ކުރީގެ ޑިފެންސް މިނިސްޓަރ ކާނަލް ނާޒިމް ދިރިއުޅުއްވާ ގެކޮޅުގައި ހަނގުރާމަވެރި ހަތިޔާރު ހުރި ކަމަށް ބުނެ އެގެއަށް ފުލުހުން ވަދެ ޢަމަލު ކުރި ގޮތާއި މެދު ވަރަށް ގިނަ ބަޔަކު ސުވާލު އުފެއްދިއެވެ. އެގޮތުން ހަނގުރާމަވެރި ހަތިޔާރު ހުރިކަމަށް ބެލެވޭ ތަނެއް ފާސްކުރުމަށް ފުލުހުން ވަނުމުގެ ކުރިން އެމްއެންޑީއެފްގެ އެކްސްޕްލޯސިވް އޯޑިނެންސް ޑިސްޕޯސަލް ޔުނިޓުގެ އެއްވެސް އެހީތެރިކަމެއް ހޯދާފައި ނުވާތީ އެކަމާއި މެދު ގިނަ ބަޔަކު ސުވާލު އުފެއްދިއެވެ.
ނަމަވެސް އެ ސުވާލުތަކަށް ފުލުހުންގެ ފަރާތުން އެކަށީގެންވާ ޖަވާބެއް ނުލިބި، ޤާނޫނީ ނިޒާމް ފުނޑާލުމަށް ފަހު ކާނަލް ނާޒިމް 11 އަހަރަށް ޖަލަށް ލެވިގެންދިޔައީއެވެ. ނާޒިމްގެ މައްސަލައިގައި ކަން ހިނގާފައިވާގޮތުން އެބޭފުޅާ ފްރޭމްކުރެވުނީ ކަމަށް ގިނަ ބަޔަކު ޤަބޫލުކުރެއެވެ. ޖަލުގައި ކާނަލް ނާޒިމް ހޭދަކުރައްވާ ކޮންމެ ދުވަހެއް ވެސް ވެގެންދަނީ، ސަރުކާރުގެ އިސްބޭފުޅުން ހީކުރެއްވި ގޮތާއި ޚިލާފަށް ނާޒިމްގެ މަޤްބޫލުކަން ރައްޔިތުންގެ މެދުގައި އިތުރުވަމުންދާ ދުވަހަކަށެވެ.
އަދި އެމަނިކުފާނު ފްރޭމްކުރުމަށް ސަރުކާރުގެ ވެރިންތަކެއް އަޑީގައި ތިބެގެން، ކުރެއްވި މަސައްކަތެއްކަން މިހާރު މި ޤައުމުގައި ހިނގަމުންދާ ކަންތައް ތަކުން ވެސް ދަނީ ސާބިތުވަމުންނެވެ. ރައީސް ޔާމީންގެ ލޯންޗްކޮޅުގައި އެއްޗެއް ގޮއްވާލި ހާދިސާއަށް ފަހު ވެރިރަށް މާލޭގައި ސިފައިންގެ ހަރަކާތްތައް ވަނީ ވަރަށް ބޮޑަށް އިތުރުކޮށްފައެވެ. ބޭރުގެ ތަޖުރިބާކާރުން ގެނެސްގެން ބޮޑު ތަހުގީގެއް ކުރިއަށްދާއިރު އެ މައްސަލަ ބެލުމަށް ޙާއްސަ ކޮމިޝަނެއް ވެސް ވަނީ އެކުލަވާލެވިފައެވެ.
ކާނަލް ނާޒިމްގެ މައްޗަށް ވެސް ކުރެވުނީ ރައީސް ޔާމީން އަވަހާރަކޮށްލަން އުޅުނު ކަމުގެ ތުހުމަތެވެ. މިހާރު ވެސް ފާސްކުރެވެމުންދަނީ، ރައީސް ޔާމީން އަވަހާރަކޮށްލަން މަސައްކަތްކުރި ކަމަށް ތުހުމަތު ކުރެވޭ މީހުން ދިރިއުޅޭ ގެތަކާއި އެމީހުންނާއި ގުޅުންހުރި ބައެއް ތަންތަނެވެ. އެކަމަކު ކާނަލް ނާޒިމްގެ ގެކޮޅު ފާސްކުރުމާއި، މިހާރު ކުރިއަށް ގެންދާ ފާސްކުރުންތައް ވަރަށް ތަފާތެވެ.
ނައިބު ރައީސް އަދީބުގެ ގާތް އެކުވެރިއެއް ކަމުގައިވާ ކުރީގެ މަޝްހޫރު ފުޓްބޯޅަ ކުޅުންތެރިޔާ މުހައްމަދު ހުސެއިން (އޮއިއްޓެ) ގެ ގ. އޮއިވާލި ފާސްކުރަން ފުލުހުން ވަދެފައިވަނީ، ލޯންޗްގައި އެއްޗެއް ގޮއްވާލި ހާދިސާއާއި ގުޅިގެންނެވެ. އެގެއަށް ފުލުހުން ވަނީ އެމްއެންޑީއެފްގެ ސްޕެޝަލް ފޯސްގެ ސިފައިން ވެސް ގޮވައިގެންނެވެ. ފުލުހުންނަށް އެގެއަށް ވަދެފައިވަނީ، ކޯޓު އަމުރެއްގެ ދަށުން 24 ގަޑިއިރު ވަންދެން ބަލާ ފާސްކުރުމަށެވެ. ކާނަލް ނާޒިމްގެ ގެކޮޅު ފުލުހުން ވަދެ ފާސްކުރަން ނެގީ ކުޑަ ވަގުތުކޮޅެކެވެ. އޭރު އެމްއެންޑީއެފްގެ އެހީތެރިކަމެއް ފުލުހުން ނުހޯދައެވެ.
ފްރޭމްކުރަން ގޭގެއަށް ވަނުމާއި، ހަތިޔާރު ހޯދަން ގޭގެއަށް ވަނުމުގެ ތަފާތު ދިވެހި ރައްޔިތުންނަށް ވަރަށް ރަނގަޅަށް ވެސް ހާމަވެގެން ދިޔައީއެވެ.