އައްޑޫ ސިޓީ ހިތަދޫ، މެދުދާއިރާގެ ނަރުދަމާ އާ ގުޅުން ހުރި މަސައްކަތްތަކެއް ކޮށް ދޭނެ ފަރާތެއް ހޯދަން ފެނަކަ ކޯޕަރޭޝަނުން އިއުލާންކޮށްފި އެވެ.
ފެނަކަ އިން ނެރެފައިވާ އިއުލާނެއްގައިވާ ގޮތުން ހިތަދޫ ނަރުދަމާ ނިޒާމުގެ ސްވަރޭޖް ޑިސްޗާޖް ޕަމްޕް ސްޓޭޝަން އަދި އައުޓްފޯލް ޑިޒައިންކޮށް ޤާއިމު ކުރުމާ އެކު ވެކިއުމް ސްޓޭޝަންތަކާއި ޕްރެޝަ ލައިންތައް ޑިސްޗާޖް ޕަންޕް ސްޓޭޝަނަށް ގުޅައި ދިނުމުގެ މަސައްކަތް އެ ކުންފުނިން ދޭ މަޢުލޫމާތާ އެއްގޮތަށް އަމިއްލަ ތަކެތީގައި ކޮށްދޭނެ ފަރާތެއް ހޯދަން ބޭނުންވެ އެވެ.
ފެނަކަ އިން ބުނިގޮތުގައި މި މަހުގެ 5 ދުވަހު މެންދުރު 12:00 އަށް މާލޭގައި ހުންނަ އެ ކުންފުނީގެ ހެޑް އޮފީސް ނުވަތަ ހިތަދޫ ބްރާންޗުން މައުލޫމާތު ސާފު ކުރުމަށް ފަހު، މި މަހުގެ 12 ދުވަހުގެ 11:30 ގައި ޕްރޮޕޯސަލް ހުށަހަޅަން ޖެހޭނެ ކަމަށެވެ. ޕްރޮޕޯސަލް ހުށަހަޅާނީ ކުންފުނީގެ ހެޑްއޮފީސް ނުވަތަ މިކުންފުނީގެ ހިތަދޫ ބްރާންޗަށެވެ.
އަމިއްލަ ތަކެތީގައި ފެނަކައިގެ މަސައްކަތްތަކެއް ކުރާނެ ބަޔަކު ހޯދަން އެ ކުންފުނިން އިއުލާން ކުރި އިރު، ހިތަދޫ ދާގަނޑު ކޮންސްޓްރަކްޝަނުން އަންނަނީ އެ ކުންފުންޏާ ހަވާލުކޮށްގެން ކުރުވި މަސައްކަތްތަކަށް ފައިސާ ނުލިބިގެން ފެނަކަ އާ ދެކޮޅަށް ކޯޓްގައި ދައުވާ ކުރަމުން ކަން ފާހަގަކޮށްލެވެއެވެ.