ރިޔާސީ ލޯންޗުކޮޅުގައި އެއްޗެއް ގޮވި ހާދިސާއާ ގުޅިގެން ކުރަމުން އަންނަ ތަހުގީގަށް، ދާދި ފަހުން އައްޑޫ ސިޓީ، ހިތަދޫގެ ގެއެއް ބަލައި ފާސްކޮށްފައިވަނީ، ބ. ހިބަޅިދޫ އިން ފެނުނު ހަތިޔާރުތަކުގެ މައްސަލަ އާއި ގުޅިގެން ކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ރިސޯޓެއްގެ ގޮތުގައި ތަރައްޤީކުރަމުން އަންނަ ހިބަޅިދޫގައި މަސައްކަތް ކުރަމުން ދިޔަ މީހުން ފުލުހުންގެ ބެލުމުގެ ދަށުގައި ތިބިއިރު އޭގެ ތެރޭގައި ހިތަދޫ އަށް ނިސްބަތްވާ 2 މީހަކު ހިމެނެއެވެ. އަދި ހިތަދޫ އިން ބަލާ ފާސްކޮށްފައިވަނީ އެ ދެމީހުންގެ ގެ އެވެ.
އަދި ފުލުހުންގެ ބަލުމުގެ ދަށުގައި ތިބި ހިތަދޫ 2 މީހުންގެ ތެެރެއިން އެކަކީ، ހިބަޅިދޫ އިން ފެނުނު ހަތިޔާރާއި އެންމެ ބޮޑަށް ގުޅުން ހުރި މީހެއް ކަމަށް ފުލުހުން ހާމަކޮށްފައިވާ، މުހައްމަދު އައްލާމް ލަތީފު (މޮހޯ) އާއި ގާތް ގުޅުމެއް އޮންނަ ފަރާތެއް ކަމަށް ވެއެވެ.
ހިބަޅިދޫ ދޫކޮށްފައިވަނީ ބިޒިނަސް މޯލްޑިވްސް ނަމަކަށް ކިޔާ ކުންފުންޏަކަށެވެ. އެ ކުންފުނީގައި ހަތަރު ހިއްސާދާރުން ތިބި އިރު އެ ކުންފުނީގައި މޮހޯގެ 30 އިންސައްތަ ހިއްސާ އޮވެއެވެ.
ސިފައިންނާއި ފުލުހުން ގުޅިގެން ކުރިއަށް ގެންދިޔަ އޮޕަރޭޝަނެއްގައި ހިބަޅިދޫ ނެރާ ދިމާލުން 45 މީޓަރު އަޑިން ގިނަ އަދަދެއްގެ ހަތިޔާރާއި ގޮވާ ތަކެތިވަނީ ހޯދާފައެވެ.