"އަނެއް ދިވެހިރާއްޖެ، "ހިނިކު" ، "މިންޖުވާން" ، "ބިރަކާއި ނުލައި މަޖާކުރުން"، "ސީދާ ހަރަކާތް" މިއީ ދިވެހިރާއްޖޭގެ އެންމެ ފުރަތަމަ އުފެއްދި ސިޔާސީ ޕާޓީ އެމްޑީޕީގެ ފަރާތުން ސިޔާސީ ހަރަކާތްތަކަށާއި އެ ޕާޓީގެ ކެމްޕެއިން ހަރަކާތްތަކަށް ދީފައިވާ ނަންތަކެވެ.
ދިވެހިރާއްޖޭގެ އެންމެ މަޤްބޫލް ސިޔާސީ ޕާޓީއަށް ވެގެން ގޮސްފައިވަނީ އެޕާޓީން ހިންގާ ހަރަކާތްތަކަށް ދީފައިވާ މިފަދަ ނަންތަކުގެ ސަބަބުން ކަމީ ޤަބޫލުކުރަންޖެހޭ ހަގީގަތެކެވެ. އެމްޑީޕީ ދެކެ ރުޅިއަންނަ މީހާގެ ސަމާލުކަން ވެސް އެޕާޓީގެ ހަރަކާތްތަކަށް ހުއްޓޭ އެއް ސަބަބަކީ ވެސް އެ ހަރަކާތްތަކަށް ދީފައިވާ ނަންތަކެވެ.
ދިވެހިރާއްޖޭގައި ކުއްލި ނުރައްކަލުގެ ޙާލަތު އިޢުލާންކުރުމާއި ގުޅިގެން އެމްޑީޕީ އިން "މިންޖުވާން" ނަމުގައި ބާއްވަން އުޅުނު މުޒާހަރާ ބޭއްވޭ ގޮތެއް ނުވިއެވެ. އެއާއި އެކު ގިނަ ބަޔަކަށް ޤަބޫލުކުރެވިފައި އޮތީ، އެހިސާބުން އެމްޑީޕީގެ އާންމު މެންބަރުންގެ ކިބައިގައި އޮތް ޖޯޝާއި ފޯރި ކެޑިގެން ހިނގައިދާނެ ކަމަށެވެ.
ނަމަވެސް އެހެން ހީކޮށްގެން ތިބި މީހުން ސިއްސުވާލީ ކުއްލި ނުރައްކަލުގެ ހާލަތާއި ގުޅުވައިގެން ހުކުރު ދުވަހުގެ ހަވީރު "ކުއްލި ކަޅެއް" ނަމުގައި ބޭއްވި ޙާއްސަ ސަޔަކުންނެވެ.
އެއާއި އެކު ހަމަ ޔަޤީނުން ވެސް އެމްޑީޕީ އަށް ފާޑުކިޔާ ފަރާތްތަކަށް ލިބިގެން ދިޔައީ ކުއްލި ސިހުމެކެވެ. މާލޭގައި ހުންނަ އެމްޑީޕީ ހަރުގެ ކައިރީގައި ހުކުރު ދުވަހު ހަވީރު ބޭއްވި ސައިފޮދަށް އިންސާފުކުރަން ދިޔަ އެމްޑީޕީގެ މެންބަރުންނަށް ވުރެ އެ މަންޒަރު ބަލަން އެހެން ޕާޓީތަކަށް ނިސްބަތްވާ މީހުން ވެސް މަދެއް ނޫނެވެ. "ކުއްލި ކަޅެއް" ބާއްވަނީ ކިހިނެއްތޯ ބެލުމަށް ހުރިހާ އެންމެން ވެސް ބޭނުންވީއެވެ.
އެމްޑީޕީގެ ރޭވުންތެރިކަން ކިތަންމެހާ ވެސް ފުރިހަމައެވެ. ދޭން ބޭނުންވި މެސެޖް ވަނީ ދީފައެވެ. އެ ޕާޓީގެ އެކްޓިވިސްޓުންގެ ރޭވުންތެރިކަމުގެ ފެންވަރު އެވަނީ ސާބިތުކޮށްދީފައެވެ.
"ކުއްލި ކަޅެއް" ބޭއްވުން ވެގެން ދިޔައީ ފެށުމަކަށެވެ. "ކުއްލި ކުއްލިއަށް" އެމްޑީޕީން ދަނީ ތަފާތު ހަރަކާތްތައް ބާއްވަން ފެށިއެވެ. އެގޮތުން "ކުއްލި" ނަމުގައި ނޫހެއް ނެރެފައިވާއިރު އެ ޕާޓީގެ ހަރުގޭގައި ވަނީ "ކުއްލި ޕިއްޒާ ކެއުމެއް" ވެސް ބާއްވާފައެވެ.
އެމްޑީޕީގެ ފިސާރި އެކްޓިވިސްޓުންގެ ހިތްވަރާއި އެކު "ކުއްލި" މިބަސް ވަނީ ވައިގައި ހިއްޕާލާފައެވެ. ސަރުކާރަށް ތާޢީދުކުރާ ފަރާތްތަކުން ވެސް "ކުއްލި" މިބަސް ބޭނުންކޮށްގެން ޓްވީޓު ކުރަން ފެށި ނަމަވެސް ގިނަ ބައެއްގެ ސަމާލުކަން ހުއްޓިފައިވަނީ އަދިވެސް އެމްޑީޕީގެ "ކުއްލި" ހަރަކާތްތަކަށެވެ.
އެމްޑީޕީގެ އެކްޓިވިސްޓަކު ބުނި ގޮތުގައި އެޕާޓީގެ "ކުއްލި" ހަރަކާތްތަކަށް އެހާބޮޑު ތަރުހީބެއް ލިބެމުންދަނީ ސީދާ އާންމު މެންބަރު މީހާގެ ޚިޔާލާއި އެއްގޮތަށް އެ ހަރަކާތްތައް ކުރިއަށް ގެންދާތީ ކަމަށެވެ.
" އަޅުގަނޑުމެންގެ ހަރަކާތްތައް މިއީ ސީދާ ރައްޔިތު މީހާގެ ރޭވުން އެމީހުންގެ ހިޔާލު އެހެންވެ އެހާ މަޤްބޫލުވަނީ " އެމްޑީޕީ އެކްޓިވިސްޓަކު ބުންޏެވެ.
ސިޔާސީ ހަރަކާތްތަކުގައި އެމްޑީޕީގެ އެކްޓިވިސްޓުން ދައްކާ ހިތްވަރު ރާއްޖޭގެ އެހެން އެއްވެސް ސިޔާސީ ޕާޓީއެއްގެ މެންބަރުންގެ ކިބައިން ނުފެނެއެވެ. ކޮންމެ ހުކުރު ދުވަހެއްގައި އެމްޑީޕީގެ މެންބަރުން 'އަނިޔާވެރިކަމާއި' ދެކޮޅަށް ކުރާ ދުޢާ އަކީ ސީދާ އެކްޓިވިސްޓުން އިސްނަގައިގެން ކުރިއަށް ގެންދާ ހަރަކާތެކެވެ.
ގިނަ ދުވަސްތަކެއް ވެގެން ދިޔަ ނަމަވެސް، އަދިވެސް އެ ދުޢާ ކުރުމުގައި އެމްޑީޕީގެ އެކްޓިވިސްޓުން ފަހަތަށް ޖެހޭ މަންޒަރެއް ނުފެނެއެވެ. ޕާޓީގެ ލީޑާޝިޕުން ފަހަތަށް ފިޔަވަޅު އެޅިޔަސް އެކަމަށް އެކްޓިވިސްޓުންގެ ފަރުވާލެއް ނެތެވެ. އެމީހުން އެތިބީ ސާބިތުކަމާއި އެކު ރައީސް ނަޝީދު މިނިވަން ކުރުމަށް އަތުކުރި އޮޅާލައިގެންނެވެ.
" އަސްލު ޕާޓީގެ ލީޑާޝިޕެއް ނެތް މިހާރަކު. މިހާރު ފެންނަމުން ދަނީ އެމްޑީޕީގެ އާންމު މެންބަރުން ޕާޓީ ހިންގާ މަންޒަރު. މިއީ ރައްޔިތުން ބާރުވެރި ކުރުވުމަކީ" އެމްޑީޕީއަށް ނިސްބަތްވާ މަޖިލިސް މެންބަރަކު ބުންޏެވެ.
"ކުއްލި" ނަމުގައި އެމްޑީޕީގެ ޙަރަކާތްތައް އަދިވެސް ހުރީ ކުރިއަށް ކަމަށް އެޕާޓީއިން ބުނަމުންދާއިރު، ގިނަ ބައެއްގެ ސަމާލުކަން މިވަނީ އެޕާޓީގެ ހަރަކާތްތަކަށް ލިބިފައެވެ "ކުއްލި ނޫހޭ" ބުނުމުން އެއީ ކޯޗެއްކަން ނޭނގޭ މީހަކު މިހާރު ރާއްޖޭގައި ނުހުންނާނެއެވެ. އެހެންކަމުން އެމްޑީޕީގެ "ކުއްލި" ހަރަކާތްތައް ވަރަށް ވެސް ކާމިޔާބެވެ. އެ ޕާޓީގެ އެކްޓިވިސްޓުން ބުނާގޮތުގައި ޕާޓީ ޕްރޮމޯޓްކުރުމަށް އެހެން ޕާޓީތަކުން ޚަރަދުކުރާ ފައިސާއެއް އެމީހުން ޚަރަދެއް ނުކުރެއެވެ. އެޕާޓީގެ ހަރަކާތްތައް ޕްރޮމޯޓްކުރަން ބޭނުން މިކުރަނީ އެޕާޓީގެ އާންމު މެންބަރުންގެ ހިތްވަރެވެ.