ދިވެހިރާއްޖޭގެ ތާރީޚުގައި ޤައުމުގެ ވެރިޔަކު އަވަހާރަކޮށްލުމަށް ދެވުނު އެންމެ ވަރުގަދަ ހަމަލާއެއް ދީފައިވަނީ ފާއިތުވި ސެޕްޓެމްބަރ މަހުގެ 28 ވަނަ ދުވަހުއެވެ. ރައީސުލްޖުމްހޫރިއްޔާގެ ރަސްމީ ލޯންޗްކޮޅުގައި އެއްޗެއް ގޮއްވާލުމާއި ގުޅިގެން އެމަނިކުފާނުގެ އަނބިކަނބަލުން ފާތިމަތް އިބްރާހިމްއަށް ވަނީ ސީރިއަސް އަނިޔާތަކެއް ލިބިވަޑައިގެންފައެވެ.
ލޯންޗްކޮޅުގައި އެއްޗެއް ގޮއްވާލުމުގެ ހާދިސާގެ ތަހުގީގަށް ބޭރުގެ ފަރާތްތަކުގެ އެހީތެރިކަން ހޯދާފައިވާއިރު، އެ ހާދިސާ ހިނގުމާއި އެކު އެއްބަޔަކު ތުހުމަތު ކުރީ އެއީ ސިފައިންގެ ތެރެއިން ބަޔަކު ދިން ހަމަލާއެއް ކަމަށެވެ. އެހެން ނަމަވެސް އެ ތުހުމަތުތަކަށް ރައްދު ދެމުން މޯލްޑިވްސް ނެޝެނަލް ޑިފެންސް ފޯސް އިން ބުނެފައިވަނީ، ހަތިޔާރު ގުދަނުން އެއްވެސް ހަތިޔާރެއް މަދުވެފައި ނުވާކަމަށެވެ.
އޭގެ ތަންކޮޅެއް ކުރިއަށް ޖެހިލާއިރު، ކުރީގެ ޑިފެންސް މިނިސްޓަރ ކާނަލް ނާޒިމްގެ ގެކޮޅުން ފިސްތޯލައެއް ފެނުނު ކަމަށް ބުނާ މައްސަލަ ފެންމަތިވުމާއި އެކު ވެސް އެމްއެންޑީއެފް އިން ބުނެފައިވަނީ، ބަޑި ގުދަނުން އެއްވެސް ހަތިޔާރެއް މަދު ނުވާކަމަށެވެ. އެހެންވެ ކާނަލް ނާޒިމްގެ މައްޗަށް ދައުލަތުން އުފުލާފައިވަނީ ހަނގުރާމަވެރި ހަތިޔާރު އެތެރެކޮށް ގެންގުޅުމުގެ ދަޢުވާއެކެވެ.
ކާނަލް ނާޒިމްގެ ޝަރީޢަތް ކްރިމިނަލް ކޯޓުގައި ކުރިއަށް ދިޔަ އިރު އެމަނިކުފާނުގެ ވަކީލުން ފާހަގަކުރި އެއްކަމަކީ، 2014 ވަނަ އަހަރުގެ ޖެނުއަރީ މަހުގެ ތެރޭގައި އެމްއެންޑީއެފްގެ އެސްޕީޖީ ކޯޕްރަލް އެއްގެ އަތުން ޝަންގްރިއްލާ ރިސޯޓުގެ ތެރެއަށް ފިސްތޯލައެއް ގެއްލުނު ވާހަކައެވެ. މީގެ އިތުރުން އެމްއެންޑީއެފްގެ އެސްޕީޖީ ކޯޕްރަލްއެއްގެ އަތުން މިދިޔަ އަހަރު ހަތިޔާރެއް ގެއްލިފައިވާކަމާއި އެމްއެންޑީއެފްގެ ބަޑި ގުދަނުން ނޫން ގޮތަކަށް ވެސް ރާއްޖެ އަށް ހަތިޔާރު އެތެރެވާކަން ސާބިތުކޮށްދޭން ބައެއް މީހުން ހާޒިރުކޮށްދިނުމަށް އެދުނެވެ. ނަމަވެސް އެ ފުރުސަތު ފަނޑިޔާރުން ދީފައެއް ނުވެއެވެ.
'އައްޑޫލައިވް' ގެ ފަރާތުން ޝަންގްރިއްލާ ރިސޯޓުގެ މުވައްޒަފުންނާއި ސުވާލުކޮށް މައުލޫމާތު އޮޅުން ފިލުވުމުން އެނގިފައިވާ ގޮތުގައި 2014 ވަނަ އަހަރުގެ ޖެނުއަރީ މަހުގެ ތެރޭގައި އެމްއެންޑީއެފް އެސްޕީޖީ ކޯޕްރަލް އެއްގެ އަތުން ރިސޯޓު ތެރެއަށް ފިސްތޯލައެއް ގެއްލުނު ކަމަށެވެ. އަދި އެ ފިސްތޯލަ ހޯދައިދިނީ ރިސޯޓުގެ މުވައްޒަފުން ކަން ވެސް 'އައްޑޫލައިވް' އަށް ވަނީ އެނގިފައެވެ. ޝަންގްރިއްލާ ތެރެއަށް ފިސްތޯލަ ގެއްލުނު ވާހަކަ ދެކެވުމާއި އެކު ވެސް އެމްއެންޑީއެފް އިން ބުނެފައި ވަނީ، ސިފައިންގެ ބަޑިގުދަނުން އެއްވެސް ހަތިޔާރެއް މަދުވެފައި ނުވާ ކަމަށެވެ.
ފިސްތޯލަ ގެއްލުނު މައްސަލައިގައި އެމްއެންޑީއެފް އިން ފިޔަވަޅު އަޅާފައި ވަނީ، އަދީބުގެ ބޮޑީ ގާޑަކާއި މެދުގައެވެ. އޭނާ ސިފައިންގޭގައި ބަންދުކޮށްފައި ވަކި މުއްދަތެއް ވަންދެން ބަހައްޓާފައިވާކަމަށް ވެއެވެ.
އެމްއެންޑީއެފް އިން ވަރަށް އިތުބާރާއި އެކު ނެރެމުން ދިޔަ ބަޔާންތަކުގެ ފެންވަރު މިވަނީ ހާމަވެގެން ގޮސްފައެވެ. ރައީސް އަބްދުﷲ ޔާމީން އަވަހާރަކޮށްލަން ދިން ހަމަލައާ ގުޅިގެން ބ. ހިބަޅިދޫ ބަލާ ފާސްކުރި އިރު ގިނަ އަދަދެއްގެ ހަތިޔާރު ފެނިފައިވާއިރު އޭގެ ތެރޭގައި ސިފައިންގެ ބަޑި ގުދަނަށް ނިސްބަތްވާ ހަތިޔާރު ހުރިކަން ވެސް ވަނީ ހާމަވެގެން ގޮސްފައެވެ.
އެހެން ކަމުން ބަޑި ގުދަނުން ހަތިޔާރު މަދުނުވާކަމަށް ބުނެ އެމްއެންޑީއެފުން މީގެ ކުރިން ދޫކޮށްފައިވާ ލިޔުންތަކުގެ ސައްޙަ ކަމާއި މެދު މިވަނީ ސުވާލު އުފެއްދުމުގެ ފުރުސަތު ލިބެގެން ގޮސްފައެވެ.