ކުރީގެ ޑިފެންސް މިނިސްޓަރ ކާނަލް ނާޒިމް ހަނގުރާމަވެރި ހަތިޔާރު ގެންގުޅުނު ކަމަށް ބުނާ މައްސަލަ ވެސް އިންކުއަރީ ކޮމިޝަނަކުން ބަލަން ޖެހޭނެ ކަމަށާއި އެކަން އެގޮތަށް ކުރުމަށ ނާޒިމްގެ ކޮއްކޮ އާދަމް އާޒިމް ސަރުކާރަށް ގޮވާލައިފިއެވެ.
މިއަދު އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އާޒިމް ވިދާޅުވީ، ކާނަލް ނާޒިމް ވެސް ހައްޔަރުކޮށްފައިވަނީ ރައިސުލްޖުމްހޫރިއްޔާ އަވަހަރާކޮށްލަން އުޅުނު ކަމުގެ ތުހުމަތުގައި ކަމަށާއި ހަމައެގޮތަށް ރިޔާސީ ލޯންޗްކޮޅުގައި އެއްޗެއް ގޮއްވާލާފައި ވަނީ ވެސް ރައީސް އަވަހާރަކޮށްލުމަށް ކަމަށެވެ. އެހެން ކަމުން މި ދެ މައްސަލަ ބަލަން ޖެހޭނީ އެއްގޮތަކަށް ކަމަށް ދެކޭ ކަމަށް އާޒިމް ވިދާޅުވިއެވެ.
"ވަަރަށް ބޮޑު ތަފާތެއް މި ދެ ކަމުގައި އެބައޮތް، އެއް ކަމަކީ އިންކުއަރީ ކޮމިޝަނެއް އުފައްދައިގެން މިއަދު އެކަން ބަލަމުން އެބަދޭ، ރައީސް ޗެއާ ކުރައްވަނީ، ކޯ ޗެއާކަން އުމަރު ނަސީރު ކުރައްވަނީ، ހަމަ އެގޮަތަށް އަޅުގަނޑުމެން އެ ދުވަހު އެދެމުން ދިޔައިން ކާނަލް ނާޒިމްގެ ކޭސް ވެސް އިންކުއަރީ ކޮމިޝަނެއް އެކުލަވާލައިގެން އެކަން ކޮށްދެއްވާށޭ، ކީއްވެގެންތޯ ނުކޮށްދެއްވީ، ވަރަށް ސާފު ސުވާލެއް ވަރަށް ސާފު ޖަވާބެއް، ކާނަލް ނާޒިމް މިވަނީ ހަމަ ސީދާ ރައިސުލްޖުމްހޫރިއްޔާގެ ބެލުމުގެ ދަށުން ހައްޔަރުކުރެވިފައި މިއަދު" އާޒިމް ވިދާޅުވިއެވެ.
އެސްޓީއޯގެ ކުރީގެ އެމްޑީ އާޒިމް ވިދާޅުވީ ގައުމުގެ ހާލަތު މިހާ ހިސާބަށް ގޮސްފައިވަނީ ރައީސް ޔާމީންގެ ފަރުވާ ކުޑަކަމުން ކަމަށާއި ގައުމު ހިންގުން "ކުޑަކުޑަ ކުއްޖެއް"ގެ އަތަށް ދޫކޮށްލުމުން ވާނެ ގޮތް މިހާރު ފެންނަމުންދާ ކަމަށެވެ.
މީގެ އިތުރުން އާޒިމް ވިދާޅުވި ގޮތުގައި ތާއިދު އޮތް މީހުން ޖަލަށް ލައިގެން ވެރިކަން ނުކުރެވޭނެ ކަމަށާއި ދިވެހިން ބޭނުން ވަނީ އޯގާތެރި ވެރިއެއް ކަމަށެވެ. އަދި ރައީސް ހަމައެކަނި އިހުސާސް ކުރައްވަން ޖެހެނީ އާއިލާ ބޭފުޅުންނަށް ލިބޭ ހިތާމަނޫން ކަމަށާއި ރާއްޖޭގެ ހުރިހާ ރައްޔިތުން ހިތާމަ ވެސް ރައީސް އިހުސާސް ކުރައްވަން ޖެހޭނެ ކަމަށް ވެސް އާޒިމް ވިދާޅުވިއެވެ.