތެރޭގައެވެ. އެހެން ނަމަވެސް އިންސާނީ ޙައްޤުތައް ހިމާޔަތް ކުރުމަށް އުފައްދާފައިވާ މުއައްސަސާ އަދިވެސް އޮތީ ހިމޭނުންނެވެ.
އެޗްއާރްސީއެމްގެ ފަރާތުން ރޭ ހިނގި ހާދިސާއާއި ގުޅިގެން ދައްކާނެ އެއްވެސް ވާހަކައެއް ނެތެވެ. 'އައްޑޫލައިވް'ގައި ޝާއިއު ކުރި ޚަބަރަކާއި ގުޅިގެން އެޗްއާރްސީއެމްގެ އޮފިޝަލަކު އަމިއްލަފުޅަށް 'އައްޑޫލައިވް' އަށް ގުޅުމުން، މި ހާދިސާއާއި ބެހޭގޮތުން ކޮމިޝަނުން ދެކޭގޮތް އޮޅުންފިލުވާލުމުން ލިބުނު ޖަވާބުން ކޮމިޝަނުން ރޭގެ ހާދިސާއަކީ މާބޮޑު ކަމަކަށް ނުހަދާ ކަން ވަނީ ހާމަވެގެން ގޮސްފައެވެ.
އެޗްއާރްސީއެމްގެ އޮފިޝަލްގެ ޖަވާބަކަށް ވީ، " ތިކަމާއި މެދު ދެން ވަކިއެއްޗެއް އަނެއްހެން ނެތް" ކަމަށެވެ.
'ކޮމިޝަނަށް އެއީ މާބޮޑު ކަމެއް ނޫނެވެ. ބިރުވެރިކަމާއި ނާމާންކަމުގައި ނިކަމެތި ރައްޔިތުން ދިރިއުޅެން ޖެހުމަކީ ކޮމިޝަނުގެ މެންބަރުންނަށް މާބޮޑު ކަމަކަށް ނުވާނެކަން އެނގެއެވެ.ސަބަބަކީ ރޭ އަނިޔާ ލިބުނީ ސިޔާސީ ބޭފުޅަކަށް ނުވީމައެވެ. ނުވަތަ ރޭގެ ހާދިސާގައި ގެއްލުން ލިބުނީ ސެކިއުރިޓީ ބަލަހައްޓާ މީހާ ދުއްވާފައި ދިޔައީ، "ސައިކަލްކޮޅަކަށް" ނުވުމުން ކަމަށް ވެދާނެއެވެ. އަދި ރެނދުލާފައި ވަނީ އޭނާގެ "މޭކަށިގަނޑު ކޮޅުގައި" ކަމަށް ނުވީމައެވެ.
އެޗްއާރްސީއެމްގެ ބޭފުޅުން އެކި ރަސްމިއްޔާތު ތަކުގައި އިންސާނީ ހައްޤޭ ކިޔައިގެން ވާހަކަ ދައްކަވާ އިރު، ނިކަމެތި މީހާއެކޭ މުއްސަނދި މީހާ އެކޭ ތަފާތެއް އޮވެގެން ނުވާނެއެވެ. އެގޮތަށް އެތަފާތު ގެންގުޅޭ ނަމަ އެއީ ވަރަށް ހިތާމަ ކުރަން ޖެހޭ ކަމެކެވެ.