ކުޑަ އަންހެން ކުއްޖަަކަށް ބަރަހަނާ މަންޒަރުތަކެއް ހިމެނޭ ފޮޓޯތަކެއް ދެއްކި އައްޑޫއަށް ނިސްބަތްވާ ވަކީލެއްގެ މައްސަލަ ދެއްކި މައްސަލަ ފުލުހުން ބަލަން ފަށައިފިއެވެ.
މައުލޫމާތު ލިބިފައިވާ ގޮތުގައި ކުޑަކުއްޖަަކަށް ދައްކަން އެކަށީގެން ނުވާ ކަހަލަ ފޮޓޯ ދެއްކި މައްސަލައެއް ފުލުހުންނަށް ރިޕޯޓް ކޮށްފައިވަނީ މިދިޔަ މަހުގެ 29 ވަނަ ދުވަހުއެވެ. މި މައްސަލަ ފުލުހުން ތަހުގީގު ކުރަމުން އަންނައިރު މިހާތަނަށް އެމީހާ ހައްޔަރުކޮށްފައި ނުވާކަމަށް ވެއެވެ.
އިތުބާރު ހުރި ގޮތެއްގައި 'އައްޑޫލައިވް'އަށް އެނގިފައިވާ ގޮތުގައި ފުލުހުން ވަނީ މިމައްސަލަ އާއި ގުޅިގެން ސ.ފޭދޫ އަށް ނިސްބަތްވާ ވަކީލެއް ކަމުގައިވާ ސ.ފޭދޫ ފެހިގެ އިބްރާހިމް ނަޖީބުގެ ފޯނު ހިފަހައްޓާފައެވެ. ނަމަވެސް މިކަމާއި ބެހޭގޮތުން ފުލުހުން ވަކި އެއްޗެއް ބުނެފައެއް ނުވެއެވެ.
އިބްރާހިމް ނަޖީބު އަކީ ކުރިން ކަތީބެއްގެ މަޤާމު އަދާކުރައްވާފައިވާ ބޭފުޅެކެވެ. އަދި ބަރަހަނާ މަންޒަރު އެކުލެވޭ ވީޑިއޯތަކެއް ގެންގުޅުނު މައްސަލަ އެއްގައި 2006 ގައިވެސް އެބޭފުޅާ ފުލުސް އޮފީހަށް ހާޒިރުކޮށްފައިވާ ކަމަށް ވެއެވެ.