ބޮމެއް ގޮއްވާލާނެ ކަމުގެ އިންޒާރުތަކެއް ލިބުމާއި ގުޅިގެން ފުލުހުންނާއި ސިފައިން ނިކުމެ މާލޭގެ ބައެއް ސަރަހައްދުތައް ބަންދުކޮށްފިއެވެ. މިފަދަ އިންޒާރުތަކެއް ލިބިފައިވާކަން އިތުބާރު ހުރި ފަރާތަކުން ވަނީ 'އައްޑޫލައިވް' އަށް ކަށަވަރުކޮށްދީފައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ފުލުހުންނާއި ސިފައިން ގުޅިގެން ހިންގަމުންދާ އޮޕަރޭޝަންގައި ރައްޔިތުންގެ މަޖިލިސް ހިމެނޭ ސަރަހައްދާއި އިސްކަންދަރުކޮށި ހިމެނޭ ސަރަހައްދު ވެސް މިހާރު ވަނީ ބަންދުކޮށް އެސަރަހައްދު ތަކުން މީހުން ހުސްކުރުމުގެ މަސައްކަތް ފަށާފައެވެ.
ފުލުހުންގެ މީޑިއާ އޮފިޝަލް އާއި ހަވާލާދީ ބައެއް މީޑިޔާތަކުގައި ރިޕޯޓްކޮށްފައިވާ ގޮތުގައި މާލޭގެ ސަރަހައްދުތައް ބަންދުކުރަމުން ދަނީ ހިންގަމުންދާ އޮޕަރޭޝަނަކާއި ގުޅިގެން ކަމަށެވެ. އޮޕަރޭޝަން ނިންމައި އެ ސަރަހައްދުތައް ހުޅުވާލާނެ ވަގުތެއް އޮފިޝަލް ވިދާޅެއް ނުވެއެވެ.
ބަންދުކޮށްފައިވާ ސަރަހައްދުތަކުން އާއްމުން ހުސްކުރަމުންދާއިރު އިސްކަންދަރު ކޮށި ކުރިމަތީގައި އޮންނަ ޓާފް ދަނޑުގައި ކުޅެން ތިބި މީހުންވެސް ވަނީ އެ ސަރަހައްދުން ހުސްކޮށްފައެވެ. އަދި އެ ސަރަހައްދުގައި ފަޔާ ލޮރީތައްވެސް މިހާރު ގެންދަނީ ހަރަކާތްތެރިވަމުންނެވެ.