އައްޑޫ ސިޓީގެ އަވަށު ބޯޑުތަކަށް އައްޔަން ކުރި އަވަށު ބޯޑު މެމްބަރުންގެ މުސާރާއިގެ ގޮތުގައި ދީފައިވާ ތިން މިލިއަނަށް ވުރެ ގިނަ ރުފިޔާ ހަރަދުކޮށްފައި ވަނީ މާލިއްޔަތު ޤާނޫނާ ހިލާފަށް ކަން ހާމަވެއްޖެއެވެ.
މި މަހުގެ 8 ވަނަ ދުވަހު ނެރެފައިވާ އައްޑޫ ސިޓީ ކައުންސިލްގެ 2012 ވަނަ އަހަރުގެ އޮޑިޓް ރިޕޯޓްގައިވާ ގޮތުން އައްޑޫ އަވަށު ބޯޑުތަކަށް އައްޔަން ކުރި އަވަށުބޯޑު މެމްބަރުންގެ މަޤާމަކީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނާއި ހިލާފަށް އުފައްދާފައިވާ މަޤާމުތަކެއް ކަމަށް ހިތަދޫ މެޖިސްޓްރޭޓްކޯޓުން ނިންމާފައިވާ ކަމަށް ވެސް ބުނެފައިވެ އެވެ.
އޮޑިޓް އޮފީހުން ނެރުއްވާފައިވާ ރިޕޯޓް ގައި ފާހަގަކޮށްފައިވާ ގޮތުން އައްޑޫގެ އަވަށު ބޯޑުތަކަށް އައްޔަންކުރި މެމްބަރުންނަށް، ކޯޓުގެ ހުކުމަށްފަހު ވެސް މުސާރަ ދީފައިވެ އެވެ. އެގޮތުން އެ މެމްބަރުން އައްޔަން ކުރި ތާރީޚުން ފެށިގެން 2013 ވަނަ އަހަރު ނޮވެމްބަރ މަހުގެ ނިޔަލަށް ޖުމްލަ 3،254،733ރ، މުސާރައިގެ ގޮތުގައި ހަރަދުކޮށްފައިވާ ކަމަށް ބުނެފައި ވެއެވެ.
މީގެ އިތުރުން އަވަށު ބޯޑު މެމްބަރުންނަށް ވަޒީފާ ދީފައިވީ ނަމަވެސް މަޤާމުގެ މަސްޢޫލިއްޔަތުތަކާއި ވާޖިބުތަށް ބަޔާންކޮށް އެއްބަސްވުމުގައި ސޮއި ކުރުވާފައި ނުވާކަން ވެސް ފާހަގަކޮށްފައި ވެއެވެ. އަދި އަވަށު ބޯޑުތައް އުފައްދައި އެބޯޑުތަކަށް މެމްބަރުން އައްޔަން ކުރުމުގައި، ވަކިފަރާތަކަށް ފައިދާ ހޯދައި ދިނުމަށް މަސައްކަތްކޮށްފައިވާ ކަމަށް ބެލެވޭ ކަމަށް ބުނެފައިވެ އެވެ. އަދި އެކަމުގައި ކޮރަޕްޝަންގެ ޢަމަލެއް ހިންގާފައި ވޭތޯ އިތުރަށް ތަހުޤީޤު ކުރުމަށް އެންޓި ކޮރަޕްޝަން ކޮމިޝަނަށް ހުށައެޅުމަށް ވެސް އޮޑިޓަޖެނެރަލް ވަނީ ލަފާ ދެއްވައިފަ އެވެ.
އައްޑޫ ސިޓީ ކައުންސިލްގެ 2012 ވަނަ އަހަރުގެ އިދާރާގެ ބަޖެޓުން ހަރަދުކޮށް އެކައުންސިލަށް ހޯދާފައިވާ 950،044ރ. ތަކެތި ހަރުމުދަލުގެ ރަޖިސްޓަރީގައި ހިމަނާފައި ނުވާ ކަމަށް ވެސް އޮޑިޓް ރިޕޯޓްގައިވެ އެވެ.
އަދި އޮޑިޓް ރިޕޯޓުގައި ފާހަގަކޮށްފައި ވާ ކަންކަމުގެ ތެރެއިން އިތުރަށް ތަހުޤީގު ކުރަ ޖެހޭ ކަމެއް ވާ ނަމަ ކަމާ ގުޅޭ އިދާރާތަކުން ތަހުޤީގު ކުރުމަށް ފަހު އެކަންކަމުގައި އިހުމާލުވާ ފަރާތްތަކާ މެދު ފިޔަވަޅު އެޅުމަށް ވެސް އޮޑިޓަ ޖެނެރަލް ވަނީ ލަފާ ދެއްވައިފަ އެެވެ.
އައްޑޫސިޓީގެ އަވަށުބޯޑުތައް އުފައްދާފައި ވަނީ 2011 ވަނަ އަހަރު ބޭއްވި އެކައުންސިލްގެ 17 ވަނަ ބައްދަލުވުމުގައި ފާސްކޮށްގެންނެވެ. އަދި އެ ބޯޑުތަކަށް މެމްބަރުން އައްޔަންކޮށްފައި ވަނީ މާޗް 1، 2011 ގަ އެވެ.