ދިވެހިރާއްޖޭގެ ޖުމްހޫރީ ދުވަހުގެ ރަސްމިއްޔާތުގައި ބޭއްވި ޙަފްލާގައި، ޝަރަފްވެރިކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު 22 ބޭފުޅަކަށް ދއްވާފައިވާއިރު، އޭގެ ތެރެއިން ނޫސްވެރިކަމުގެ ގައުމީ އިނާމް ލިބިވަޑައިގެންނެވި އެއް ބޭފުޅަކީ، ސަން މީޑިޔާ ގްރޫޕްގެ ސީއީއޯ، ސިނާން އަލީ އެވެ.
ރޭގެ ހަފްލާގައި ސިނާން އަށް ނޫސްވެރިކަމުގެ ދާއިރާއިން ޤައުމީ އިނާމް ދިނުމަކީ ރާއްޖޭގައި ބޮޑެތި ކުށްތައް ކުރާ ފަރާތްތަކަށް ސަރުކާރުން ހިތްވަރުދެއްވާ ކަމުގެ ނިޝާނެއްގެ ގޮތުގައި ސިފަކުރެވިދާނެ ކަމެކެވެ. އެބޭފުޅާގެ މައްޗަށް ކުރެވިފައިވަނީ އާދައިގެ ތުހުމަތުތަކެއް ނޫނެވެ. ބަދުއަޚުލާޤީ ޢަމަލް ހިންގުމުގެ ތުހުމަތެވެ.
ވަޒީފާދޭނެ ކަމަށް ބުނެ އެކި ފަހަރު މަތިން އަންހެން ކުދިން އޮފީހަށް ގެންގޮސް އެ ކުދިންނާ އެކު، ސިނާން އަލީ ބަދުއަހުލާގީ އަމަލު ހިންގާފައިވާ ކަމަށް ތުހުމަތު ކުރެވޭ މައްސަލަ، ފުލުހުން ވަނީ ތަހުގީގް ކުރުމަަށް ފަހު 2013 ވަނަ އަހަރު ޕީޖީ އޮފީހަށް ފޮނުވާފައެވެ. ނަމަވެސް އެ މައްސަލަ ކޯޓަށް ފޮނުވި ކަމެއް ނުވަތަ ނޫންކަމެއް އަދި ވަނީ ސާފުވާގޮތް ނުވެފައެވެ.
މީގެ އިތުރުން އަޚުލާޤީ ގޮތުން ދަށް ފެންވަރުގެ ޢަމަލުތަކެއް ސިނާން ހިންގަވަނިކޮށް ނަގާފައިވާ ފޮޓޯތަކެއް ސޯޝަލް މީޑިޔާގައި ވެސް މީގެ ކުރިން ވަނީ އާންމުވެފައެވެ.
ދިވެހިރާއްޖޭގައި ސިނާން އަލީގެ އިތުރުން ވެސް ތަޖުރިބާކާރު އަދި ކާމިޔާބު ނޫސްވެރިން އެބަތިއްބެވިއެވެ. 'ހަވީރު' ނޫހާއި 'މިއަދު' ނޫސް އަދި އެހެނިހެން ޓީވީ ޗެނަލްތަކުގައި ވެސް ތަޖުރިބާކާރު ނޫސްވެރިން އެބަތިއްބެވިއެވެ. އެ ބޭފުޅުން ކުރައްވާ މަސައްކަތުގެ އަގު ސަރުކާރުން ވަޒަން ނުކުރުމަކީ، ވަރަށް ދެރަކަމެކެވެ.
ރޭގެ ޙަފްލާގައި 'ހަވީރު' ނޫހުގެ އެސިސްޓެންޓް އެޑިޓަރ ކަމުގައި ހުންނެވި، ހަމްދޫން އަށް ނޫސްވެރިކަމުގެ ޤައުމީ އިނާމު ލިބުމުން ހުރިހާ ފިކުރެއްގެ ބޭފުޅުން ވެސް ގެންދަނީ އެބޭފުޅާއަށް ތައުރީފު ކުރައްވަމުންނެވެ. ސަބަބަކީ ނޫސްވެރިކަން ކުރެއްވުމުގައި ހަމްދޫންގެ އަޚުލާޤެވެ.
ސިނާން އަށް ގިނަ ބަޔަކު ސޯޝަލް މީޑިޔާގައި ވެސް ފާޑުކިޔަމުން ދަނީ، ކޮންމެހެން ޒާތީވެގެން ނޫންކަން ޚުދު ސިނާން އަށް ވެސް އެނގިލައްވާނެއެވެ. އަޚްލާޤީ ގޮތުން ދަށްފެންވަރުގެ ޢަމަލެއް ހިންގަވަނިކޮށް ނަގާފައިވާ ފޮޓޯތައް އަދިވެސް އެގެންދަނީ، ސޯޝަލް މީޑިޔާގައި ދައުރުވަމުންނެވެ.
ސުވާލަކީ ސިނާން އަށް އިނާމް ދެއްވުމުގެ ކުރިން އެފަދަ މައްސަލަތަކެއް ހުރިކަން ސަރުކާރަށް ނޭނގުނީ ހެއްޔެވެ؟ ނުވަތަ ސިނާން ސީއީއޯ ކަން ކުރައްވާ، ސަން މީޑީޔާ ގްރޫޕްގެ ވެރިޔާ ސަންޓްރެވެލް ސިޔާމުގެ ނުފޫޒުން ލިބުނު އިނާމެއް ހެއްޔެވެ؟
ކޮންމެ ގޮތެއް ވިޔަސް ބަދުއަޚުލާޤީ ޢަމަލުތައް ހިންގިކަމުގެ މައްސަލަ ޕީޖީއަށް ފޮނުވިފައިވަނިކޮށް އެބޭފުޅާއަށް، ނޫސްވެރިކަމުގެ ޤައުމީ އިނާމު ދިނުމަކީ ރާއްޖޭގައި ތިއްބެވި ނޫސްވެރިންގެ މޫނު މަތީގައި ޖެހި ވަރުގަދަ އެތިފަހަރެކެވެ. ސަރުކާރުގެ ފަރާތުން ނޫސްވެރިންނަށް ކުރި މަލާމާތެއް ކަން ޔަޤީނެވެ.