ދިވެހިރާއްޖޭގައި މީހަކު ކުށެއް ކޮށްފިނަމަ އެމީހެއްގެ ދިފާޢުގައި އިދިކޮޅު ފަރާތްތަކުން ނިކުތުމުގެ ސަބަބުން، މިހާރު މިޤައުމުގެ ކޮންމެ ރައްޔިތަކީ ވެސް ކުށްކުރާ މީހަކަށް ވެފައިވާ ކަމަށް ފޭދޫ ދާއިރާގެ މެންބަރ އިބްރާހިމްދީދީ(އައިބީ) ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އައިބީ ވިދާޅުވި ގޮތުގައި، އިދިކޮޅު ފަރާތްތަކުގެ މަސައްކަތަކީ މަގުމަތީގައި މުޒާހަރާކޮށް ވިޔަފާރިވެރިންނަށް އުނދަގޫކޮށް ކިޔަވާ ކުދިންނަށް އުނދަގޫކުރުން ކަމަށެވެ.
" މި ޤައުމުގައި މީހަކު ކުށެއް ކޮށްފިނަމަ އެމީހެއްގެ ފަހަތުން، ތިބޭފުޅުން(އިދިކޮޅު ފަރާތްތައް) އެމީހުންގެ ސަލާމަތުގައި ހިމާޔަތުގައި ދުވާތާ މިހާރު 7 އަހަރު ވެއްޖެ. އެހެންވީމާ ޤައުމުގެ ހުރިހާ ރައްޔިތުން ކުށްކުރާ ހިސާބަށް ގޮސްފައި ތިބީ. އެއީ އިދިކޮޅު ޕާޓީގެ މީހުން ވިއްޔާ ކުށްވެރިންނަށް ޙިމާޔަތް މިދެނީ. "، އައިބީ ވިދާޅުވިއެވެ.
މީގެ އިތުރުން މިއަދުގެ ޖަލްސާގައި ވާހަކަ ދައްކަވަމުން އައިބީ ވަނީ ޤައުމު ބިނާކުރުމުގައި އިދިކޮޅު ސިޔާސީ ފަރާތްތަކުން ވެސް ސަރުކާރަށް އެއްބާރުލުން ދިނުމަށް ވެސް ގޮވާލައްވާފައެވެ.
" ކުށްވެރިން ހިމާޔަތްކުރުމުގެ ބަދަލުގަ ހިނގާބަލާށޭ ޤައުމު ބިނާކުރެވޭތޯ މަސައްކަތް ކުރަން. ޤައުމުގެ އިޤްތިސާދު ރަނގަޅު ކުރެވޭތޯ މަސައްކަތް ކުރަން. މިއީ އިދިކޮޅު ޕާޓީއެއްގެ ޒިންމާއަކީ " އައިބީ ވިދާޅުވިއެވެ.