އައްޑޫ ސިޓީ، ހިތަދޫ ޒުވާނުންގެ ތެރެއިން ގިނަ ބަޔަކު ކޮންމެ ދުވަހަކުވެސް ކުޅެންދާ ދަނޑަކީ، ހިތަދޫ ރަސްމީ ފުޓްބޯޅަ ދަނޑެވެ. ނަމަވެސް މިހާރު އެމީހުން ތިބީ ކުޅެންދާނެ ދަނޑެއް ނެތިގެން ކަންބޮޑުވެފައެވެ. މިނިވަން50 ފުޓްބޯޅަ މުބާރާތަށް ހިތަދޫ ރަސްމީ ފުޓްބޯޅަ ދަނޑު ތަރައްޤީ ކުރުމުގެ މަސައްކަތް، އެމްއާރްޑީސީ އިން ފެށިނަމަވެސް ވަކި ހިސާބަކުން އެ މަސައްކަތް ހުއްޓުނީ އެވެ.
އެ މުބާރާތުގައި ވާދަކުރާ ހިތަދޫ ޓީމު އަމިއްލަ ދަނޑުގައި ކުޅެންޖެހޭ މެޗްތައް ވެސް ކުޅެން ދާންޖެހެނީ، ރަށުން ބޭރަށެވެ. އެކަމާއި ގުޅިގެން ހިތަދޫ ޓީމުން ކަންބޮޑުވުން ފާޅުކޮށް މިނިވަން50 އޮފީހަށް މައްސަލަ ހުށަހެޅިއެވެ. ނަމަވެސް އެ ޝަކުވާތަކަށް މިނިވަން50 އޮފީހުން ވަކި ޖަވާބެއް ދީފައެއް ނުވެއެވެ.
'އައްޑޫލައިވް' އާއި ވާހަކަ ދެއްކި ޒުވާނަކު ބުނި ގޮތުގައި، މީގެ ކުރިން އޮތްގޮތަށް ރަސްމީ ދަނޑު އޮތްނަމަ މާ ރަގަޅު ކަމަށެވެ.
" އަހަރުމެންނަށް މާ ރަގަޅު ކުރިން އޮތްގޮތަށް ބޭއްވި ނަމަ. ތަރައްޤީ ކުރަންށޭ ކިޔާފައި މިހާރު އެތާކު ކުޅެވޭނެ ގޮތެއް ވެސް އޮތީ އެއް ނޫން. ވެލި ފުނިތައް ޖަހާފައި މުޅި ދަނޑު ހަލާކުކޮށްފައި އެއޮތީ." ހިތަދޫ ޒުވާނަކު ބުންޏެވެ.
ރަސްމީ ދަނޑުގައި ކުޅެވޭނެ ގޮތެއް ނެތުމުން ޒުވާނުން އަމިއްލައަށް އިސްނަގައިގެން ހިތަދޫގެ އެހެން ސަރަހައްދެއްގައި އޮތް ހުސްބިމެއް ސާފުކޮށްގެން އެތަނުގައި ކުޅެން ފެށިއެވެ. ނަމަވެސް މިހާރު އެތަނުގައި ކައުންސިލްގެ ފަރާތުން ޕާކެއް ހެދުމަށް ބޭނުން ވެގެން އެ ބިމުގައި މަސައްކަތް ފަށާފައި ވާތީ، އަނެއްކާ ވެސް އެހެން ގޮތެއް ހޯދަން އެމީހުންނަށް ވަނީ މަޖުބޫރުވެފައެވެ.
" މީގެ އެންމެ ހެއްވާ ތަންކޮޅަކީ، އަހަރުމެން އަމިއްލައަށް ތަނެއް ސާފުކޮށްގެން ކުޅެން ފަށާއިރަށް އެ ބިމެއް މިވަނީ ރަނަށް. އެތަނުގައި ޕާކް ވެސް ހަދަންވީ."
އައްޑޫ ސިޓީ ކައުންސިލްގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި އެ ސަރަހައްދުގައި، މާރުކޭޓެއް ހެދުމުގެ މަސައްކަތަކީ މާ ކުރިން ޕްލޭން ކުރެވިފައިވާ މަސައްކަތެއް ކަމަށާއި އެކަން ފެށީ ޒުވާނުންނަށް އުނދަގޫ ކުރަން ނޫން ކަމަށެވެ.
ހިތަދޫގައި ޒުވާނުން ކުޅެންދާނެ ދަނޑެއް ނެތިގެން ކަންބޮޑުވުން ފާޅުކުރަމުންދާއިރު، ހިތަދޫގައި ހުންނަ ސްޓޭޑިއަމް ބޭނުން ކުރެވެނީ ހަމައެކަނި މުބާރާތްތަކުގެ މެޗްތައް ކުޅުމަށް ކަން ފާހަގަކޮށްލެވެއެވެ. އަދި ޓާފް ދަނޑު ވެސް ބޭނުން ކުރެވެނީ ވަކި ހާއްސަ ހުއްދަތަކެއް ނަގައިގެންނެވެ. މައުލޫމާތު ލިބިފައިވާ ގޮތުގައި މިހާރު ޓާފް ދަނޑު ވަނީ އިންޓަރ ސްކޫލް މުބާރާތުގެ ބޭނުމަށް ދޫކޮށްފައެވެ.
ހިތަދޫގެ އެހެން ހިސާބުތަކުގައި ހުރި ދަނޑުތައް ވެސް ތަރައްޤީކުރުމުގެ މަސައްކަތްތައް ފެށިތާ ގިނަ ދުވަސްވެފައިވާ އިރު އެ މަސައްކަތް އަދިވެސް ނިންމާލެވިފައެއް ނުވެއެވެ. މިކަމާއި ގުޅިގެން ހިތަދޫ ޒުވާނުން ވަނީ އެމީހުންގެ ކަންބޮޑުވުންތައް ހިއްސާކުރުމަށް ކައުންސިލަރުންގެ އެހީތެރިކަމަށް ވެސް އެދިފައެވެ.
"އަޅުގަނޑު ގުޅިން ކައުންސިލަރ ހުސައިން އަށް. އެބޭފުޅާ ފޯނަށް ޖަވާބެއް ނުދެއްވާ. މިއީ ކަންތައް ހުންނަ ގޮތަކީ. ކީކޭ ބުނާނީ" ދަނޑުތަކުގެ މައްސަލައިގައި މާޔޫސްވެފައި ހުރި ހިތަދޫގެ ޒުވާނަކު ބުންޏެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި، ހިތަދޫ ރަސްމީދަނޑު ތަރައްޤީ ކުރުމުގެ މަސައްކަތް ހަވާލުކޮށްފައިވަނީ އެމްއާރްޑީސީ އާއި އެވެ. ނަމަވެސް އެމްއާރްޑީސީ އިން އެ މަސައްކަތް ކޮށްދޭން ހުށަހެޅި އަގު މާބޮޑު ވުމާއި ގުޅިގެން އުފެދުނު ދެބަސްވުންތަކެއްގެ ސަބަބުން މިހާރު އެ މަސައްކަތް ވަނީ މެދުކެނޑިފައެވެ.
މަސައްކަތް މެދު ކަނޑާލި އިރު ރަސްމީ ދަނޑުގެ އެކި ހިސާބުތަކުގައި ވެލި ފުނިތައް ހުރުމުގެ ސަބަބުން އެއްގޮތަކަށް ވެސް އެދަނޑު ބޭނުން ކުރެވޭ ގޮތެއް ނުވެއެވެ.