ސްޓޯކް ސިޓީ އަތުން 0-1 ގެ ނަތީޖާއިން ބަލިވެ، ޗެލްސީ ލީގުގެ 16 ވަނައަށް ވެއްޓިއްޖެއެވެ.
މި ނަތީޖާއާއެކު ޗެލްސީ ލީގުގެ 16 ވަނައިގައި އޮތީ، 11 ޕޮއިންޓާއެކީގައެވެ. ޗެލްސީގެ މައްޗަށް ކުރި ހޯދި ސްޓޯކް ސިޓީ އޮތީ، 16 ޕޮއިންޓާއެކީ ލީގުގެ ބާރަވަނައިގައެވެ. ލީގުގެ އެއްވަނައިގައި 25 ޕޮއިންޓާއެކީ އޮތީ، މެންޗެސްޓަރ ސިޓީއެވެ.
މެޗުގެ ފުރަތަމަ ހާފްގައި ގޯލެއް ފެނިގެން ނުދިޔަނަމަވެސް، ދެވަނަ ހާފްގެ ކުރީކޮޅު މާކޯ އަނޯޓޮވިޗް ވަނީ، ސްޓޯކްއަށް ލީޑުނަގައިދީފައެވެ. މިއީ ޗެލްސީ ލީގުގައި ޖެހިޖެހިގެން ބަލިވި 3 ވަނަ މެޗަށްވާއިރު، ޖެހިޖެހިގެން ލީގުގައި ކުޅުނު 3 މެޗުން ޗެލްސީ އެންމެފަހުން ބަލިވެފައިވަނީ، 1999 ވަނަ އަހަރުގައެވެ.
ލީގުގައި މިހާތަނަށް ކުޅުނު 12 މެޗުގެ ތެރެއިން 7 މެޗުން ޗެލްސީ ބަލިވެފައިވާއިރު، މިގޮތަށް އެންމެފަހުން ދިމާވެފައިވަނީ 1978 ވަނަ އަހަރުގެ ސީޒަނުގައެވެ. އެފަހަރު ޗެލްސީ ވަނީ ލީގުން ރެލިގޭޓްވެފައެވެ.