އައްޑޫ ސިޓީ އަށް ދިމާވެފައިވާ މައްސަލަތައް ހައްލުކުރަމަށް އައްޑޫ ސިޓީ ކައުންސިލުން ނުކުޅެދިފައިވާކަމަށް ބުނެ އެންމެ ބާރަށް ވާހަކަ ދެއްކި އެއްބަޔަކީ މިހާރުގެ ސަރުކާރުގެ އިސްވެރިންނެވެ. އެމްޑީޕީގެ މެޖޯރިޓީ އޮންނަ ކައުންސިލުން ސަރުކާރަށް އެއްބާރުލުން ނުދޭ ވާހަކަ އާއި އައްޑޫގެ ތަރައްޤީއަށް ހުރަސް އަޅަމުން ގެންދާ ކަމަށް ބުނެ ސަރުކާރުގެ ފަރާތުން ދިޔައީ ވާހަކަ ދައްކަމުންނެވެ. ނަމަވެސް އެންމެ ފުރަތަމަ ދުވަހުން ފެށިގެން ވެސް ކައުންސިލުން ބުނަމުން ދިޔައީ، އައްޑޫގެ ތަރައްޤީއަށް ހުރަސް އަޅަން އެއްވެސް ކަމެއް ކޮށްފައި ނުވާނެ ކަމަށެވެ.
ކައުންސިލުން އައްޑޫގެ ތަރައްޤީއަށް ހުރަސް ނާޅާ ކަމަށް ބުނާއިރު ސަރުކާރުން ވެސް ބުނަނީ ކައުންސިލަށް އެއްބާރުލުން ދޭ ކަމަށެވެ. އެހެން ކަމުން ގޯސްވަނީ ރައްޔިތުން ތާއެވެ.
އައްޑޫ ސިޓީގެ މަގުތަކުގެ މައްސަލަ އަކީ މިހާރު ކުރިމަތިވެފައިވާ އެންމެ ބޮޑު މައްސަލައެވެ. އެ މައްސަލަ ހައްލުކުރުމަށް ކައުންސިލުގެ ފަރާތުން ވެސް މަސައްކަތްތަކެއް ކުރިއެވެ. އެހެން ނަމަވެސް އެދެވޭ ހައްލެއް އެކަމަށް ހޯދާދެވިފައެއް ނުވެއެވެ.ކޮންމެ ފަހަރަކު ވެސް މަގުތައް މަރާމާތު ކުރަން ފަށަނީ، ކޮންމެވެސް ބަޔަކު ޝަކުވާ އުފުލަން ކައުންސިލް އިދާރާއަށް ދިއުމުންނެވެ. ބަޔަކު ޝަކުވާ ނުކުރާ ނަމަ ކައުންސިލަރުންނަށް މަގުތަކުގައި ފެންގަނޑު ހެދިގެން ރައްޔިތުންނަށް ވަމުންދާ އުނދަގޫތަކެއް ނޭނގެއެވެ.
އެއީ ކައުންސިލަރުންނާއި ކައުންސިލްގެ ވާހަކައެވެ. އެމީހުންނަށް އެކަން ނުވީއެވެ. އެވާހަކަ ދެން އިތުރަށް ދެއްކުމުގެ ބޭނުމެއް ނެތެވެ. މިހާރު އެއީ އެމީހުންގެ ޒިންމާއެއް ނޫނެވެ.
ލާމަރުކަޒީ ޤާނޫނަށް ގެނައި އިސްލާޙަކަށް ފަހު އައްޑޫގެ މަގުތަށް ބެލެހެއްޓުމަކީ ހައުސިން މިނިސްޓްރީގެ ޒިންމާއެކެވެ. ހައުސިން މިނިސްޓްރީގެ ގޮތްޕެއް އައްޑޫގައި ހުޅުވީ، ރައްޔިތުންނަށް ދިމާވެފައިވާ ދަތިތައް ހައްލުކޮށްދޭނެ ކަމުގެ ޔަޤީންކަން ދެމުންނެވެ.
ކައުންސިލަށް ހައްލުކޮށް ނުދެވުނު މައްސަލަތައް ހައްލުކޮށްދޭނެ ކަމަށް ބުނަމުން އައި ހައުސިން މިނިސްޓްރީގެ ބޭފުޅުންނަށް ކުރިމަތިވި އެންމެ ފުރަތަމަ އިމްތިޙާނަކީ، އޮގަސްޓު މަހުގެ ފަހުކޮޅު އައްޑޫ އަށް ކުރި ވިއްސާރައެވެ. އައްޑޫގެ އެތައް ގެއެއްގެ ފުރާޅުތައް އެއްލާލުމުގެ ސަބަބުން ބޮޑެތި ގެއްލުންތަކެއް ލިބިގެން ދިޔުމުން އެހީތެރިކަމަށް އެދި ގުޅާލިއިރު ހައުސިން މިނިސްޓްރީގެ އިސްވެރިޔަކު އައްޑޫގައި ނޫޅުއްވައެވެ.
އެ ދުވަހު ކައުންސިލްގެ ފަރާތުން ވަނީ، މާލެ އިން ސަރުކާރުގެ އިދާރާތަކުގެ ހުއްދަ ލިބެންދެން މަޑު ނުކޮށް ކައުންސިލްގެ ބަޖެޓުން ޚަރަދުކޮށްގެން ވިއްސާރައިގައި ގެއްލުން ލިބުނު އާއިލާތަކުގެ މީހުންނަށް އެހީތެރިކަން ފޯރުކޮށްދީފައެވެ. ފަށައިގަންނަ އިރު އެންމެ އެކަށީގެންވާ ޚިދުމަތްތަކެއް ނުދެވުނީ ކަމަށް ބުނެ ހައުސިން މިނިސްޓްރީގެ އައްޑޫ އޮފީހުގައި ތިއްބަވާ ބޭފުޅުން މަސައްކަތް ކުރެއްވީ ޒިންމާ އިން ރެކިވަޑައިގަންނަވާށެވެ.
ދެން އޮތީ އައްޑޫގެ މަގުތަކުގެ ވާހަކައެވެ. ވެލި މަގުތައް މަރާމާތު ކުރުމަށް އެކަށީގެންވާ މަސައްކަތްތަކެއް ކުރެވިގެންދާ މަންޒަރެއް ނުފެނެއެވެ. ވިއްސާރަ މޫސުމުގައި އެމަގުތަކަކީ ފުން "ކަނޑު" ތަކެކެވެ. ވެލި މަގުތައް ބެހެއްޓުމަށް ފަހު ދެން ތާރު އަޅައިގެން ހަދާފައިވާ މަގުތައް ބެލެހެއްޓުމުގައި ވެސް ހައުސިން މިނިސްޓްރީގެ ޒިންމާ އެންމެ ރަގަޅަށް އަދާކުރެވޭ ކަމަށް އައްޑޫގެ ގިނަ ރައްޔިތުން ޤަބޫލެއް ނުކުރެއެވެ.
އެމީހުން ބުނާގޮތުގައި، ހައުސިން މިނިސްޓްރީގެ ކިބައިގައި ޤާބިލްކަމެއް ހުރި ނަމަ ތާރު އަޅައިގެން ހަދާފައިވާ ހިތަދޫގެ ބޮޑު މަގުގައި ވެލި ފުނިތައް ހުންނާކަށް ނުޖެހޭނެ ކަމަށެވެ. ލިންކް ރޯޑް މަރާމާތު ކުރަން ފެށީ ވެސް މާލަހުން ކަމަށް ގިނަ ބަޔަކު ޤަބޫލު ކުރެއެވެ. ހައުސިން މިނިސްޓްރީގެ ފަރާތުން ލިންކް ރޯޑް މަރާމާތު ކުރުމުގެ މަސައްކަތް އެމްއާރްޑީސީ އާއި ހަވާލުކޮށްގެން ވަނީ ކޮށްފައެވެ.
'އައްޑޫލައިވް' އަށް މައުލޫމާތު ދެމުން ހައުސިން މިނިސްޓްރީގެ އޮފިޝަލަކު ވިދާޅުވި ގޮތުގައި މާލޭ އެކޭ އެއްގޮތަށް އައްޑޫގައި ވެސް އާންމު ޚިދުމަތްތަކާއި ބެހޭ ޔުނިޓެއް ޤާއިމްކުރުމުގެ މަސައްކަތް މިހާރު ކުރަމުންދާ ކަމަށެވެ. އޭނާ ވިދާޅުވި ގޮތުގައި އެ ޔުނިޓް ޤާއިމްކުރުމުން އައްޑޫގެ މަގުތައް ބެލެހެއްޓުމުގެ ކަންތައް އިތުރަށް ހަރުދަނާ ވެގެން ދާނެ ކަމަށެވެ.
އޮފިޝަލް ވިދާޅުވި ގޮތުގައި، އާންމު ޙިދުމަތްތަކާއި ބެހޭ ޔުނިޓް ޤާއިމްކުރުމަށް ހަމަޖެހިފައިވަނީ ފޭދޫ ގައެވެ. އެ ޔުނިޓް ޤާއިމްކުރެވިގެންދާއިރު، މަގުތައް މަރާމާތުކުރުމަށް ބޭނުންވާ ވެހިކަލްތައް ވަރަށް އަވަހަށް އައްޑޫއަށް ގެނައުމުގެ މަސައްކަތް ކުރެވެމުން ދާކަމަށް ވެސް އޮފިޝަލް ވިދާޅުވިއެވެ.
ހައުސިން މިނިސްޓްރީގެ އޮފީހެއް އައްޑޫގައި ހުޅުވިފަހުން ފާއިތުވި 80 ދުވަހުގެ ތެރޭގައި އައްޑޫގައި ހުރި މައްސަލަތައް ހައްލުކުރުމަށް އެންމެ އެކަށީގެންވާ ގޮތެއްގައި މަސައްކަތް ނުކުރެވޭ ކަމަށް 'އައްޑޫލައިވް' އާއި ވާހަކަ ދެއްކި އޮފިޝަލް ވެސް ޤަބޫލުކުރައްވައެވެ.
" 80 ދުވަސް ފުދޭވަރަކަށް ގިނަ ދުވަސް. އެންމެ އެކަށީގެންވާ ގޮތެއްގައި ބައެއް ކަންކަން ފަށައި ނުގަނެވޭ. އެހެން ނަމަވެސް ކުރިއަށް އޮތީ ނަތީޖާ ފެންނަން ފަށާނެ ދުވަސްތަކެއް" އޮފިޝަލް ވިދާޅުވިއެވެ.
މައްސަލަތައް ހައްލުކޮށްދޭން އައި ބޭފުޅުންނަށް ތައްޔާރުވާން 80 ދުވަހަކީ މާ ދިގު މުއްދަތެއް ކަމަށް އައްޑޫގެ ރައްޔިތުން ޤަބޫލުކުރެެއެވެ. ކައުންސިލަކަށް ހައްލުކޮށް ނުދެވުނެވެ. އައްޑޫ ރައްޔިތުން ތިބީ ހައުސިން މިނިސްޓްރީގެ ބޭފުޅުންނަށް ވެސް މައްސަލަތައް ހައްލުކޮށް ދެވޭތޯ ބަލާށެވެ. ރައްޔިތުން ބޭނުންވަނީ ކަންތައް ކުރާނެ ކަމަށް ބުނާ ވާހަކަ އަޑުއަހާކަށް ނޫނެވެ. ކަންތައް ކުރެވިގެންދާތަން ބަލާށެވެ.