ކުރީގެ ޑިފެންސް މިނިސްޓަރ ކާނަލް ނާޒިމް އަކީ ރައީސް ޔާމީންގެ ސަރުކާރުގައި ފެނިގެންދިޔަ އެންމެ ހިންގުންތެރި ވަޒީރުކަމަށް ގިނަ ބަޔަކު އެއްބަސްވަނީ ސަބަބުތަކެއް ނެތިއެއް ނޫނެވެ. މާލެއަށް ކުރިމަތިވި ފެނުގެ ކާރިސާގެ މައްސަލަ ޙައްލު ކުރެއްވުމަށް އެމަނިކުފާނު އިސްވެ ނިކުމެވަޑައިގެން ކުރެއްވި މަސައްކަތްޕުޅާއި އެކު ގިނަ ބަޔަކަށް ކާނަލް ނާޒިމްގެ ހިންގުންތެރިކަން ފާހަގަވެގެން ދިޔައެވެ.
ސަރުކާރަށް ކުރިމަތިވި ޕްރެޝަރުތަކަށް ބިރުން ކެބިނެޓުގައި ހިމެނޭ ބޮޑެތި ވަޒީރުން ފަހަތަށް ޖެހުނު ނަމަވެސް ނާޒިމް ވަނީ މީޑިޔާގެ ކުރިމައްޗަށް ނިކުމެ ވަޑައިގެން ސާބިތުކަމާއި އެކު، އެ މައްސަލަ ހައްލު ކުރުމަށް އަވަސް ފިޔަވަޅު ތަކެއް އަޅުއްވާފައެވެ. ފެނުގެ ކާރިސާ އާއި ކުރިމަތިވި އިރު ރައީސް ޔާމީން އާއި ނައިބު ރައީސް އަދީބު ވެސް ތިއްބެވީ ރާއްޖެއިން ބޭރުގައެވެ.
ދިވެހިރާއްޖޭގައި އެންމެ ބޮޑަށް ބޮއްސުންލާފައިވާ ސިއްޙީ ދާއިރާގެ މިނިސްޓަރުކަން ހުސްވި ދަނޑިވަޅުގައި އެތަން ހަވާލުވެ ވަޑައިގެން ބަލިކަށިވެފައިވާ ހެލްތް ސެކްޓަރ ބަލަހައްޓަވައި އެ ދާއިރާގެ މައްސަލަތައް ހައްލު ކުރަން ކާނަލް ނާޒިމް ފެއްޓެވިއެވެ. ރައްޔިތުންގެ މެދުގައި ނާޒިމްގެ މަޤުބޫލުކަން އިތުރުވާން ފެށުމުން، ސަރުކާރުގެ ތެރެއިން ބަޔަކު މީހުންގެ ހީލަތްތެރި ރޭވުމެއްގެ ދަށުން ނިޒާމް ފުނޑާލުމަށްފަހު އެމަނިކުފާނު ޖަލަށް ލެވުނެވެ.
ނަމަވެސް ފިސްތޯލައަކާއި ތިން ވަޒަން ދައްކައިގެން ފްރޭމްކުރުމަށް ފަހު ޖަލަށް ލައިގެން ކާނަލް ނާޒިމްގެ މަޤްބޫލުކަން ގެއްލުވާނުލެވޭނެކަން، މިއަދު ސަރުކާރުގެ އިސްވެރިންނަށް ވަރަށް ރަގަޅަށް ސާބިތުވެގެން ދާނެއެވެ. އެއްޒަމާނެއްގައި ނާޒިމްގެ އެންމެ ބޮޑު ހަތުރުންގެ ގޮތުގައި ތިބި މީހުންގެ މެދުގައި ކާނަލް ނާޒިމަކީ ހީރޯއެކެވެ. ވަކި ސިޔާސީ ފިކުރަކަށް ގޮސް ހުސްނުވެ ތިބި އާންމު ރައްޔިތުންގެ މެދުގައި ވެސް އެންމެ މަޤްބޫލު ސިޔާސީ ލީޑަރަކީ ކާނަލް ނާޒިމެވެ.
ސަރުކާރުގެ ތެރެއިން ބަޔަކު އަޑީގައި ތިބެގެން ރައީސް ޔާމީން އަވަހާރަކޮށްލަން ދިން ހަމަލާއަށް ފަހު ސަރުކާރު ނޭވާ ހޮޅިއަށް އެޅިފައިވާއިރު މިހާރު ސަރުކާރުގެ އިސްވެރިންނަށް ކާނަލް ނާޒިމް ފަދަ ބޭފުޅަކު ސަރުކާރުގައި ނެތުމުން އެކަމުން ސަރުކާރަށް ލިބިފައިވާ ނިކަމެތިކަން ދަނީ އިހްސާސްކުރެވެމުންނެވެ. އެކަން އެންމެ ބޮޑަށް އިޙްސާސްކުރެވޭނެ ބޭފުޅަކީ، ޚުދު ރައީސް ޔާމީނެވެ. އެހެން ނަމަވެސް ނާޒިމް ޖަލުން މިނިވަން ކުރުމަށް ފަހު އަލުން އެބޭފުޅާއާއި ވާހަކަ ދައްކާނެ ހިތްވަރެއް ރައީސް ޔާމީންގެ ހުންނަވާނެ ހެނެއް ހިއެއް ނުވެއެވެ.
ފެންނަ މަންޒަރުތަކަށް ބަލާއިރު، ޕީޕީއެމްގެ ބައެއް އެކްޓިވިސްޓުން ގެންދަނީ ކާނަލް ނާޒިމް އަށް ތައުރީފްކޮށް ވާހަކަ ދައްކަން ފަށާފައެވެ. ސީދާ ޕީޕީއެމް ބައެއް އިސްބޭފުޅުން ފަންޑްކޮށްގެން ހިންގާ އެޕާޓީ ޕްރޮމޯޓްކުރުމަށް މަސައްކަތް ކުރާ ފަރާތްތަކުން ގެންދަނީ، ޑިފެންސް މިިނިސްޓަރ ކަމުގައި ކާނަލް ނާޒިމް ކޮށްދެއްވި ޚިދުމަތްތަކަށް ތައުރީފްކުރައްވަމުންނެވެ. އެހެންގޮތަކަށް ދަންނަވާނަމަ ރައީސް ޔާމީންގެ ސަރުކާރު ވަނީ، ކާނަލް ނާޒިމް އަށް ބޭނުންވެފައެވެ.
އަދާލަތު ޕާޓީގެ ރައީސް ޝެއިޚް އިމްރާން ގޭބަންދަށް ބަދަލުކޮށްފައިވާއިރު ވަރަށް އަވަހަށް ކާނަލް ނާޒިމް ވެސް ގޭބަންދަށް ނުވަތަ މިނިވަން ކުރެވިގެން ދާނެ ކަމުގެ އަޑުވަނީ ގަދަވެފައެވެ. ނަމަވެސް ސަރުކާރަށް މިހާރު އޮތް އެންމެ ބޮޑު ޕްރެޝަރަކީ، ކާނަލް ނާޒިމާއި ޝެއިޚް އިމްރާން އަބްދުﷲ ވެސް ސަރުކާރާއި އެކު އެއްވެސް ޑީލެއް ހެދުމަށް އެއްބަސްނުވާނެ ކަމެވެ.
ރާއްޖޭގެ ޝަރުޢީ ދާއިރާގައި މިވަގުތު ހުންނެވި އެންމެ ކޮރަޕްޓް ފަނޑިޔާރު ކަމުގައި ގިނަ ބަޔަކު ބުނަމުން ގެންދާ، ކްރިމިނަލް ކޯޓުގެ ފަނޑިޔާރު އަބްދުލް ބާރީ ޔޫސުފް އިސްވެ ހުންނަވައި، ޤާނޫނީ ނިޒާމް ފުނޑާލުމަށްފަހު ކާނަލް ނާޒިމް ޖަލަށް ލެވިގެން ދިޔުމުގެ ފަހަތުގައި ސަރުކާރުގެ ބައެއް ވެރިން ތިބި ކަމީ އޮޅުވާލެވޭނެ ޙަޤީގަތެއް ނޫނެވެ. "މަށެއް ނޫން، މަށެއް ނޫން" ވިދާޅުވެ ސަރުކާރުގެ އިސްބޭފުޅުން ފަހަތަށް ޖެހިވަޑައިގަންނަވާނެ ކަމެއް ނެތެވެ. ކާނަލް ނާޒިމް ފްރޭމްކުރެވުނުކަން އެނގިގެން "ހަނު" ތިއްބެވި ބޭފުޅުން މިއަދު ގެންދަނީ އެކަމުގެ ހިތާމަކުރަމުންނެވެ.