ނައިބު ރައީސް އަހުމަދު އަދީބު ދިރިއުޅުއްވި އެޕާޓްމަންޓަކުން ފިސްތޯލައެއް ފެނިފައިވާ ކަމަށާއި އެމަނިކުފާނު ވަނި ފުލުހުންގެ އިންޓެލިޖެންސްގެ ބައެއް އޮފިސަރުންނަށް ރިޝަވަތު ހުށަހަޅުއްވާފައި ކަމަށް ފުލުހުން ބުނެފި އެވެ.
ފުލުހުން މިއަދު ބޭއްވި ނޫސް ކޮންފަރެންސެއްގައި ކްރައިމް އިންވެސްޓިގޭޝަން ޑިޕާޓްމަންޓުގެ ހެޑް، ޗީފް ސުޕްރިންޓެންޑެންޓު އޮފް ޕޮލިސް ހަމްދޫން ރަޝީދު ވިދާޅުވީ ފުލުހުންގެ އިންޓެލިޖެންސްގެ ބައެއް އޮފިސަރުންނާއި ސުވާލު ކުރުމުން އިންޓެލިޖެންސް މައުލޫމާތު ނައިބް ރައީސް އަހްމަދު އަދީބާ ހިއްސާކޮށް ފައިވާ ކަމަށް އެބޭފުޅުން ބުނެފައިވާ ކަމަށެވެ. އަދި އެމައުލޫމާތު ހިއްސާކޮށްގެން އެބޭފުޅުންނަށް މާލީ މަންފާ ލިބިފައިވާކަމަށް ތަހްގީގުގައި ކިޔާދީފައިވާ ކަމަށެވެ.
"ރިޝްވަތުގެ މައްސަލަ ތަހުގީގު ކުރުމުން ދިޔައިރުގައި އަޅުގަނޑުމެންނަށް ދަންވަރުގެ ވަގުތުތަކުގައި މޯލްޑިވްސް ޕޮލިސް ސާވިސްގެ ސީނިއާ ބައެއް ބޭފުޅުން އަދީބުގެ އެޕަޓްމަންޓަށް ވަންނަވަނިކޮށް ވަނީ ފެނިފައި. އެހެންވީމަ މިކަމާ ގުޅިގެން އަޅުގަނޑުމެން މިދަނީ މިކަމުގައި ތުހުމަތުކުރެވޭ ފަރާތްތަކާ ވެސް ސުވާލުކުރަމުން،" ހަމްދޫން ވިދާޅުވިއެވެ.
ހަމްދޫނު ވިދާޅުވީ ރިޔާސީ ލޯންޗް ގޮވި ހާދިސާ އާއި ގުޅިގެން ބެލި ނައިބް ރައީސް އަހްމަދު އަދީބް އާއި ގުޅުން ހުރި ބައެއް ތަންތަނުން ފުލުހުންގެ އިންޓެލިޖެންސް ރިޕޯޓް ފެނިފައިވާ ކަމަށެވެ.
މިކަމާއި ގުޅިގެން އަދީބްގެ ބަޔާން ނަގައި ދެ ދުވަހެއްގެ ތެރޭގައި މައްސަލަ ޕީޖީއަށް ފޮނުވުމުގެ މަސައްކަތް ފުލުހުން ދަނީ ކުރަމުންނެވެ.
ރިޔާސީ ލޯންޗްކޮޅުގައި އެއްޗެއް ގޮވި ހާދިސާއަށް ފަހު ރައީސް ޔާމީން ގައުމާއި މުޙާޠަބްކޮށް ދެއްކެވި ވާހަކަފުޅުގައި ނައިބް ރައީސް އަހްމަދު އަދީބްގެ ނުފޫޒު ފުލުހުންގެ އިދާރާއަށް ވަރަށް ބޮޑަށް ފޯރުވާފައިވާ ކަމަށް ވަނީ ވިދާޅުވެފައެވެ.
އަދި ފުލުހުން ބަލަމުންދާ މައްސަލައެއްގައި ހައްޔަރުކޮށްފައިވާ ނައިބް ރައީސް އަހްމަދު އަދީބްއާއި ގާތްގުޅުމެއް އޮންނަ އެމްއެމްޕީއާރްސީގެ މެނޭޖިން ޑިރެކްޓަރ އަބްދުﷲ ޒިއްޔަތުގެ ދިރިއުޅުއްވާ ބައެއް ތަންތަންނާއި، އެމްއެމްޕީއާރްސީގެ އޮފީހުގފެ ތެރެއިން ފުލުހުންނާއި ގުޅޭ ބައެއް ލިޔެ ކިޔުން ފެނިފައިވާ ކަމަށް ރައީސްގެ ވާހަކަފުޅުގައި ވިދާޅުވެފައިވެއެވެ.