މިހާރު ކުރިއަށްދާ އައްޑޫ ސިޓީ، ލިންކް ރޯޑް މަރާމާތު ކުރުމުގެ މަސައްކަތް އަންނަ އަންގާރަ( ނޮވެމްބަރ 10) ދުވަހުގެ ނިޔަލަށް ނިންމައި ލެވޭނެ ކަމަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިން ބުނެފި އެވެ.
އެމްއާރްޑީސީގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި ތާރުގަނޑު އެެހާ އަވަސް އަވަހަށް ހަލާކުވަނީ، ތާރު އަޅާފައިވާލެއް ތުނިވުމުގެ އިތުރަށް، ތާރުގެ އަޑިން އިތުރު ލޭޔާތަކެއް އަޅާފައި ނެތުމުގެ ސަބަބުން ކަމަށެވެ. އެހެންވެ ލިންކް ރޯޑްގައި ވަޅުގަނޑުތައް އެންމެ ބޮޑަށް ހެދިފައިވާ ހިސާބުތަކުން ތާރުގަނޑު ކަނޑައި ނެގުމަށް ފަހު، ވެލި އަޅައި، ވެލީގެ މަތިން ހިލަ ލޭޔާއެއް އަަޅަމުން އަންނަ ކަމަށް އޮފިޝަލް މައުލޫމާތު ދެއްވިއެވެ.
ލިންކް ރޯޑް މަރާމާތު ކުރުމުގެ މަސައްކަތް އެމްއާރްޑީސީ އާއި ހަވާލުކޮށްފައި ވަނީ 1.3 މިލިއަން ރުފިޔާއަށެވެ. އެ މަސައްކަތް ހަވާލު ކުރީ ސެޕްޓެމްބަރު މަހުގެ 3 ވަނަ ދުވަހު އެވެ.
އެމްއާރްޑީސީގެ އޮފިޝަލް ބުނި ގޮތުގައި ޑިސެމްބަރު މަސް ނިމުގެ ކުރިން އައްޑޫ ސިޓީގައި ތާރު އަޅައިގެން ހަދާފައިވާ މަގުތަކުގައި ޓްރެފިކް ނިޝާންތައް ޖަހައި، ސައިން ބޯޑްތައް ވެސް ބަހައްޓައި ނިންމާނެ ކަމަށެވެ.