ހިންމަފުށީ އައްސޭރި ޖަލުގައި ބަންދުކޮށްފައިވާ ކުރީގެ ޑިފެންސް މިނިސްޓަރ ކާނަލް ނާޒިމާއި ޝެއިޚް އިމްރާން އަބްދުﷲ ބަންދުކޮށްފައި ތިއްބަވާ ޔުނިޓުން "އެއްޗެހިތަކެއް" ހޯދާފައިވާކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.
'އައްޑޫލައިވް' އަށް އެނގިފައިވާ ގޮތުގައި "އެއްޗެހިތަކެއް" ފެނުނު އެޕާޓްމެންޓްގައި ތިއްބަވަނީ ކުރީގެ މަޖިލީހުގެ ކުރީގެ މެމްބަރު ނާޒިމާއި އެމްޑީޕީ ސަރުކާރުގެ ޑިފެންސް މިނިސްޓަރ ތޮލްހަތު އިބްރާހިމްކިލެގެފާނުއެވެ.
ކޮމިޝަނާ އޮފް ޕްރިޒަންސް މުހައްމަދު ހުޝާމް އާއި ހަވާލާދީ ބައެއް މީޑިޔާތަކުގައި ރިޕޯޓްކޮށްފައިވާ ގޮތުގައި ހިންމަފުށީގެ ސްޕެޝަލް ޕްރޮޓެކްޝަން ޔުނިޓް (އެސްޕީޔޫ) ފާސްކުރި ކުރުމުގައި "އެއްޗެހިތަކެއް" ފެނިފައިވާ ކަމަށެވެ. ނަމަވެސް އިތުރު ތަފްސީލެއް ހާމަކޮށްފައެއް ނުވެއެވެ.
މި ހަތަރު ބޭފުޅުން ތިއްބަވާ ތަނުން "އެއްޗެހިތަކެއް" ފެނުނު ކަމަށް ކަރެކްޝަންސް އިން ބުނެފައި މި ވަނީ ރައީސް އަބްދުﷲ ޔާމީންގެ ދެކަނބަލުން ހައްޖަށް ފަހު ސެޕްޓެމްބަރު މަހުގެ 28 ވަނަ ދުވަހު މާލެ ވަޑައިގެންނެވި ރިޔާސީ ލޯންޗްކޮޅުގައި އެއްޗެއް ގޮވި ހާދިސާ ތަހުގީގް ކުރަމުންދާ ދަނޑިވަޅެއްގައެވެ.