ޗައިނާގައި ބާއްވާ ސިލްކު ރޫޓު ކޮންފަރެންސް އާއި އިންވެސްޓްމެންޓް ފޯރަމުގައި ބައިވެރިވެވަޑައިގަތުމަށް މިވަގުތު ޗައިނާގައި ހުންނެވި ނައިބު ރައީސް އަދީބު އެނބުރި ރާއްޖެ ވަޑައިނުގަންނަވާނެ ކަމަށް އިދިކޮޅު ފަރާތްތަކުން ދައްކާ ވާހަކަތައް 'ޓީމް އަދީބު'ގެ ފަރާތުން ދޮގުކޮށްފިއެވެ.
ސޯޝަލް މީޑިޔާގައި ނައިބު ރައީސް އަދީބު އަށް ތާއީދުކުރާ ޒުވާނުންތަކެއް ހިންގާ 'ޓީމް އަދީބު' ގައި ހަރަކާތްތެރިވާ ބޭފުޅަކު ބުނި ގޮތުގައި އަދީބު ރާއްޖެ ވަޑައިނުގަންނަވާނެ ކަމަށް ދައްކާ ވާހަކަ އަކީ ކަނޑައެޅިގެން ދޮގެއް ކަމަށެވެ. އަދި އެފަދަ ވާހަކަތައް ދައްކަނީ، ސަރުކާރުގެ ތެރޭގައި ފިތުނަ އުފެއްދުމަށް ކަމަށާއި ނައިބު ރައީސް އަދީބާއިި ރައީސް ޔާމީންގެ ގުޅުމަށް އިދިކޮޅު ފަރާތްތަކަށް ބުރޫ އަރުވާނުލެވޭނެ ކަމަށެވެ.
ސޯޝަލް މީޑިޔާގައި ބައެއް ފަރާތްތަކުން، ލޯންޗްގައި ހިނގި ހާދިސާ އާއި ގުޅިގެން ނައިބު ރައީސަށް އިނގިލި ދިއްކުރާތީ އެކަމަށް ވެސް އިޝާރަތްކުރައްވަމުން ކަމަށް، ދާދި ފަހުން ބޭއްވި ޕީޕީއެމް ޕީޖީ ގްރޫޕްގެ ބައްދަލުވުމެއްގައި ރައީސް ޔާމީން ވެސް ވަނީ ނައިބު ރައީސް އަދީބަށް 500 ޕަސެންޓް އިތުބާރު ކުރާކަމަށް ވިދާޅުވެފައެވެ.
ބައެއް ފަރާތްތަކުން ކުރާ ތުހުމަތުތަކަށް ރައްދު ދެއްވަމުން ނައިބު ރައީސް އަދީބު ވިދާޅުވެފައިވާ ގޮތުގައި ރައީސަށް އަމާޒުކުރި ހަމަލާ ފަދަ ތަހުގީގުތަކަކީ އޭގެ އެންމެ ފުނަށް ގޮސް އޭގެ ފަހަތުގައި ތިބި މީހުން އިންސާފުގެ ކުރިމައްޗަށް ގެންނަން ޖެހޭނެ ތަހުގީގުތަކެކެވެ. އަދި އެ ފަދަ ތަހުގީގުތަކަކީ ސިޔާސީ މީހުން ކުރަންވާނެ ކަންތައްތަކެއް ނޫން ކަމަށް ވެސް އެމަނިކުފާނު ވަނީ ވިދާޅުވެފައެވެ.