ފެނަކަ ކޯޕަރޭޝަނުގެ ފަރާތުން އެކި ކަންކަމާއި ގުޅިގެން ކުރާ އިޢުލާންތަކާއި ގުޅޭ މައުލޫމާތު އައްޑޫގައި ހުންނަ ފެނަކަ ކޯޕަރޭޝަނުގެ މުވައްޒަފުންނަށް ނޭނގޭ މައްސަލަ ބޮޑު ވެއްޖެއެވެ.
'އައްޑޫލައިވް' އަށް އެނގިފައިވާ ގޮތުގައި ފެނަކަ ކޯޕަރޭޝަނުގެ ފަރާތުން ފާއިތުވި އޮކްޓޯބަރ މަހުގެ 29 ވަނަ ދުވަހު ސެންޓްރަލް ޕަވަރ ހައުސް އެކްސްޓެންޝަން ޑިޒައިން މަސައްކަތްކުރާނެ ފަރާތެއް ހޯދުމަށް ކޮށްފައިވާ އިއުލާނާއި ބެހޭގޮތުން މައުލޫމާތު ސާފުކުރުމަށް ބައެއް ފަރާތްތަކުން އައްޑޫގައި ހުންނަ ފެނަކަ އޮފީހަށް ދިއުމުން އެފަދަ އިއުލާނެއް ކޮށްފައި ނުވާނެ ކަމަށް ވަނީ އޮފީހުގެ މުވައްޒަފުން ވަނީ މައުލޫމާތު ދީފައެވެ.
" އިއުލާނާއި ބެހޭ މައުލޫމާތު އޮޅުންފިލުވުމަށް ދިއުމުން ބުނީ، ތިކަހަލަ އިއުލާނެއް ނުކުރެއޭ މިތަނަކުން. ނެތޭ މާލޭ އޮފީހުން އަންގާފައެއް" ފެނަކަ އިން ކޮށްފައިވާ އިއުލާނާއި ބެހޭގޮތުން މައުލޫމާތު އޮޅުންފިލުވުމަށް ދިޔަ މީހަކު ބުންޏެވެ.
އިއުލާނެއް ކޮށްފައިވާކަން ފެނަކަ ކޯޕަރޭޝަނުގެ އައްޑޫ ރީޖަނަލް އޮފީހުގައި މަސައްކަތް ކުރާ މުވައްޒަފުންނަށް ނޭނގޭ ކަމަށް ބުނެފައިވާއިރު، 29 ވަނަ ދުވަހު ސަރުކާރުގެ ގެޒެޓްގައި ޝާޢިއުކޮށްފައިވާ އިއުލާނުގައި ވަނީ، " ޝައުޤުވެރިވެލައްވާ ފަރާތްތަކުން 05 ނޮވެންބަރު 2015 ވާ ބުރާސްފަތި ދުވަހުގެ 11:00 އަށް މި ކުންފުނީގެ ހެޑްއޮފީސް (ޕޯޓް ކޮމްޕްލެކްސް ބިލްޑިންގ، 7 ވަނަ ފަންގިފިލާ) ނުވަތަ މިކުންފުނީގެ ސ.ހިތަދޫ ބްރާންޗަށް ވަޑައިގެން މަޢުލޫމާތު ސާފުކުރެއްވުމަށްފަހު، 12 ނޮވެންބަރު 2015 ވާ ބުރާސްފަތި ދުވަހުގެ 11:00 ގައި އަންދާސީހިސާބު ހުށަހެޅުއްވުން އެދެމެވެ. އަންދާސީހިސާބު ހުށަހަޅާނީ މި ކުންފުނީގެ ހެޑްއޮފީސް (ޕޯޓް ކޮމްޕްލެކްސް ބިލްޑިންގ، 7 ވަނަ ފަންގިފިލާ) ނުވަތަ މިކުންފުނީގެ ސ.ހިތަދޫ ބްރާންޗަށެވެ."
ފެނަކަ ކޯޕަރޭޝަނުގެ އައްޑޫ ރީޖަނަލް އޮފީހުން އިއުލާނާއި ބެހޭ މައުލޫމާތު ނޭނގޭ ކަމަށް ބުނި ނަމަވެސް، އެތަނަށް މައުލޫމާތު ސާފުކުރަން ދިޔަ ބައެއް މީހުން ގެޒެޓްގައި ހުރި އިއުލާން ދެއްކުމުން އައްޑޫގައި ތިބި ފެނަކަ ކޯޕަރޭޝަނުގެ އިސްވެރިން ވަނީ މާލޭގައި ހުންނަ ހެޑް އޮފީހަށް ގުޅައިގެން، މައުލޫމާތު ސެޝަން ކުރިއަށް ގެންގޮސްފައެވެ.
ބައްދަލުވުމުގައި ބައިވެރިވި ފަރާތަކުން 'އައްޑޫލައިވް' އާއި ވާހަކަދައްކަމުން ބުނިގޮތުގައި މިއަދު 12 ޖަހާއިރު ބާއްވާނެ ކަމަށް އިއުލާންގައި ބުނެފައިވާ މައުލޫމާތު ދިނުމުގެ ސެޝަން ބޭއްވިފައިވަނީ، މިއަދު 12:30 އެހާކަށް ހާއިރު ކަމަށެވެ.
" ފުރަތަމަ ބުނީ 12 ޖަހާއިރު ބާއްވާނަމޭ. ނަމަވެސް އެ ބައްދަލުވުން ފެށުނީ އޭގެ 30 މިނިޓްފަހުން މާލެއިން އެބޭފުޅުންނަށް މައުލޫމާތު ފޮނުވުމުން. ބައްދަލުވުމުގައި އައްޑޫ އޮފީހުގެ ވެރިން ބުނެފައިވޭ މިއަދު އޭ މި އިއުލާނެއް ކުރިކަން އެނގުނީ ވެސް"، 'އައްޑޫލައިވް' އާއި ވާހަކަ ދެއްކި މީހާ ބުންޏެވެ.
ފެނަކަ ކޯޕަރޭޝަނުން ކުރި އިއުލާނެއްގެ މައުލޫމާތު އެ ކުންފުނީގެ އައްޑޫ އޮފީހުގެ މުވައްޒަފުންނަށް ނޭނގުނު މައްސަލައެއް ފެންމަތިވެފައިވާއިރު، އައްޑޫ އޮފީހުގެ އިސްވެރިންނަކީ އެއްވެސް ބާރެއް އޮންނަ ބައެއް ނޫން ކަމަށާއި، އެމީހުންނަކީ ހަމައެކަނި މާލޭގައި ހުންނަ އޮފީހަކުން އަންގާ ގޮތަކަށް ކަންކުރަން ތިބޭ ބައެއް ކަމަށް އައްޑޫގެ ގިނަބަޔަކު ދަނީ ބުނަމުންނެވެ. މީގެ އިތުރުން އައްޑޫ އޮފީހުގެ ވަޒީފާތަކުގައި ތިބެނީ ވެސް ސިޔާސީ މީހުން ބޭނުންވާ ގޮތަށް އައްޔަންކޮށްފައި ތިބޭ މުވައްޒަފުން ކަމަށް ގިނަ ބަޔަކު ތުހުމަތު ކުރެއެވެ.
މިކަމާއި ގުޅޭގޮތުން ފެނަކަ ކޯޕަރޭޝަނުގެ އައްޑޫ އޮފީހުގެ އިސްވެރިޔަކާއި ގުޅަން ކުރި މަސައްކަތް ވަނީ ކާމިޔާބުވާގޮތް ނުވެފައެވެ.