ޕްރޮސެކިއުޓަރ ޖެނެރަލް މުހުތާޒް މުހުސިން ގެނައުމަށް އެންމެ ބޮޑަށް ބާރު އެޅުއްވި އެއްބޭފުޅަކީ، ކުރީގެ ނައިބު ރައީސް އަޙްމަދު އަދީބެވެ. ޕީޕީއެމްގެ ރައީސް ކަމުގައި ހުންނެވި މައުމޫންގެ ނުރުހުމުގައި ޕީޖީގެ މަޤާމަށް މުހްތާޒް މުހުސިން ގެނެސްފައިވަނީ، ސީދާ ނައިބު ރައީސް އަހްމަދް އަދީބު ޚަރަދުކޮށްގެން ކަމަށް ސިޔާސީ ފަރާތްތަކުން އޭރު ތުހުމަތު ކުރިއެވެ.
ޕީޖީ ކަމަށް އައްޔަންކުރުމަށް ފަހު މުހުތާޒު މުހުސިންގެ ފަރާތުން ފެނިގެން ދިޔައީ ހަރުކަށި ކަމާއި، އެކު ސަރުކާރާއި އިދިކޮޅު ފަރާތްތަކަށް ރައްދު ދެއްވަމުން ގެންދެވި މަންޒަރެވެ. ޖުމްހޫރީ ޕާޓީގެ ލީޑަރ ޤާސިމް އިބްރާހިމް ޤާނޫނު އަސާސީގެ ޚިލާފުވެއްޖެ ކަމަށް ބުނެ ވާހަކަ ދެއްކަވައި، އެނޫން ވެސް ތަފާތު އެކި ކަންކަމުގައި ސިޔާސީ ބޭފުޅުންނަށް ބަހުގެ ޙަމަލާތައް ދެއްވަމުން ގެންދެވިއެވެ.
އެހެން ނަމަވެސް، ފާއިތުވި ސެޕްޓެމްބަރު މަހުގެ 28 ވަނަ ދުވަހު ރައީސުލްޖުމްހޫރިއްޔާގެ ލޯންޗްކޮޅުގައި އެއްޗެއް ގޮއްވާލި ހާދިސާއަށް ފަހު ޕީޖީ މުހުތާޒްގެ ކިބައިން އެ ހަރުކަށިކަން ފެނިގެން ގޮސްފައެއް ނުވެއެވެ. އަދި ވަކިން ޙާއްސަގޮތެއްގައި ލޯންޗްކޮޅުގެ ހާދިސާގެ ތުހުމަތަށް އަދީބް ހައްޔަރުކުރެވުނު ހިސާބުން ޕީޖީ މުހުތާޒް ކިޔާ ބޭފުޅަކު މި ރާއްޖޭގައި ހުންނަވާ ހެން "ހީވެސްނުވާ" ހިސާބަށް ދިޔައެވެ.
ޕީޖީ މުހުތާޒުގެ ވާހަކަ މީޑިޔާތަކަށް ތިލަވެގެން ދިޔައީ، އަދީބުގެ މައްސަލަތަކެއް ދައުވާ ކުރުމަށް ޕީޖީ އޮފީހަށް ފޮނުވުމުން، ބައެއް ކަންކަން ފުރިހަމަ ކުރުމަށް ކަމަށް ބުނެ އަނބުރާ ޕޮލިހަށް ފޮނުވާލި ހިސާބުންނެވެ. މައްސަލަ އަނބުރާ ފޮނުވާލުމާއި އެކު ސަރުކާރުގެ އިސްވެރިންގެ މެދުގައި ޕީޖީ މުހުތާޒް އާއި މެދު ރުޅިވެރިކަން އުފެދި މިއަދު މިވަނީ މަޖިލީހުގައި އެބޭފުޅާގެ މަޤާމުން ވަކިކުރުމުގެ މަސައްކަތް ފަށާފައެވެ.
ޕީޖީ މުހުތާޒްގެ އެ މަޤާމުން ވަކިކުރާނެ ކަން ކަށަވަރުވެފައިވާއިރު ރިޔާސީ ލޯންޗްކޮޅުގައި އެއްޗެއް ގޮއްވާލުމުގެ ތުހުމަތުގައި މިހާރު ފުލުހުންގެ ބަންދުގައި ހުރި އަދީބާއި މުހުތާޒަކީ ވަރަށް ގާތް ދެ ބޭފުޅުން ކަމަށް އަޑު ފެތުރިފައި ވެއެވެ.
ފުލުހުންގެ ބަޔަކަށް އަދީބު ރިޝްވަތު ދިން މައްސަލަ އާއި އަދީބުގެ އެޕާޓްމެންޓުން ފިސްތޯލައެއް ފެނުނު ކަމަށް ބުނާ މައްސަލަ ތަހުގީގުކުރުމަށް ފަހު ދައުވާކޮށްދިނުމަށް ޕީޖީ އޮފީހަށް ހުށަހެޅުމުން އެ މައްސަލަ އަނބުރާ ފޮނުވާލި މައްސަލަ އާއި ގުޅިގެން ޕީޖީގެ މައްސަލަ މަޖިލީހަށް ހުށަހެޅުމަކީ ހައިރާންވާން ޖެހޭ ކަމެއް ނޫނެވެ.މިއަދު މުހުތާޒު އަދާކުރެއްވީ އޭނާ ޕީޖީގެ މަޤާމަށް ގެނެސް އަދާކުރުމަށް ހަވާލުކުރި 'ހަޤީޤީ' ވަޒީފާއެވެ.
މިއަދު ޕީޖީ ސާބިތުކޮށްދެއްވީ އެބޭފުޅާ އަކީ ސީދާ އަދީބު ހިމާޔަތް ކުރެއްވުމަށް އެ މަޤާމަށް ގެނެސްފައި ހުރި ބޭފުޅެއް ކަމެވެ. އަދީބު ނައިބު ރައީސް ކަމުން ވަކިކުރުމަށް ފަހު ޕީޖީ ކަމުން މުހުތާޒު ވަކިކުރުމަކީ، ހައިރާން ވާން ޖެހޭ ކަމެއް ނޫނެވެ.