ކުރީގެ ޑިފެންސް މިނިސްޓަރ ކާނަލް ނާޒިމް ދިރިއުޅުއްވާ އެޕާޓްމެންޓަށް ދިޔަ ބައެއް ފުލުހުންގެ މައްސަލަތަކެއް ވެސް ފުލުހުންގެ ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑުން ބަލަމުން ގެންދާކަން 'އައްޑޫލައިވް' އަށް އެނގިއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގަ ކާނަލް ނާޒިމްގެ އެޕާޓްމެންޓަށް ދިޔަ އެސްއޯ ފުލުހުންގެ ތެރެއިން ބައެއް ފުލުހުންގެ ބަޔާންތައް ވެސް ޕްރޮފެޝެނަލް ކޮމާންޑްސް އިން ވަނީ ނަގާފައެވެ. ނަމަވެސް އެއީ ފުލުހުންނާއި ގުޅޭ ކޮން މައްސަލަ ތަކެއް ކަމެއް އަދި ވަނީ ސާފުވާގޮތް ނުވެފައެވެ.
ކުރީގެ ޑިފެންސް މިނިސްޓަރ ކާނަލް ނާޒިމްގެ ގެކޮޅުން ހަނގުރާމަވެރި ހަތިޔާރު ފެނުނު މައްސަލަ އަކީ ކުރީގެ ނައިބު ރައީސް އަޑީގައި ހުރެގެން ކުރެއްވި ކަމެއް ކަމަށް ސިޔާސީ ފަރާތްތަކުން ވަނީ ތުހުމަތުކޮށްފައެވެ. އަދި ދާދިފަހުން ފުލުހުން ވެސް ވަނީ، ކުރީގެ ނައިބު ރައީސް އަދީބު ބައެއް ފުލުހުންނަށް ރިޝްވަތު ދީފައިވާ ކަމަށާއި އެފަދަ މައްސަލަތައް ބަލަމުން އަންނަކަން ވެސް ހާމަކޮށްފައެވެ.
ދާދި ފަހުން މީޑިޔާތަކަށް ދިން އިންޓަވިއު އެއްގައި، ފުލުސް އޮފީސް ހިންގެވުމާއި ހަވާލުވެ ހުންނެވި، ޑެޕިއުޓީ ކޮމިޝަނާ އޮފް ޕޮލިސް އަހުމަދު އަރީފު ވަނީ ޕްރޮފެޝެނަލް ކޮމާންޑްގެ މަސައްކަތަށް ނުފޫޒު ފޯރުވުމުގެ ފުރުޞަތު އެއްވެސް ފުލުހަކަށް ނުދެއްވާނެ ކަމަށް ވިދާޅުވެފައެވެ. އަދި ހުށަހެޅޭ މައްސަލަތައް ވަކި ފުލުހެއްގެ ނުފޫޒު އޮވެގެން ނުބެލި ހުރެގެން ނުވާނެ ކަމަށާއި ޕްރޮފެޝަނަލް ސްޓޭންޑާޑްސް ގައި ނުނިމި އެއްވެސް މައްސަލައެއް ވެސް އޮވެގެން ނުވާނެ ކަމަށް ވެސް އަރީފް ވަނީ ވިދާޅުވެފައެވެ.
ނާޒިމް ފްރޭމްކުރި ކަމަށް ބުނާ މައްސަލަ ބަލައިދިނުމަށް ފުލުހުންނަށް ހުށަހަޅާފައިވާ ކަމުގެ އަޑުތަކެއް ފެތުރިފައިވީ ނަމަވެސް އެފަދަ މައްސަލަ އެއް އާއިލާގެ ފަރާތުން ފުލުހުންނަށް ހުށަހަޅާފައިވޭތޯ އޮޅުން ފިލުވުމަށް 'އައްޑޫލައިވް' އިން ކުރި މަސައްކަތް އަދި ވަނީ ކާމިޔާބު ވާގޮތް ނުވެފައެވެ.