އައްޑޫގެ މަގުތަކުގައި ސައިކަލް ދުއްވާ އިރު ހުރިހާ ވަގުތުތަކެއްގައި ވެސް ހެލްމެޓް އަޅައިގެން ދުއްވުމަކީ އެ މީހެއްގެ ނަފްސު ރައްކާތެރިކަމުގެ ގޮތުން އެޅޭ ވަރަށް މުހިއްމު ފިޔަވަޅަކަށްވާތީ އެކަން ކުރުމަށް އައްޑޫ ސިޓީ ޕޮލިހުން އައްޑޫ ރައްޔިތުންނަށް އިލްތިމާސްކޮށްފި އެވެ.
ފުލުހުން ބުނާގޮތުގައި އައްޑޫގެ މަގުތަކުގައި ކޮންމެ ދުވަހަކު ކަހަލަ ގޮތަކަށް އެކްސިޑެންޓްތައް ހިނގައި، އަނިޔާ ލިބޭ މީހުންގެ ބޮލަށް ގެއްލުން ލިބި ބޮލަށް ގިނަ ޒަޚަމްތަކެއް ލިބިގެންދާކަން ފާހަގަ ކުރެވޭ ކަމަށެވެ. އެހެންކަމުން އައްޑޫގެ މަގުތައްކުގައި ދެ ފުރޮޅުލީ އިންޖީނު އުޅަނދު ދުއްވާ އިރު ހުރިހާ ވަގުތެއްގައިވެސް ހެލްމެޓް އަޅައިގެން ދުއްވުމަކީ ރައްކާތެރިކަމުގެ ގޮތުން އެޅޭނެ ވަރަށް މުހިއްމު ފިޔަވަޅެއް ކަމަށްވާތީ ހެލްމެޓް އަޅައިގެން ދުއްވުމަކީ އައްޑޫ ސިޓީ ޕޮލިސްގެ ވަރަށް ބޮޑު އެދުމެއްކަމަށް ފުލުހުން ބުނެއެވެ.
އެއްގަމު ދަތުރުގެފަތުރުގެ ގާނޫނުގައި ބުނެފައިވާ ގޮތުން ހެލްމެޓް އަޅަން ޖެހެނީ 60 ކިލޯ މީޓަރަށް ދުއްވުމުގެ ހުއްދަ އޮންނަ ސަރަހައްދުގަ އެވެ. އެގޮތުން މިހާތަނަށް އެ ސްޕީޑްގައި ދުއްވުމުގެ ހުއްދަ އޮންނަނީ ހިތަދޫ ލިންކް ރޯޑްގެ ބައެއް ސަރަހައްދުތަކުގައެވެ. އެ ސަރަހައްދުގެ ތެރޭގައި ހެލްމެޓް ނާޅައި ދުއްވައިފި ނަމަ 750ރ. އިން ޖޫރިމަނާ ކުރެވޭނެ ކަމަށް ކަނޑައަޅާފައިވެ އެވެ.