ދިވެހިރާއްޖޭގެ ކުރީގެ ނައިބު ރައީސް ޑރ.މުހައްމަދު ޖަމީލް މަޤާމުން ވަކިކުރުމުގެ މަސައްކަތް ފެށުމާއި އެކުހެން މިހާރުގެ ނައިބު ރައީސް އަހްމަދް އަދީބަށް ތާޢީދު ކުރާ ފަރާތްތަކުން، އެބޭފުޅާ ނައިބު ރައީސް ކަމަށް ގެނައުމުގެ މަސައްކަތް ފެއްޓިއެވެ. "އަދީބް ފޯ ވީޕީ" ނަމުގައި ބޮޑު ކެމްޕެއިނެއް ފެށިގެން ކުރިއަށް ދިޔައިރު ހީވީ ނައިބު ރައީސަކު ހޮވުމަށް އިންތިޙާބެއް ބޭއްވުމަށް ތައްޔާރުވަމުން ދަނީ ހެންނެވެ.
އޭރުގެ މަންޒަރުތައް ސިފަވެގެން ދިޔައީ މިހާރުގެ ނައިބު ރައީސް އަދީބު އެމަޤާމަށް ކުފޫ ހަމަވާކަން ރައީސް ޔާމީނަށް ދެއްކުމަށް ކުރި ބުރަ މަސައްކަތެއްގެ ގޮތުގައެވެ. ކޮންމެ އަކަސް "އަދީބް ފޯ ވީޕީ" ކެމްޕެއިން ނިންމާލީ ނައިބު ރައީސް ކަމަށް އަދީބު ގެނައުމަށް ފަހުއެވެ. ނައިބު ރައީސް ކަމުގެ މަޤާމަށް އަދީބު އިސްކުރެވުނުތާ 3 މަސް ދުވަސް ނުވަނީސް ސިޔާސީ މަންޒަރު ބަދަލުވެ އަދީބުގެ މަޤާމް ވަނީ ނުރައްކަލުގެ ތެރޭގައެވެ.
ރައީސް ޔާމީންގެ ލޯންޗްކޮޅުގައި އެއްޗެއް ގޮއްވާލި ހާދިސާއަށް ފަހު ގިނަ ބަޔަކު ދަނީ ނައިބު ރައީސް އަދީބަށް ތުހުމަތު ކުރަމުންނެވެ. ރައީސް ޔާމީން އަދީބަށް ކުރައްވާ އިތުބާރުގެ ޕަސެންޓޭޖް 500 އަށް އެރި ނަމަވެސް ފެންނަ މަންޒަރުތަކަށް ބަލާއިރު އަދީބުގެ ވަގުތު ހަމަވެފައިވާ ކަމުގެ ނިޝާންތައް ދަނީ ފެންނަމުންނެވެ. ނައިބު ރައީސް ކަމުން އަދީބު ވަކިކުރާނެ ކަމުގެ އަޑުތަކެއް ވެސް ގަދަވެފައިވާއިރު، ސަރުކާރު ހިންގާ ކޯލިޝަން ތެރެއިން ދެން ނައިބު ރައީސް ކަމަށް އަންނާނީ ކޮން ބޭފުޅެއް ތޯ ސުވާލު އުފެދެއެވެ.
ނައިބު ރައީސްގެ މަޤާމަށް އަލުން ބޭފުޅަކު އައްޔަން ކުރަން ޖެހިދާނެ ކަމަށް ބެލެވޭ އިރު، ސަރުކާރު ހިންގާ ކޯލިޝަނުގެ ތެރޭގައި ނުސީދާ ގޮތެއްގައި ނައިބު ރައީސްކަމަށް އައުމުގެ ކެމްޕެއިން ފެށިފައިވާ ކަމުގެ ނިޝާންތައް ދަނީ ފެންނަމުންނެވެ. މިފަދަ ކެމްޕެއިން އެއް ފެއްޓެވި ކަމަށް އެންމެ ބޮޑަށް ބެލެވޭ ބޭފުޅަކީ ސަރުކާރު ކޯލިޝަންގައި ހިމެނޭ އެމްޑީއޭގެ ލީޑަރު މީދޫ ދާއިރާގެ މެމްބަރު އަހްމަދު ސިޔާމްއެވެ.
ރައީސް އަބްދުﷲ ޔާމީނަށް މި ވަގުތު ކުރިމަތިވެފައިވާ ހިތްދަތިކަމުން ސަލާމަތްވެވަޑައިގަތުމަށާއި ސަރުކާރުގެ އެންމެހާ އަސާސްތައް ވަރުގަދަކޮށް ބޭއްވުމަށްޓަކައި ދޭން ޖެހޭ ހުރިހާ އެއްބާރުލުމެއް ދޭން އެމްޑީއޭ ގައުމީ މަޖިލީހުން ނިންމުމާއި އަދި އެޕާޓީގެ ފަރާތުން އާދަޔާ ޚިލާފަށް ރައީސް ޔާމީން އަށް ސަނާ ކިޔަމުން ގެންދާކަން ފާހަގަކޮށްލެވެއެވެ. އަދި އެމްޑީއޭގެ އިސްބޭފުޅުންގެ ވާހަކަތަކަށް ބަލާއިރު ވެސް ބޮޑަށް ފާހަގަކުރެވެނީ، ރައީސް ޔާމީންގެ އިތުބާރު ސިޔާމް އަށް އިތުރަށް ހޯދައި ދިނުމަށް މަސައްކަތް ކުރައްވާ މަންޒަރެވެ.
މީގެ އިތުރުން، ސަންޓްރެވެލް ސިޔާމް ފަންޑުކުރައްވާ ނޫހަކުން، ނައިބު ރައީސް އަދީބު އާއި ދެކޮޅަށް "އެންޓިކެމްޕެއިން" ކުރާ ކަމަށް ބައެއް ފަރާތްތަކުން ބުނަމުން ގެންދާކަން ފާހަގަކޮށްލެވެއެވެ. ކުރިއަށް އޮތް މަދު ދުވަސްތަކެއްގެ ތެރޭގައި ސިޔާމް 'ސިއްރިއްޔާތުގައި' ފައްޓާފައިވާ ކެމްޕެއިން ފާޅުގައި ކުރިއަށް ގެންދިއުމަކީ ވެސް އެކަށީގެންވާ ކަމެކެވެ.ނައިބު ރައީސް އަދީބު ކަންތައް ކުރެއްވި ގޮތުން، އިތުރު ބޭފުޅަކަށް ރައީސް ޔާމީންގެ އިތުބާރު ހޯއްދެވުމަކީ އެހާ ފަސޭހަ ކަމެއް ހެނެއް ހިއެއް ނުވެއެވެ. އެހެން ނަމަވެސް އެމްޑީޕީ ފިކުރު ފޮހެލަން 'ވެކްސިން' އުފެއްދި ބޭފުޅަކަށް ނައިބު ރައީސް ކަމަށް އައުމަށް ވެސް 'ވެކްސިން' އެއް އުފައްދަފާނެއެވެ.