މުޅި ދިވެހިރާއްޖެއަށް ބެލިކަމުގައި ވިޔަސް އެންމެ ގިނަ ތައުލީމީ ދަރީން ނިސްބަތްވަނީ އައްޑޫ އަށެވެ. މިއީ އައްޑޫގެ ރައްޔިތުން އަބަދުވެސް ފަޚުރުވެރިވެ ދައްކަމުން އަންނަ ވާހަކައެކެވެ. އެހެން ނަމަވެސް ތަރައްޤީގެ ދުވެލީގައި އައްޑޫ އަށް ވުރެ ރާއްޖޭގެ އެހެން ހިސާބުތައް ވަނީ މާ ކުރިއަށް ޖެހިލާފައެވެ.
އައްޑޫގެ ރައްޔިތުން ބުނަނީ ސަރުކާރު ތަކުން އެމީހުންނާއި މެދު ތަފާތުކުރުންތައް ގެންގުޅެނީ ކަމަށެވެ. އައްޑޫ ތަރައްޤީކުރަން ބޭނުން ނުވަނީ ކަމަށެވެ. އަދި މާލޭގެ ބައެއް ބޮޑުން އައްޑޫ އާއި ޖައްސާލައިގެން އުޅެނީ ކަމަށެވެ. މިހެން ގޮސް އެތައް ވާހަކަތަކެކެވެ. ގޯސްވަނީ ސަރުކާރުތައް ހިންގެވުމުގައި އިސްކޮށް ތިއްބަވާ ބޭފުޅުންނެވެ. އެއްވެސް ހާލެއްގައި އައްޑޫގެ ރައްޔިތުން އަމިއްލައަށް އެމީހުންގެ ކުށެއް އޮތް ކަމަކަށް ޤަބޫލެއް ނުކުރެއެވެ.
އިންސާނީ ތަބީޢަތަކީ އެއީއެވެ. އަމިއްލައަށް ކުށް ޤަބޫލުކުރަމަށް ވުރެ ބޭނުންވަނީ، އެހެން މީހުންގެ ބޮލުގައި ބަދުނާމު އަޅުވާށެވެ. ފާއިތުވި ސެޕްޓެމްބަރ މަހަށް އެކަނި ނަޒަރު ހިންގާލާށެވެ. ދައުލަތުގެ ބަޖެޓުން ބޮޑު ޚަރަދެއް ކޮށްގެން އައްޑޫ ސިޓީގައި މިއުޒިކް ޝޯޥ އެއ ބޭއްވުނެވެ. އެ ޝޯޥ އަށް ޚަރަދުކުރެވުނު ވަރު ރަސްމީކޮށް ސަރުކާރުގެ އެއްވެސް އިދާރާއަކުން ހާމަކޮށްފައި ނުވި ނަމަވެސް، އެއީ ނިސްބަތުން ކުޑަ ނޫން އަދަދެއް ކަމީ ޝައްކެއް އޮތް ކަމެއް ނޫނެވެ.
އައްޑޫއަށް ދިމަވެފައި ހުރި ކަރަންޓުގެ މައްސަލައާއި އެހެނިހެން މައްސަލަތަކުގެ ކަންބޮޑުވުންތައް އެއްކައިރިކޮށްލާފައި، އެންމެން ވެސ ފުށް ޖަހައި ނަލަހެދިލައިގެން ދިޔައީ ޝޯވ ބަލާށެވެ. އެރޭ ޝޯވ ބާއްވަން ވެގެން ފޭދޫގެ ބައެއް ގެތަކުން ކަރަންޓް ކަނޑާލުމުން ވެސް އެއީ މައްސަލައެއް ކަމަކަށް ބައެއް ރައްޔިތުންނަކަށް ނުވިިއެވެ.
ގޯސްވީ އެ ޚަބަރު ގެނެސްދިން މީޑިޔާތަކެވެ. އެ ޝޯވ އަކަށް ނެގީ ދެ ތިން ގަޑިއިރެކެވެ. ނަމަވެސް އައްޑޫގެ ރައްޔިތުން އަސާސީ ޚިދުމަތްތަކުން މަހުރޫމް ވެފައި ތިބޭތާ މިވަނީ ގިނަ ދުވަސްތަކެއް ވެފައެވެ. ވަކި ފިކުރެއްގެ މީހުންނެއް ނޫނެވެ. ހުރިހާ ރައްޔިތުން ވެސް އެދުވަހު ތިބީ ޝޯވ ބަލަން ގޮސް ހެވި ދިއްލިފައެވެ. ރައްޔިތުން ބޭނުންވީ އުފަލާއި މަޖަލަެވެ. ސަރުކާރުތަކުން މިހެން ބާއްވާ ޝޯވތަކަށް ހެއްލިގެން ގޮސް ޣާފިލްކަމުގައި ތިބެނީ ބޭއިޚްތިޔާރުގައެއް ނޫނެވެ.
ޝޯވ އަށް ފަހު ހަވާ އެރުވި ގަޑީގައި، ކުޑަކުދިންނާއި ބޮޑެތި މީހުން ކަރުގެ ނާރުތައް ފުއްޕާލާފައި ހަޅޭއްލަވަމުން ދިޔައެވެ. ނަމަވެސް ކުޑަ ހިނދުކޮޅެއްގެ އުފަލަށްޓަކައި، "އަންދާލެވެމުން ދިޔައީ ތިމަންނަމެންގެ ޓެކްސް ފައިސާކަން ވިސްނާލީ ކިތައް ރައްޔިތުން ކަމެއް ނޭނގެއެވެ.
ފާއިތުވި ދުވަސްތަކުގައި އައްޑޫއަށް ކުރި ވިއްސާރައަށް ފަހު އައްޑޫގެ އެކި ހިސާބުތަކުގައި މިވަނީ ފެންބޮޑުވެފައެވެ. ހުރިހާ ރަށްތަކެއްގައި އެއްފަހަރާ ފެންހިއްކޭނެ ވަސީލަތްތަކެއް ނެތް ކަން ރައްޔިތުމީހާއަށް ވިސްނުނީ މިއަދުއެވެ. އިންޖީނު ގެންދިޔަ ހަނދާން ވަނީ ކަރަންޓު ކެނޑިގެން ކޮންމެވެސް އުނދަގުލެއް ކުރިމަތިވީމައެވެ.
މިއީ އަޅުގަނޑުމެން އައްޑޫ ރައްޔިތުން ޤަބޫލުކުރަންޖެހޭ ޙަގީގަތެވެ. ސަރުކާރުތައް ގޯހޭ، މާލޭ މީހުން އަޅުގަނޑުމެންނާއި ޖައްސާލަނީ އޭ ގޮވާނެ ކަމެއް ނެތެވެ. ފުރަތަމަ ތިމަންނާމެން އިސްލާޙް ވާން ވީއެވެ. މިހާރު އަޅުގަނޑުމެންެގެ ތާޢީދު ހޯދާލުމަށް ބާއްވަން މިޖެހެނީ މިއުޒިކް ޝޯވ އެކެވެ. މޮޅެތި ވާހަކައެއް ދައްކާލުމާއި އެކު އެ ވާހަކަތަކަށް ހެއްލިގެން ވޯޓް ވެސް ދެނީއެވެ. ޖަލުގައި ތިބި ކުށްވެރިން މިނިވަން ކުރަން ބޮޑެތި ލޮރީ ބުރު ބާއްވާއިރު، ފުރިހަމަ ވެފައި ނުވާ އަސާސީ ޚިދުމަތްތައް ލިބޭނެ މަގު ފަހިކޮށްދިނުމަށް ގޮވާލައި ލޮރީ ބުރެއް ބާއްވާނެ ހިތްވަރެއް ވެސް ނެތީއެވެ.