ކުރީގެ ޑިފެންސް މިނިސްޓަރ ކާނަލް ނާޒިމް ދިރިއުޅުއްވާ އެޕާޓްމެންޓަށް މިއަހަރުގެ ޖެނުއަރީ މަހުގެ 17 ވަނަ ދުވަހުގެ ރޭ މެންދަމު ވަދެ، ބަލައި ފާސްކުރިއިރު، ނާޒިމްގެ ކޮޓަރިން ފިސްތޯލައަކާއި މެގަޒިނަކާއި ތިން ވަޒަންގެ އިތުރުން އިމްޕްރޮވައިޒްޑް އެކްޕްލޯސިވް ޑިވައިސް (އައިއީޑީއެއް) ފެނިފައިވާ ކަމަށް ކޮމިޝަނާ އޮފް ޕޮލިސް ހުސައިން ވަހީދު ވަނީ މީޑިޔާގައި ވިދާޅުވެފައެވެ.
ކާނަލް ނާޒިމްގެ ގެކޮޅު ފާސްކުރުމުގެ އޮޕަރޭޝަން ކުރިއަށް ގެންގޮސްފައިވާ ގޮތަށް ބަލާއިރު، އެ އޮޕަރޭޝަނުގައި ސިފައިންގެ އެއްވެސް ދައުރެއް ނެތްކަން ފާހަގަކޮށްލެވެއެވެ. މިކަމާއި ގުޅިގެން ކާނަލް ނާޒިމްގެ ވަކީލުން ވެސް ވަނީ، ހަނގުރާމަވެރި ހަތިޔާރު ހުރިކަމަށް ބެލެވޭ ތަނެއް ފާސްކުރުމަށް ފުލުހުން ވަނުމުގެ ކުރިން އެކަމުގައި އަމަލުކުރަން ޖެހޭ އުސޫލްތަކާއި އެއްގޮތަށް އެމްއެންޑީއެފްގެ އެކްސްޕްލޯސިވް އޯޑިނެންސް ޑިސްޕޯސަލް ޔުނިޓުގެ އެއްވެސް އެހީތެރިކަމެއް ހޯދާފައި ނުވާތީ އާއި ގޮވާތަކެއްޗާއި ގުޅޭ އެއްވެސް ތަމްރީނެއް ނެތް ފުލުހުންތަކެއް ހިންގި އެ އޮޕަރޭޝަނުގެ ސައްޙަކަމާއި މެދު ސުވާލު އުފައްދާފައެވެ.
ކާނަލް ނާޒިމްގެ އެޕާޓްމެންޓުން އައިއީޑީއެއް ފެނުމުން ފުލުހުން އަމަލުކުރި ގޮތާއި، މިއަދު މާލޭގެ ސަރަހައްދަކުން އައީޑީއެއް ފެނުނު ހާދިސާގައި ސަލާމަތީ ބާރުތަކުން، ޢަމަލުކުރި ގޮތާއި މުޅިން ތަފާތެވެ. މިއަދު މާލޭގެ ސަރަހައްދަކުން އައިއީޑީ އެއް ކަމަށް ބެލެވޭ އެއްޗެއް ފެނުމާއި އެކު ސަލާމަތީ ބާރުތަކުން ޢަމަލުކޮށްފައިވަނީ އެފަދަ ހާލަތްތަކުގައި ސިފައިން ޢަމަލުކުރަންޖެހޭ ޕްރޮޓޮކޯލް އާއި އެއްގޮތަށް ކަން މީޑީޔާ އަށް މައުލޫމާތު ދެމުން އެމްއެންޑީއެފްގެ ކެޕްޓަން ވަނީ ވިދާޅުވެފައެވެ.
އެގޮތުން އިހްސާން ވިދާޅުވެފައިވަނީ މިފަދަ އޮޕްރޭޝަންތަކުގައި އާންމުކޮށް އަމަލުކުރާ ގޮތުގެ މަތިން މިއަދު ހިންގި އޮޕަރޭޝަނުގައި ފުލުހުންގެ ދައުރަކީ، ހަމައެކަނި އެ ސަރަހައްދުތައް ކޯޑަންކުރުން ކަމަށެވެ. އަދި އައިއީޑީ ނުގޮވާ ގޮތަށް ހެދުމުގެ އެންމެހައި މަސައްކަތްތަކެއް ކުރިއަށް ގެންގޮސްފައިވަނީ، ސީދާ އެމްއެންޑީއެފްގެ އެކްސްޕްލޯސިވް އޯޑިނެންސް ޑިސްޕޯސަލް ޔުނިޓުގެ ބެލުމުގެ ދަށުން ކަމަށް ވެސް އިހްސާން ވަނީ ވިދާޅުވެފައެވެ.
ނަމަވެސް ކާނަލް ނާޒިމްގެ ގެކޮޅު ފާސްކުރުމުގެ 4 ދުވަސް ކުރިން ސްވަޓްގެ ޓީމެއް ރެޑީކުރުމަށް އަންގާފައިވާކަމަށް ފުލުހުން ވަނީ އޭރު ހާމަކޮށްފައެވެ. ސްވަޓް ޓީމް ރެޑީ ކުރެވުނީ، ނާޒިމްގެ އެޕާޓްމެންޓުގައި ހަތިޔާރު ހުރިކަމަށް ފުލުހުންނަށް މައުލޫމާތު ލިބިގެންކަމަށް ބުނެފައިވާއިރު، 4 ދުވަހަކީ، ގޮވާ އެއްޗެހި ގެންގުޅޭ ކަމުގެ މައުލޫމާތު ލިބިގެން އެކަން ހުއްޓުވުމަށް ރާއްޖޭގެ ދިފާޢީ ބާރުތަކުން ބަލަހައްޓައިގެން ނުތިބޭނެކަން މިއަދު މިވަނީ ސާބިތުވެގެން ގޮސްފައެވެ.
މުލިއާގޭގެ ކައިރީގައި އޮތް ޕިކަޕެއްގައި އައިއީޑީ ހަރުކޮށްފައި، އޮތް ކަމުގެ މައުލޫމާތު އިންޓެލިޖެންސަށް ލިބުމާއި އެކު މާގިނައިރުތަކެއް ނުވެ ސިފައިންނާއި ފުލުހުން ގުޅިގެން ހިންގި އޮޕަރޭޝަނެއްގައި ވަނީ އައިއީޑީ ހޯދުމަށް ފަހު، އެ ނައްތާލުމުގެ މަސައްކަތް ކުރިއަށް ގެންގޮސްފައެވެ. އަދި އެ މަސައްކަތް ކުރިއަށް ގެންދިޔައިރު، ސިފައިން ވަނީ ސަލާމަތީ ސަބަބުތަކަށްޓަކައި ބައެއް ސަރަހައްދުތަކުން މީހުން ހުސްކޮށްފައެވެ. އަދި އެ ސަރަހައްދުތަކުގައި ފަޔާރ ލޮރީތައް ވެސް ހަރަކާތްތެރިވަމުން ދިޔަކަން ފާހަގަކޮށްލެވެއެވެ.
އެހެން ނަމަވެސް ކާނަލް ނާޒިމްގެ ގެކޮޅުން އައިއީޑީއެއް ފެނުމުން ފުލުހުން އެ އައިއީޑީ ގެންގޮސްފައިވަނީ ދަބަހަކަށް ލައިގެން ފުލުހުންގެ މަރުކަޒަށެވެ. އެދުވަހު އެ ސަރަހައްދުގައި ފަޔާރ ލޮރީއެއް ވެސް ހަރަކާތްތެރި ވެފައެއް ނުވެއެވެ. އަދި އެ ސަރަހައްދުން މީހުން ހުސްކުރުމުގެ މަސައްކަތެއް ވެސް ފުލުހުން ކޮށްފައި ނުވާއިރު އެ އައިއީޑީ ނައްތާލުމަށް އެމްއެންޑީއެފްގެ އެކްސްޕްލޯސިވް އޯޑިނެންސް ޑިސްޕޯސަލް ޔުނިޓުގެ އެހީތެރިކަމެއް ހޯދާފައިވާ ކަމެއް މިއަދާއި ހަމައަށް ވެސް ފުލުހުން ހާމަކޮށްފައެއް ނުވެއެވެ.
އެންމެ ފާހަގަކޮށްލެވޭ ކަމަކީ ކާނަލް ނާޒިމްގެ ގެކޮޅުން ފެނުނުކަމަށް ބުނާ އައިއީޑީގެ ވާހަކައެއް އެމަނިކުފާނުގެ މައްޗަށް ކްރިމިނަލް ކޯޓުގައި ކުރި ދައުވާގައި ހިމަނާފައި ނުވުމެވެ.