ރައްޔިތުންގެ މަޖިލިސްގެ ހިތަދޫ އުތުރު ދާއިރާއަށް ޕީޕީއެމްގެ ފަރާތުން ވާދަކޮށް ނާކާމިޔާބްވި ގާނޫނީ ވަކީލް އަލީ އިބްރާހިމް ފުލުހުން ބަލަމުންދާ މައްސަލައަކާއި ގުޅިގެން ރާއްޖޭގެ ކޯޓު ތަކުގައި ވަކާލާތު ނުކުރެވޭ ގޮތަށް ސަސްޕެންޑް ކޮށްފިއެވެ.
ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން އިން ބުނީ ސ. ހިތަދޫ ބޯށިވަލުގޭ އަލީ އިބްރާހިމް އާއި ގާނޫނީ ވަކީލް އަލީ ޝާހްއަށް ކޯޓުތަކުގައި ވަކާލާތުކުރުން ވަގުތީގޮތުން މަނާކުރީ ފުލުހުން ތަހުގީގު ކުރަމުންގެންދާ މައްސަލައަކާ ގުޅިގެން، އެ މައްސަލައިގައި ވަކިގޮތެއް ކަނޑައަޅަންދެން ކަމަށެވެ.
"އައްޑޫލައިވް"އަށް އެނގިފައިވާ ގޮތުގައި މި ދެވަކީލުން މަސައްކަތް ކުރައްވަމުން ގެނަދަވަނީ ބ. ހިބަޅިދޫން ހަތިޔާރު ފެނުނު މައްސަލާގައި ހައްޔަރުގައި ބަހައްޓާފައި ތިބި ދެމީހުންގެ ދިފާއުގައިއެވެ. ބ. ހިބަޅިދޫން ހައްޔަރު ކުރި މީހުންގެ ތެރޭގައި އެރަށުގެ ޕްރޮޖެކްޓް މަސައްކަތް ކުރަމުން ދިޔަ ހިތަދޫ މީހަކު ހައްޔަރުކޮށްފައިވާ ކަމަށް މައުލޫމާތު ލިބިފައިވެއެވެ.
އަލީ އިބްރާހިމް އާއި އަލީ ޝާހް ކޯޓުތަކުގައި ވަކާލާތު ކުރުމުން ސަސްޕެންޑް ކުރި އިރު ކުރީގެ ނައިބް ރައީސް އަހްމަދު އަދީބްގެ ތިން ވަކީލުންވެސް ވަނީ ސްޕްރީމް ކޯޓުން ސަސްޕެންޑް ކޮށްފައެވެ. އެގޮތުން އެންމެ ފަހުން ސަސްޕެންޑް ކޮށްފައިވަނީ ނައިބް ރައީސް އަދީބްގެ 3 ވަނަ ވަކީލް ކަމަށްވާ ސ. މީދޫ ދޮންދީދީ މަންޒިލް އަހްމަދު ޠޯލިބްއެވެ.