ރައްޔިތުންގެ މަޖިލީހުން އިތުބާރު ނެތްކަމަށް ފާސްކޮށް މަޤާމުން ވަކިކޮށްފައިވާ، ކުރީގެ ޕްރޮސިކިއުޓާ ޖެނެރަލް މުހުތާޒް މުހުސިންގެ ޕާސްޕޯޓް ހިފަހައްޓާފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.ެ.
ސަރުކާރުގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި، މުހުތާޒްގެ ޕާސްޕޯޓް ހިފަހައްޓާފައި ވަނީ ބަލަމުން ގެންދާ މައްސަލަ އަކާއި ގުޅިގެން ކަމަށެވެ. ނަމަވެސް ބަލަމުން ގެންދަނީ މުހުތާޒް އާއި ގުޅުން ހުރި ކޮން މައްސަލައެއް ކަމެއް އޮފިޝަލް ހާމައެއް ނުކުރެއެވެ.
ރައްޔިތުންގެ މަޖިލީހުގެ ކޮމިޓީއަށް ހާޒިރު ކުރުމަށް ފަހު އެބޭފުޅާގެ މައްޗަށް "ބޮޑު ތިން ތުހުމަތެއް" ކޮށްފައިވާ ކަމަށް މުހުތާޒް ވަނީ މީޑިޔާގައި ވިދާޅުވެފައެވެ. މީގެ އިތުރުން މަޖިލީހުން އެބޭފުޅާގެ އިތުބާރު ނެތްކަމުގެ ވޯޓު މަޖިލީހުން ނަގާފައި ވަނީ، ޖަވާބުދާރީ ވުމަށް އެކަށީގެންވާ ފުރުސަތު ނުދީ ކަމަށް ބުނެ އެކަމާއި މުހުތާޒް ވަނީ ކަންބޮޑުވުން ފާޅުކޮށްފައެވެ.
މުހުތާޒް މުހުސިން އަކީ، ރައީސުލްޖުމްހޫރިއްޔާގެ ލޯންޗްކޮޅުގައި ހިނގި ހާދިސާ އާއި ގުޅިގެން ހައްޔަރުކޮށްފައިވާ ކުރީގެ ނައިބް ރައީސް އަދީބު އާއި ގާތްގުޅުމެއް އޮންނަ ފަރާތެއް ކަމަށް ސިޔާސީ ބައެއް ފަރާތްތަކުން ތުހުމަތުކުރެއެވެ. މީގެ އިތުރުން ކުރީގެ ރައީސް މުޙައްމަދު ނަޝީދުގެ މައްޗަށް ކުރިން ކޮށްފައިވާ ދައުވާ އަށް ބަދަލު ގެނެސް އެމަނިކުފާނުގެ މައްޗަށް ޓެރަރިޒަމްގެ ދަޢުވާ އުފުލުމަށް ނިންމާފައިވަނީ މުހުތާޒް ޕީޖީ ކަމުގައި ހުންނަވައިގެންނެވެ.