ދިވެހިރާއްޖޭގެ ނައިބު ރައީސް އަހްމަދް އަދީބް ހައްޔަރުކުރުމަށް ކޯޓް އަމުރެއް ހޯދާފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
އަދީބް ހައްޔަރުކުރުމަށް ފުލުހުން ކޯޓު އަމުރެއް ހޯދާފައިވާކަން ކްރިމިނަލް ކޯޓުގައި މަސައްކަތް ކުރައްވާ ގާޒީ އަކު ވަނީ 'އައްޑޫލައިވް' އަށް ކަށަވަރުކޮށްދީފައެވެ. އެހެން ނަމަވެސް އަދީބް ހައްޔަރުކުރުމުގެ އަމުރު ދީފައިވަނީ ކޮންކަމަކާއި ގުޅިގެން ކަމެއް އެ ގާޒީ ވިދާޅެއް ނުވެއެވެ. ރައީސް އަބްދުﷲ ޔާމީންގެ ލޯންޗްކޮޅުގައި އެއްޗެއް ގޮއްވާލި ހާދިސާއާއި ގުޅިގެން ބައެއް ފަަރާތްތަކުން އަދީބުގެ ބޮލުގައި ބަދުނާމު އަޅުވަމުން ގެންދިޔަ ނަމަވެސް އެމަނިކުފާނު ވަނީ އެވާހަކަތަކުން ބަރީޢަވެވަޑައިގެންފައެވެ.
އަދި ހަމަ އެހެންމެ ފުލުހުންގެ ހެޑް އޮފް ކްރައިމް ކޮމާންޑް ހަމްދޫން ރަޝީދު ވަނީ ހުޅުލޭ އެއާޕޯޓުގެ ވީއައިޕީ ލައުންޖަށް ވަދެވަޑައިގެންފައެވެ.އަދި އޭނާ އަތުގައި ލިޔުމެއް އޮއްވައި ނޫސްވެރިންނަށްވެސް ވަނީ ފެނިފައެވެ.ފާހަގަ ކޮށްލަންޖެހޭ ކަމަކީ ހަމްދޫން ރަޝީދަކީ ރައީސް ޔާމީންގެ ލޯންޗްކޮޅުގައި އެއްޗެއް ގޮއްވާލުމުގެ ހާދިސާގެ ތަހުގީގުގައި ފުލުހުންގެ ފަރާތުން އެންމެ އިސްކޮށް ހަރަކާތްތެރިވާ އޮފިސަރުކަމެވެ.
ނައިބް ރައީސް އަދީބަށް ތުހުމަތުކޮށް ބައެއް ފަރާތްތަކުން ވާހަކަ ދައްކަމުން ގެންދާއިރު އޭގެ ތެރޭގައި ޕީޕީއެމްގެ އިސް އެކްޓިވިސްޓުން ވެސް ހިމެނެއެވެ. އެހެން ނަމަވެސް ސަރުކާރަށް ތާޢީދު ކުރާ މެންބަރުންނާއި އެކު ބޭއްވި ބައްދަލުވުމެއްގައި ވާހަކަ ދައްކަވަމުން ރައީސް ޔާމީން ވަނީ، ނައިބު ރައީސް އަދީބަށް %500 އިތުބާރު ކުރައްވާ ކަމަށް ވިދާޅުވެފައެވެ.
ލޯންޗްކޮޅުގައި ހިނގި ހާދިސާގެ ތަހުގީގަށް މިހާތަނަށް 5 މީހަކު ހައްޔަރުކޮށްފައިވާއިރު، ގިނަ އަދަދެއް ތަންތަން ފާސްކޮށް ބައެއް އިމާރާތްތަކުގެ ސީސީޓީވީގެ ރިކޯޑިން ވެސް ފުލުހުން ވަނީ ހޯދާފައެވެ. އޭގެ ތެރޭގައި ނައިބު ރައީސް އަދީބުގެ އަނބިކަނބަލަކު ދިރިއުޅުއްވާ ގެ ވެސް ހިމެނެއެވެ.