ދެމަފިރިންގެ ގުޅުމަކީ އެންމެ ގާތް ގުޅުންކަން އެންމެންވެސް ޤަބޫލުކުރެއެވެ. އެހެން މީހުންނާ އަޅާ ބަލާއިރު ދެމަފިރިން އެކަކު އަނެކަކުގެ ވާހަކަތައް މާބޮޑަށް ދެނިގަންނަކަމަށް ހުރިހާ މީހުންވެސް ޤަބޫލުކުރެއެވެ.
ހަމަޔަޤީނުން ވެސް ތިބާގެ ވިސްނުން ވެސް ހުންނާނީ އެގޮތަށްކަން އެނގެ އެވެ. ނަމަވެސް ސައިންސްވެރިންގެ ހޯދުމަކުން އެކަން އެހެން ނުވާކަމަށް ދައްކައިފިއެވެ. ދެރަހުމަތްތެރިންނަށް އެކަކު އަނެކަކު އެނގޭއިރު ދެމަފިރިންނަކަށް ނޭނގެއެވެ.
ދެމަފިރިންގެ ގުޅުމަކީ އެންމެވަރުގަދަ، އެންމެ ނިކަމެތި ،އެންމެ ނާޒުކު، އެންމެ ހަމަޖެހުންލިއްބައިދޭ، އަދި ބައެއްފަހަރު އެންމެ ހިތްދަތިކަން ގެނެސްދޭ ގުޅުމެވެ. ޖޯކު ލިޔާމީހުން އެންމެގިނަ ޖޯކު ހަދާފައިވަނީވެސް ދެމަފިރިންގެ ގުޅުމާބެހޭގޮތުންނެވެ.
އަދި ވަރަށްގިނަ އަންހެނުން ބުނާވާހަކައެއް އޮވެއެވެ. އަހަރެންގެ ފިރިމީހާ އެއްގޮތަކަށްވެސް އަހަރެން ބުނާގޮތަކަށް ނަހަދައެވެ. ގިނަފިރިހެނުން ބުނަމުންދަނީ އަނބިމީހާ އޭނާގެ ވާހަކަތަކަށް ސަމާލުކަން ނުދޭވާހަކައެވެ. ނަފުސާނީ ޢިލްމުވެރިންބުނާގޮތުގައި މިފަދަ ޝަކުވާތައް އެއުފެދެނީ އެދެމީހުން އެކަކު އަނެކަކު ރަނގަޅަށް ނުދަންނާތީއެވެ. ކޮންމެ އަންބަކު ނުވަތަ ފިރިޔަކުވެސް ބުނަމުންދަނީ ހަޔާތުގެ ބައިވެރިޔާގެ ހުރިހާ ކަމެއްވެސް އެނގޭކަމަށެވެ.
ނަމަވެސް ނަފުސާނީ ޢިލްމުވެރިން ބަޔާން ކުރަނީ އެހެން އެބުނަނީ އެދެމީހުންގެ ދެމެދުގައިވާ އުފާވެރި ގުޅުމެއްގެ ސަބަބުންނެވެ. ދެމަފިރިންނަށްވުރެ ދެ ރަހުމަތްތެރިން އެކަކު އަނެކަކު މާރަނގަޅަށް ދެނިގަނެއެވެ. ދައްކާވާހަކަ ނޭނގިގެން އުޅެނީކާކުތޯ ސުވާލުއުފެދިއްޖެނަމަ ވިސްނަވީ ދެމީހުންކުރެ އެކަކުގެ ވާހަކަ އަނެކަކަށް ނޭނގިގެން އެއުޅެނީ ދެމަފިރިންނަށްކަން ޔަޤީންކުރާށެވެ.
އިނގިރޭސި މުޙާވަރާއެއްގައިވެއެވެ. " ކައިވެންޏަކީ ދެމީހުންގެ ކުށްހީތަކަށް ކިޔާނަމެކެވެ."
ނަފުސާނީ ޢިލްމުވެރިން ވިދާޅުވަނީ މި މުޙާވަރާ ހަމައެކަނި ޖޯކަކަށް ހަދާ ނިންމާލާކަށް ނުވާނެއެވެ. އެހެނީ ގިނަ ދެމަފިރިން ޤަބޫލުކުރާގޮތުގައި އޭނާގެ ޙަޔާތުގެ ބައިވެރިޔާއަށް އޭނަޔާބެހޭ ވަރަށް ގިނަ އެއްޗިހިއެނގެއެވެ. އެހެންވުމުން ވާހަކައެއްބުނާއިރު ކޮންމެހެން އެހާތަފުޞީލް ކުރާކަށް ނުޖެހޭނެއެވެ. މާހިރުން ވިދާޅުވަނީ ދެމަރިންގެ މައްސަލަ އުފެދުމުގެ އަސްލަކީ މީއެވެ. އަހަރެމެން ރައްޓެހިންނަށް ނުވަތަ ބީރައްޓެހިންނަށްވެސް ކަމަކާމެދު އެއްޗެއް ބުނާނަމަ އެކަމެއް ވަރަށް ތަފުޞީލްކޮށް ކިޔައިދެއެވެ. މީގެ ބަދަލުގައި ވިސްނަނީ ހަޔާތުގެ ބައިވެރިޔާއަށް އެހާތަފުޞީލް ކުރާކަށް ނުޖެހޭނެކަމަށެވެ. އެއީ އޭނާއަށް އަހަންނާބެހޭގޮތުން ވަރަށް ގިނައެއްޗިހިއެނގޭނެއެވެ.
އެމެރިކާގެ ޔުނިވަސިޓީއެއްކަމުގައިވާ ޝިކާގޯގެ މާހިރުން ވިދާޅުވާގޮތުގައި ދެމަފިރިން ވަރަށްބޮޑަށް ވިސްނަން ވީ ކަމެއް އެބައޮތެވެ. އެއީ ދެމަފިރިން އެކަކު އަނެކަކު ވަރަށް ރަނަގަޅަށް ދަންނަކަމަށް ޤަބޫލުކޮށްފިނަމަ ދެމީހުންގެ ދެމެދުގައި ކުށްހީތައްއުފެދި އެކަމުގެ ސަބަބުން ދެމީހުން ދުރުވެ މައްސަލަތައް އުފެދޭތަން އަންނާނެކަމެވެ. މިކަން ދިރާސާކުރުމުގައި ބައިވެރިވި ޕްރޮފެސަރަކު ވިދާޅުވިއެވެ. ދެމަފިރިން އެކަކު އަނެކަކާ ލޯބިން ވާހަކަދައްކާއިރު ދައްކާ ވާހަކަ ތަފުޞީލްނުކޮށް އިޝާރާތަކުން ނިންމާލަނީ ޙަޔާތުގެ ބައިވެރިޔާއަށް އެނގޭނެކަމަށް ނިންމާފައެވެ. ނަމަވެސް އެހެން ނުވުމުން ހިތްނުތަނަސްވުމުގެ އިތުރުން ދިރިއުޅުމުގައި އެކަކު އަނެކަކަށް ޝަކުވާވެސް ކުރެވެންފަށަނީއެވެ.
ދިރާސާ ކުރެއްވި ޕްރޮފެސަރު ހާމަކުރެއްވިގޮތުގައި މީގެ ބަދަލުގައި ނުދަންނަމީހަކާ ނުވަތަ ރައްޓެއްސަކާ ކަމަކާ ވާހަކައެއްދައްކާނަމަ އެކަމެއް ވަރަށް ރަނގަޅަށް ކިޔައިދީގެންނޫނީ އޭނަޔަށް ނޭނގޭނެކަން ޤަބޫލުކޮށް ވަރަށް ތަފްޞީލްކަމާއެކު އޮޅުންފިލުވައިދެއެވެ. މިފަދަ ދިރާސާއެއްހެދުމަށް އެޕްރޮފެސަރ ޝައުޤުވެރިވީ ޕްރޮފެސަރ ގެ އަނބިމީހާގެ އަމަލުތަކަށް ބަލާފައެވެ. އެއީ "އަނބިމީހޭގެ ބުނުމަކާނުލައި އަހަރެންނަށް އެތައްކަމެއް އެނގޭނެކަމުގެއުއްމީދުގައި އަނބި މީހާ ހުރެއެވެ." އަނބިމީހާ ޤަބޫލުކުރާގޮތުގައި ނުބުނި ކަމުގައިވިޔަސް މިކަންތައްތައް ފިރިމީހާއަށް އެނގޭނެއެވެ.
މިކަން ދިރާސާކުރުމަށް އެޓީމުން 24 ދެމަރިފިރިއަކު ހަމަޖެއްސިއެވެ. އަދި މިމީހުން ކޮޓަރިއެއްގައި ފުރަގަސްދީގެން އެކަކު އަނެކަކަށް ނުފެންނަގޮތަށް ބައިތިއްބުމަށްފަހު ޢާންމު ދިރުއުޅުމުގައި ދައްކާ ވާހަކައިގެ ތެރެއިން ބައެއް ވާހަކަދެއްކުމަށް ބުންޏެވެ.
މި ދިރާސާ ކުރުމަށް ޢާންމު ދިރުއުޅުމުގައި ކޮންމެ ދުވަހަކުވެސް ވާހަކަ ދެއްކުމުގައި ބޭނުންކުރާ ޖުމްލަތަކެއް ބުނުމަށް ހަވާލު ކުރީ އެޖުމުލަތައް ބޭނުންކުރުމުން ޙާޔާތުގެ ބައިވެރިޔާއަށް އެކަން ވިސްނެނީ ކިހާ މިންވަރަކަށް އަދި ކިހާ ރަނގަޅަކަށް ތޯ ބެލުމަށެވެ.
މިތަޖުރިބާއިން ޙާޞިލްވި އެއްޗަކީ ދެމަފިރިންގެ ގުޅުމުގައި އޮންނަ ގާތްކަމަކުން ކޮންމެ ކަމަކަށް ކުރަނީ ލަފާއެކެވެ. އަދި ބުނާ ވާހަކައެއް ބުނަނީ ވަރަށް ކުރު ގޮތަކަށެވެ. ޖުމްލަތައް ރައްދުވި ހަޔާތުގެ ބައިވެރިޔާއަށް އަސްލު ދޭންއުޅުނު މެސެޖެއް ނުލިބުނެވެ. ނަމަވެސް މީގެން ބައެއް ދެމަފިރިންގެ ވާހަކަތައް އަނެކާއަށް ރަނަޅަށް ފަހުމްވެސް ވިއެވެ. އެއީ މަދުވިންވަރެކެވެ.
މިޓެސްޓު ކުރުމަށް ކޮލެޖެއްގެ ބެސްޓް ފުރެންޑުން ކަމަށް ބުނާ 60 ގުރޫޕެއް ނެގިއެވެ. ޝިކާގޯގެ ޓެސްޓެކޭ އެއްފަދައިން އެންމެގާތްގުޅުން އޮންނަ ރަޙުމަތްތެރިންގެވެސް ބުނަންބޭނުންވާ ވާހަކަ އެންމެފުރިހަމައަށް ވިސްނައިގަތުމަށް ދަތިތަކާކުރިމަތިވިއެވެ.
ޕްރޮފެސަރ ނެކޮލެސް ހާމަކުރައްވާގޮތުގައި ދެމީހެއްގެ ގުޅުން ބަދެހިވާވަރަކަށް އެކަކުގެ އިޙުސާސްތައް އަނެކާއަށް ވަރަށް ރަނގަޅަށް އެނގެމުންދާކަމަށް ޤަބޫލުކުރެއެވެ. ނަމަވެސް އެދެނެގަތުން އެދެމީހުންގެ މެދުގައި ވަރަށް ކުޑައެވެ.
ޕްރޮފެސަރ ސޮޓިސްކީ ހާމަކުރެއްވިގޮތުގައި ދެމީހެއްގެ ގުޅުން ކިތަންމެ ވަރުގަދަ ވީ ކަމުގައިވިޔަސް ކޮންމެ ކަމެއްގެ ވާހަކަ ވެސް އަނެކާއަށް ވަރަށް ތަފުޞީލްކޮށް ކިޔައިދޭން ޖެހޭނެ ކަން އަބަދުވެސް ހަނދާން ކުރަން ވާނެ އެވެ.
މިދިރާސާއިން ހާމަވި އެންމެ މުހިންމު ކަމަކީ ޚާއްޞަކޮށް ދެމަފިރިންގެ ދެމެދުގައި މައްސަލަޖެހެން ދިމާވާ އެންމެބޮޑު އަސްލަކީ އަބަދުވެސް އަނެކާގެ ޙިތުގައިވާކަންތައް ދެނިނުގަނެވުމުގެ ސަބަބުން ބޮޑެތި މައްސަލަތަކަކާ ކުރިމަތިލާންޖެހޭ ކަމެވެ. ވީމާ ހުރިހާ މީހުންވެސް ވިސްނަންވީ ވަރަށް ތަފާތު އެންގަލަކުންނެވެ. ކޮންމެ މީހަކުވެސް އެމީހަކު ބޭނުންވަ ކަމެއް ބޭނުންވާގޮތަކަށް ވަރަށް ތަފުޞީލްކޮށް ޙަޔާތުގެ ބައިވެރިޔާއަށް ކިޔައިދޭށެވެ. އޮންނަ ގާތްގުޅުމުގެ ސަބަބުން އެނގޭނެކަމަށް އެއްގޮތަކަށްވެސް ނުވިސްނާށެވެ. އެހެންވިސްނުމަކީ ކުރެވޭ އެންމެބޮޑު ކޮސްކަންތަކެވެ. ނުރޯދަރިއަކަށް ކިރެއްނުލިބޭނޭ ބުނާބީދައިން ބޭނުންވާ ކަމެއް ތަފްޞީލުކޮށް ކިޔައިނުދެނީހެއް އެއްގޮތަށްވެސް ނޭނގޭނެއެވެ. ވީމާ މިނުކުތާއަށް ހުރިހާ ބައިވެރިންވެސް ސަމާލުވެލައްވާށެވެ.