ރާއްޖޭގެ މިނިވަން ކަމަށް 50 އަހަރު ފުރުމާ ގުޅިުވައިގެން ނެރުމަށް ހަމަޖެހިފައިވާ، އާ ނޫޓު ސީރީޒްގެ ނޫޓްތަކުގެ 2 ޕެލަޓެއް ގެއްލިފައިވާ ކަމުގެ އަޑުތަކެއް ފެތުރެމުން އެބަދެއެވެ.
އާ ނޫޓު ސީރީޒް "ރަންދިހަފަހެއް" 2 ޕެލަޓްތަކުގެ ފައިސާ ގެއްލުނު ކަމުގެ އަޑުތަކެއް ފެތުރިފައިވާއިރު އެކަމާއި ބެހޭގޮތުން، މަރުކަޒީ ބޭންކް އެމްއެމްއޭގެ ފަރާތުން އަދި ވަކިއެއްޗެއް ބުނެފައެއް ނުވެއެވެ. އެހެން ނަމަވެސް “ރަންދިހަފަހެއް” އިފްތިތާހު ކުރުމުގެ ޖަލްސާ އަންނަ ނޮވެމްބަރު މަހު އެއްވަނަ ދުވަހު ބާއްވާ ގޮތަށް ހަމަޖެހިފައިވަނިކޮށް އެ ޖަލްސާ ވަނީ ފަސްކޮށްފައެވެ.
ސަރުކާރުގެ އިސް އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި "އެފަދަ ވާހަކަތަކެއް ދެކެވޭ ކަމަށާއި އެހެން ނަމަވެސް އެކަމާއި މެދު ސީދާ ވަކިއެއްޗެއް ބުނަން ނޭނގޭ" ކަމަށެވެ.
އާ ނޫޓް ސީރީޒް ގައި ހިމެނޭ 10، 20، 50، 100، 500 އަދި 1000 ގެ ނޫޓެވެ. އާ ނޫޓް ސީރީޒް ބޭނުންކުރަން ހަަމަޖައްސާފައި އޮތީ ޑިސެމްބަރު މަހުގައެވެ. އަދި އެ ނޫޓްތައް ރަސްމީކޮށް އިފްތިތާހް ކުރުމުގެ ޖަލްސާ ޝަރަފުވެރިކުރައްވާ ގޮތަށް ހަމަޖެހިފައި އޮތީ ރައީސުލްޖުމްހޫރިއްޔާ އަބްދުﷲ ޔާމީންއެވެ.
އަލަށް ޗާޕްކޮށްގެން ގެނައި ނޫޓްތަކެއް ވީނުވީއެއް ނޭނގި ގެއްލުނު ކަމަށް ވާހަކަ ދެކެވެމުން ދާއިރު، އެމްއެމްއޭގެ ފަރާތުން އެކަމުގައި ވަކި އެއްޗެއް ބުނެފައި ނުވުމަކީ ވެސް ކަންބޮޑުވާންޖެހޭ ކަމެކެވެ.