ބުރުޖު ކުނިބުނި ނުވަތަ 'ސްޕޭސް ޖަންކްސް'ގެ ތެރެއިން “WTF"ގެ ނަން ދެވިފައިވާ އާދަޔާ ޚިލާފު ގޮތްނޭނގޭ އެއްޗެއް 13 ނޮވެމްބަރު 2015 ވާ ހުކުރު ދުވަހު ލަންކާ ގަޑިން ހެނދުނު 11:48 ކަންހާއިރު ދުނިޔެއަށް ވެއްޓޭނެ ކަމަށް ސައިންސްވެރިން ހާމަކުރުމާއި އެކު ގިނަ ބައެއްގެ ސަމާލުކަން އެކަމަށް ހުއްޓިގެން ދިޔައެވެ.
ޑަބްލިއުޓީއެފް ދުނިޔެއަށް ވެއްޓޭ މަންޒަރު ބެލުމަށް، ކެތްތެރިކަމެއް ނެތި އިންތިޒާރު ކުރި އެތައް ބަޔަކު ވަނީ، އޭގެ އެއްވެސް ހިލަމެއް ނުވިކަމަށް ބުނެ ސޯޝަލް މީޑިއާގައި ސައިންސްވެރިންނަށް ފާޑުކިޔުމަށްފަހު ޕޯސްޓްތައް ކޮށްފައެވެ. ނަމަވެސް ޑަބްލިއުޓީއެފް ވެއްޓޭނެކަމަށް ސައިންސްވެރިން ލަފާކޮށްފައިވާ ވަގުތު، ބާރުގަދަ އަޑުފައްގަނޑެއް އިވުނުކަމަށް ލަންކާގެ ބައެއް އާންމުން ބުނެފައިވާ ކަމަށް ވެސް ލަންކާގެ ބައެއް މީޑިޔާތަކުން ރިޕޯޓްކޮށްފައިވީ ނަމަވެސް އެވާހަކަތައް ރަސްމީ އެއްވެސް އިދާރާއަކުން ކަށަވަރުކޮށްދީފައެއް ނުވެއެވެ.
ރޭ އައްޑޫ ސިޓީގެ ބައެއް ރައްޔިތުންނަށް ވަނީ، "ސްޕޭސް ޖަންކް" ކަމަށް ބެލެވޭ އެއްޗެއް ވެއްޓޭ މަންޒަރު ފެނިފައެވެ. 'އައްޑޫލައިވް' އާއި ވާހަކަ ދެއްކި ފޭދޫ ޒުވާނަކު ބުނި ގޮތުގައި. އަލިގުޅަތަކެއް ކަހަލަ އެއްޗެއް ވެއްޓުނުތަން ފެނިފައިވާ ކަމަށެވެ.
" ފުރަތަމަ ހީކުރީ ފްލައިޓެއް ގޮވައިގެން ވެއްޓެނީ ކަމަށް. އެކަމަކު އެހެނެއް ނޫން ވީކީ. ހަމަ އަލިގުޅަތަކެއް ފައިބަމުން ދިޔައީ. އަޅުގަނޑު ހަމަ ގައިމުވެސް ދެކުނިން 2 އަލިގުޅަ" ފޭދޫ ބަނދަރުމަތީގައި ހުންނަ ރެސްޓޯރެންޓެއްގައި މަސައްކަތް ކުރާ ޒުވާނާ ބުންޏެވެ.
ބައެއް މީހުން އަލިގުޅަ ކަމަށް ބެލެވޭ ތިން އެތިކޮޅެއް ފެނިފައިވާ ކަމަށް ބުނެފައިވާ އިރު އެހެން މީހުންނަށް 4 އަލިގުޅަ ފެނުނު ކަމަށް ވެސް ވާހަކަ ދެކެވެއެވެ. އަލިގުޅަ ވެއްޓެމުން ދިޔަ މަންޒަރު ބައެއް މީހުން ފޮޓޯ ނަގާފައިވާއިރު އެ ފޮޓޯތަކުން ފެންނަނީ އެންމެ އަލިގުޅަ އެކެވެ.
ފޭދޫ ފާލަން މަތީގައި މަސްބާނަން ހުރި މުހައްމަދު ދީދީ ވެސް ވަނީ އޭނާއަށް އެ އަލިގުޅަތައް ފެނުނު ގޮތް 'އައްޑޫލައިވް' އާއި ހިއްސާކޮށްފައެވެ.
"ފުރަތަމަ ހީކުރީ ސެޓެލައިޓެއް ކަމަށް އެކަމަކު ސެޓެލައިޓު އެހާތިރިން ނުދާނެ. ރަތް ކުލައިގަ ހުރީ ބޮޑަށް ބެލެވެނީ އަލިފާން ބޯޅައެއް ގޮތަށް. އެކަމަކު މީގެ ކުރިން ނުދެކެން އެގޮތަށް ވެއްޓުނު އެއްޗެއް" މުހައްމަދު ދީދީ ބުންޏެވެ.
އަސްލުވީ ކިހިނެތް ؟
ކޮންމެ އަކަސް ސައިންސްވެރިން ލަފާކޮށްފައި އޮތީ، "ސްޕޭސް ޖަންކް" ވެއްޓޭނީ ސްރީލަންކާ އާއި ކައިރި ހިސާބަކަށް ކަމަށެވެ. ނަމަވެސް ސްރީލަންކާ އާއި މާ ދުރުގައި އޮތް އައްޑޫ ސިޓީއާއި ދިމާލަށް ވެއްޓުނީ "ސްޕޭސް ޖަންކް" ކަމަކަށް ނުބެލެވެއެވެ. އެއީ "ސްޕޭސް ޖަންކް" ނޫން ނަމަ އެއީ ދެން ކޯޗެއް ހެއްޔެވެ؟
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ރޭ މަރަދޫގައި ކުޅުނު ފުޓްބޯޅަ މެޗަކަށް ފަހު ޒުވާނުންތަކެއް ވަނީ، ލެންޓާންސް ތަކެއް އަރުވާފައެވެ. ފޭދޫގެ މީހުންނަށް ފެނިގެން އެ އުޅޭ އަލިގުޅަ އަކީ އެއީ އެވެ. މަރަދޫގައި ލެންޓާންސް ތައް އެރުވި ޒުވާނުން ވަނީ އެކަން 'އައްޑޫލައިވް' އަށް ކަށަވަރުކޮށްދީފައެވެ.
" އަހަރުމެން އެރުވި ލެންޓާންސް ތަކެއް އެއީ. އޭތި ވެއްޓުނު ވަގުތު ފެނިގެން އަލިގުޅަ އެކޭ އެކިޔަނީ. " 'އައްޑޫލައިވް' އާއި ވާހަކަ ދެއްކި ފަރާތުން ބުންޏެވެ.