2011 ވަނަ އަހަރުގެ ސާކް ސަމިޓަށް އައްޑޫ ސިޓީގައި ބިނާކުރި، އިކުއިޓޯރިއަލް ކޮންވެންޝަން ސެންޓަރ (އީސީސީ) ވީރާނާ ވަމުން ދަނީ، އައްޑޫ ސިޓީ ކައުންސިލްގެ އިހުމާލުން ކަމަށް ހައުސިން މިނިސްޓަރ ޑރ. މުއިއްޒު ވިދާޅުވުމުން އެވާހަކަ ކައުންސިލުގެ ފަރާތުން ދޮގުކޮށްފިއެވެ.
އައްޑޫ ސިޓީގެ މޭޔަރ، އަބްދުﷲ ސޯދިޤް، 'އައްޑޫލައިވް' އިން ދެންނެވި ސުވާލަކަށް ޖަވާބު ދެއްވަމުން ވިދާޅުވީ، އީސީސީ ބިނާކުރި ދުވަހުން ފެށިގެން މިހާތަނަށް ވެސް އެ އިމާރާތް ހުރީ ހައުސިން މިނިސްޓްރީގެ ބެލުމުގެ ދަށުގައި ކަމަށެވެ. އެހެން ކަމުން ހައުސިން މިނިސްޓްރީގެ ބެލުމުގެ ދަށުގައި ހުރި އިމާރާތެއް ވީރާނާ ވުމުގައި ކައުންސިލްގެ އިހުމާލަކީ ކޮބައިތޯ ސޯބެ ސުވާލު އުފެއްދެވިއެވެ.
" އީސީސީ ބިނާކުރި ދުވަހުން ފެށިގެން އެތަން އެހެރީ ހައުސިން މިނިސްޓްރީގެ ބެލުމުގެ ދަށުގައި. އެހެން ހުރި ތަނެއް ވީރާނާ ވުމުގައި ކައުންސިލުގެ އިހުމާލެއް އޮންނާނީ ކިހިނެއްތޯ؟"
މިނިސްޓަރަކު މަޖިލީހުގައި އެހާ ބޮޑު އިތުރުފުޅެއް ހެއްދެވުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށާއި އެއީ މަޤާމުން އެބޭފުޅާ އިސްތިއުފާ ދެއްވަން ޖެހޭ ވަރުގެ ކަމެއް ކަމަށް ވެސް ސޯބެ ވިދާޅުވިއެވެ.
ސޯބެ ވިދާޅުވީ، 2011 ވަނަ އަހަރުގެ އޮކްޓޯބަރ މަހުގެ ތެރޭގައި އީސީސީ އައްޑޫ ސިޓީ ކައުންސިލާއި ހަވާލުކުރުމަށް އޭރުގެ ފިނޭންސް މިނިސްޓަރ އެންގެވި ނަމަވެސް، ކައުންސިލާއި އީސީސީ ހަވާލުކޮށްފައި ނުވާ ކަމަށެވެ. އަދި 2012 ވަނަ އަހަރުގެ ތެރޭގައި އީސީސީ ވީރާނާ ވަމުންދާތީ، އެތަން މަރާމާތު ކުރަން ބޭނުން ކަމަށް ބުނެ ހައުސިން މިނިސްޓްރީ އަށް ސިޓީ ފޮނުވުމުން، އީސީސީ މަރާމާތު ކުރުމުގެ މަސައްކަތް ހައުސިން މިނިސްޓްރީގެ ފަރާތުން ކުރާނެ ކަމަށް ބުނެފައިވާ ކަމަށް ވެސް ސޯބެ ވިދާޅުވިއެވެ.
އީސީސީ މަރާމާތުކޮށް އެތަނުގެ ފެންވަރު ރަގަޅު ކުރުމަށް 3.2 މިލިއަން ރުފިޔާ، 2015 ވަނަ އަހަރުގެ ބަޖެޓްގައި ހިމަނާފައިވި ނަމަވެސް މިހާތަނަށް އެތަނުގެ މަރާމާތަށް އެއްވެސް މަސައްކަތެއް ކޮށްފައި ނުވާކަން ފާހަގަކޮށްލެވެއެވެ.