އައްޑޫގައި ދިރިއުޅޭ ޔަތީމު ކުދިންގެ މައުލޫމާތު ނޫރުލް އިސްލާމުން ހޯދަނީ

އައްޑޫ ސިޓީގައި ދިރިއުޅޭ ޔަތީމު ކުދިންގެ މައުލޫމާތު ހޯދުމުގެ ގޮތުން ޚާއްސަ ޕްރޮގްރާމެއް ނޫރުލް އިސްލާމް ޖަމްއިއްޔާއިން ކުރިއަށް އެބަގެންދެއެވެ.

ނޫރުލް އިސްލާމް ޖަމްއިއްޔާ އާއި މަހަލްދީބު ފައުންޑޭޝަނާއި ގުޅިގެން ކުރިއަށް ގެންދާ މި ޕްރޮގްރާމަކީ ޔަތީމު ކުދިންނަށް އެހީ ދޭން ބޭނުންވާ ފަރާތްތަކަށް އެ ކުދިންނާއި ގުޅޭ ސައްހަ މައުލޫމާތު ފޯރުކޮށްދިނުމަށް ކުރިއަށް ގެންދާ ޕްރޮގްރާމެއް ކަމަށް ނޫރުލް އިސްލާމް ޖަމްއިއްޔާ އިން ބުނެއެވެ.

ޔަތީމު ކުދިންގެ މައުލޫމާތު ހޯދުމަށް އެ ޖަމްއިއްޔާ އިން ނިންމާފައިވަނީ އެކަމަށް ހާއްސަ ފޯމެއް ފުރައިގެންނެވެ. ނޫރުލް އިސްލާމްގެ ވެބްސައިޓުން މި ފޯމުތައް ޑައުންލޯޑް ކުރެވޭނެ ޖަމްއިއްޔާއިން ބުނެއެވެ.

އެހެންކަމުން އެފަދަ ކުދިންނާއި ބެހޭ މައުލޫމާތު އެގޭ ފަރާތްތަކުން މި ފޯމުތައް ފުރުމަށްފަހު 10 ނޮވެމްބަރު 2015 ވާ އަންގާރަ ދުވަހުގެ ރޭގެ 20:00 ގެ ކުރިން އެ ޖަމްއިއްޔާ އާއި ހަވާލުކޮށްދިނުމަށް އެ ޖަމްއިއްޔާއިން އެދެއެވެ.

މީގެއިތުރުން އެ ޖަމްއިއްޔާގެ އީމެއިލް info@noori-islam.org އަށް ވެސް ފޮނުވާ ފޯމުތައް ވެސް ބަލައިގަންނާނެއެވެ.

ޕްރިންޓު ކުރެވިފައިވާ ފޯމުތަކާއި މި ޕްރޮގްރާމާއި ގުޅޭ އިތުރު މައުލޫމާތު ހޯއްދެވުމަށް 9902900 އަދި 7725899 އަށް ގުޅައިގެން މައުލޫމާތު ސާފުކުރެވޭނެއެވެ.