ރައީސުލް ޖުމްހޫރިއްޔާ އެމަނިކުފާނުގެ ގަރާރަުން މިއަދު މެންދުރު 12:00 އިން ފެށިގެން ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށްފައެވެ. އެއާއި އެކު ޤާނޫނު އަސާސީގެ ދަށުން ކަށަވަރު ކުރެވިފައިވާ ބައެއް ހައްޤުތައް ހިފެހެއްޓިގެންދާނެއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 253 ވަނަ މާއްދާގައި ބުނެފައިވަނީ، ޤުދްރަތީ ކާރިސާއެއް ނުވަތަ ނުރައްކާތެރި ބަލިމަޑުކަމެއް، ނުވަތަ ހަނގުރާމައެއް، ނުވަތަ ޤައުމީ ސަލާމަތަށް ނުރައްކާވެދާނެ ފަދަ ކަމެއް ކުރިމަތިވެއްޖެ ނަމަ ނުވަތަ ބޭރުގެ ޙަމަލާއެއް ކުރިމަތިވެދާނެ ކަމުގެ ބިރުހީވެއްޖެނަމަ ދިވެހިރާއްޖޭގެ ހުރިހާ ސަރަޙައްދެއްގައި ނުވަތަ ކަނޑައެޅޭ ވަކި ސަރަޙައްދެއްގައި ނުވަތަ ސަރަޙައްދުތަކެއްގައި، ތިރީސް ދުވަހަށް ވުރެ ދިގު ނޫން މުއްދަތަކަށް ކުއްލި ނުރައްކަލުގެ ޙާލަތު އިޢުލާންކުރުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށެވެ.
ކުއްލި ނުރައްކަލުގެ ޙާލަތުގައި ހިފެހެއްޓޭނެ ޙައްޤުތައް
• ޤާނޫނު އަސާސީގެ 19 ވަނަ މާއްދާ- މަނާކުރެވިފައި ނުވާ ކަންކަން ކުރުމުގެ މިނިވަންކަން
• ޤާނޫނު އަސާސީގެ 24 ވަނަ މާއްދާ- ޒާތީ ދިރިއުޅުން
• ޤާނޫނު އަސާސީގެ 31 ވަނަ މާއްދާ – ހަޅުތާލު ކުރުމުގެ ޙައްޤު
• ޤާނޫނު އަސާސީގެ 32 ވަނަ މާއްދާ – އެއްވެ އުޅުމުގެ މިނިވަންކަން
• ޤާނޫނު އަސާސީގެ 41 ވަނަ މާއްދާގެ (ހ) – ދަތުރުފަތުރު ކުރުމުގެ މިނިވަންކަން
• ޤާނޫނު އަސާސީގެ 45 ވަނަ މާއްދާ – ޤާނޫނާއި ޚިލާފަށް ބަންދުކުރުމާއި ހައްޔަރުކުރުން ( މި މާއްދާގައި ބަޔާންކޮށްފައިވާ ކަންކަމުގެ ތެރެއިން ހައްޔަރުކުރުމާއި ބަންދުކުރުން ފިޔަވައި ދެންހުރި ކަންކަން )
• ޤާނޫނު އަސާސީގެ 47 ވަނަ މާއްދާ – ހިފެހެއްޓުމާއި ފާސްކުރުމާއި މުދާ އަތުލުން
މީގެ އިތުރުން ގާނޫނު ނަންބަރު 1/2013 ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނަށް ޢަމަލުކުރުން ވެސް ހުއްޓާލުމަށް ވަނީ ނިންމާފައެވެ.
ކުއްލި ނުރައްކަލުގެ ޙާލަތުގައި ނުހިފެހެއްޓޭނެ ޙައްޤުތައް
ޤައުމީ ސަލާމަތަށް ނުރައްކާ ވެއްޖެ ކަމަށް ނިންމައި ކުއްލި ނުރައްކަލުގެ ޙާލަތު އިއުލާން ކުރި ނަމަވެސް ބައެއް ހައްޤުތައް ނުހިފެހެއްޓޭނެއެވެ. އެގޮތުން ޤާނޫނު އަސާސީގެ 255 ވަނަ މާއްދާގެ (ށ) ގައި ކުއްލި ނުރައްކަލުގެ ހާލަތުގައި ވެސް ހިފަހައްޓައިގެން ނުވާނެ ހައްޤުތަކާއި މިނިވަންކަމުގެ ވާހަކަ ބަޔާންކޮށްފައިވެއެވެ. އޭގެ ތެރޭގައި ހިމެނެނީ:
• ޤާނޫނު އަސާސީގެ 21 ވަނަ މާއްދާގައި ބަޔާންކޮށްފައިވާ ދިރިހުރުމުގެ ހައްޤު.
• ޤާނޫނު އަސާސީގެ 25 ވަނަ މާއްދާ- އަޅުވެތިނުކުރުމާއި ގަދަކަމުން މަސައްކަތް ނުކުރުވުން.
• ޤާނޫނު އަސާސީގެ 27 ވަނަ މާއްދާ- ޚިޔާލުފާޅުކުރުމުގެ މިނިވަންކަން
• ޤާނޫނު އަސާސީގެ 28 ވަނަ މާއްދާ- ނޫސްވެރިކަމުގެ މިނިވަންކަން
• ޤާނޫނު އަސާސީގެ 42 ވަނަ މާއްދާ- ޢަދުލުވެރިކަމާއި އެކު ޝަރީޢަތްކުރުން.
• ޤާނޫނު އަސާސީގެ 48 ވަނަ މާއްދާގެ (ށ) – ހައްޔަރުކުރެވޭ މީހުންނާއި ބަންދުކުރެވޭ މީހުންގެ ޙައްޤުތައް.
• ޤާނޫނު އަސާސީގެ 51 ވަނަ މާއްދާ- ކުށެއް ކުރިކަމުގެ ދަޢުވާ އުފުލިފައިވާ މީހުންގެ ޙައްޤުތައް.
• ޤާނޫނު އަސާސީގެ 52 ވަނަ މާއްދާ- އިޢުތިރާފާއި، ޤާނޫނާއި ޚިލާފަށް ހޯދާ ހެކި
• ޤާނޫނު އަސާސީގެ 53 ވަނަ މާއްދާ – ޤާނޫނީ ވަކީލެއްގެ އެހީތެރިކަން
• ޤާނޫނު އަސާސީގެ 54 ވަނަ މާއްދާ- ލާއިންސާނީ އަދަބު ނުދިނުން
• ޤާނޫނު އަސާސީގެ 55 ވަނަ މާއްދާ – މަދަނީ މައްސަލަތަކުގައި ބަންދު ނުކުރުން
• ޤާނޫނު އަސާސީގެ 57 ވަނަ މާއްދާ- ބަންދުކުރެވިފައިވާ މީހުންނާއި މެދު އިޙްތިރާމާއި އެކު ޢަމަލުކުރުން
• ޤާނޫނު އަސާސީގެ 59 ވަނަ މާއްދާ – ޤާނޫނުގައި ކަނޑައެޅިފައިނުވާ ކަމަކަށް ފަހުން ހަދާ ޤާނޫނަކުން އަދަބު ނުދިނުން
• ޤާނޫނު އަސާސީގެ 60 ވަނަ މާއްދާ- އެއް ކުށަކަށް 2 ފަހަރު އަދަބު ނުދިނުން
• ޤާނޫނު އަސާސީގެ 62 ވަނަ މާއްދާ- އެހެނިހެން ހައްޤުތައް ލިބިދިނުން
• ޤާނޫނު އަސާސީގެ 64 ވަނަ މާއްދާ- ޣައިރު ޤާނޫނީ އަމުރުތަކަށް ތަބާނުވުމުގެ ޙައްޤު
މީގެ އިތުރުން ޤާނޫނު އަސާސީގެ 255 ވަނަ މާއްދާގެ (ނ) ގައި ބަޔާންކޮށްފައިވަނީ، މި ޤާނޫނު އަސާސީއާއި ޤާނޫނުތަކުން ލިބިދޭ ޙައްޤުތަކާއި މިނިވަންކަމުގެ ތެރެއިން އެއްވެސް ޙައްޤެއް ނުވަތަ މިނިވަންކަމެއް ހިފަހައްޓާނަމަ އެކަން ކުރަންވާނީ ކުއްލި ނުރައްކަލުގެ ޙާލަތުގައި ކޮންމެހެން ހިފަހައްޓަން ޖެހިއްޖެ ޙައްޤެއް ނުވަތަ މިނިވަންކަމެއް ކޮންމެހެން ހިފަހައްޓަން ޖެހިއްޖެ މިންވަރަކަށެވެ. އަދި ހަމަ މި މާއްދާގެ (ރ) ގައި ބަޔާންކޮށްފައިވަނީ، ކުއްލި ނުރައްކަލުގެ ޙާލަތުގައި އަޅާ ފިޔަވަޅުތައް ވާންވާނީ، ދިވެހިރާއްޖެއިން ޢަމަލުކުރުން ލާޒިމްކުރާ ބައިނަލްއަޤްވާމީ ޤާނޫނުތަކުގައިވާ ގޮތުގެ މަތިން، ކުއްލި ނުރައްކަލުގެ ޙާލަތުގައި ޢަމަލުކުރާންޖެހޭ ޢުސޫލުތަކާއި އެއްގޮތްވާ ގޮތުގެ މަތީން އަޅާ ފިޔަވަޅުތަކަށެވެ.