ވިޔަފާރިއެއް ފަށަން ޝައުގުވެރިވާ ފަރާތްތަކަށް އަމާޒުކޮށްގެން އައްޑޫގައި ހުންނަ އިކޮނިމިކް މިނިސްޓްރީގެ ބިޒްނަސް ޑިވެލޮޕްމަންޓް ސާވިސް ސެންޓަރު (ބީޑީއެސްސީ) އިން ހުޅުމީދޫގައި ވޯކްޝޮޕެއްް ކުރިއަށް ގެންދަން ނިންމައިފި އެވެ.
މި ވޯކްޝޮޕް ބާއްވަން ހަމަޖެހިފައި ވަނީ މި މަހުގެ 27-29 އަށެވެ. ހިލޭ ކުރިއަށް ގެންދާ ވޯކްޝޮޕްގައި ބައިވެރި ވާން ބޭނުންވާ ފަރާތްތަކަށް މިހާރު ވަނީ ނަން ނޯޓް ކުރުމުގެ ފުރުސަތު ވެސް ހުޅުވާލައިފަ އެވެ. އެ ފުރުސަތު މި މަހުގެ 26 އާ ހަމައަށް އޮންނާނެ އެވެ.
ބީޑީއެސްސީގެ ނަންބަރު 6881013 ނުވަތަ 7916947 ގުޅުމުން ނަން ނޯޓު ކުރެވޭނެ އެވެ. ވޯކްޝޮޕުން ޖާގަ ދިނުމަށް ހަމަޖައްސައިފައި ވަނީ ފުރަތަމަ ގުޅާ ފަރާތްތަކަށް ފުރަތަމަ ޖާގަ ދޭ ގޮތަށެވެ.
ބީޑީއެސްސީއަކީ ކުދި އަދި މެދުފަންތީގެ ވިޔަފާރި ކުރިއަރުވައި ތަރައްގީކޮށް ދިނުމަށް އެހީތެރިވެމުން އަންނަ ސެންޓަރެކެވެ. އެގޮތުން ވިޔަފާރިތައް ފަށަން ބޭނުންވާ މައުލޫމާތާއި މާލީ އެހީތެރިކަމާއި މާކެޓް ހޯދައި ދިނުން ފަދަ ކަންކަން އެ ސެންޓަރުން ފަހިކޮށްދެ އެވެ.