މާލޭގެ ސްޓެލްކޯ ސަރަހައްދު ސިފައިންނާއި ފުލުހުން ގުޅިގެން ބަލައި ފާސްކުރި އިރު އެ ސަރަހައްދުން ފެނުނީ ބޮމެއް ނޫން ކަމަށް އެމްއެންޑީއެފުން ބުނެފިއެވެ.
އެމްއެންޑީއެފްގެ ކެޕްޓަން އަލީ އިޙްސާން އާއި ހަވާލާދީ ބައެއް މީޑިޔާތަކުގައި ރިޕޯޓްކޮށްފައިވާ ގޮތުގައި ސިފައިން މި ސަރަހައްދުގައި އޮޕަރޭޝަނެއް ފެށީ، މި ސަރަހައްދުގައި އޮތް ކާރެއްގެ ތެރޭގައި ބޮމެއް އޮތް ކަމުގެ ރިޕޯޓެއް ލިބުމާ ގުޅިގެން ކަމަށެވެ. އެ ސަރަހައްދުގައި ހުރި 'އައްޑޫލައިވް'ގެ ރިޕޯޓަރ ބުނި ގޮތުގައި ސިފައިންނާއި ފުލުހުން ބަންދުކޮށްގެން ބަލައި ފާސްކުރި ސަރަހައްދު މިހާރު ވަނީ އާންމުންނަށް ހުޅުވާލާފައެވެ.
އިހްސާން ވިދާޅުވި ގޮތުގައި ސިފައިންނަށް ލިބުނު ރިޕޯޓާ ގުޅިގެން ސިފައިންގެ ބޮމް ސްކޮޑްގެ މީހުން ގޮސް ބެލުމުން އެނގުނީ، އެ ކާރުގެ ބޮނެޓް ތެރޭގައި ބޮނޑިއަކަށް އޮޅިފައި އޮތް ކަރަންޓު ނަރުތަކެއް ކަމަށާއި އެއީ ބޮމެއް ނޫން ކަމަށެވެ. އަދި މިފަދަ ހާދިސާތައް އެމްއެންޑީއެފް އަށް ރިޕޯޓް ކުރާއިރު ވީހާވެސް ތެދު މައުލޫމާތު ދިނުމަށް އިހްސާން ވަނީ އިލްތިމާސްކޮށްފައެވެ.