ހައްދުފަހަނަޅާފައިވާ އިސްލާމިކް ސްޓޭޓް (އައިއެސް) ގެ ހަނގުރާމަވެރިން މުވާސަލާތު ކުރުމަށް ޕީއެސް 4 ކޮންސޯލްތައް ބޭނުންކުރާ ކަމަށް ބެލްޖިއަމްގެ ފެޑެރަލް ހޯމް އެފެއާޒް މިނިސްޓަރ ޔާން ޖަމްބޮން ވިދާޅުވެއްޖެއެވެ.
ޔާން ޖަމްބޮން ވިދާޅުވި ކަމަށް ބެލްޖިއަމްގެ ބައެއް މީޑީޔާތަކުން ރިޕޯޓްކޮށްފައިވާ ގޮތުގައި، ޕީއެސް 4 ކޮންސޯލް ބޭނުން ކޮށްގެން ކުރާ މުއާމަލާތައް ޓްރޭސް ކުރުމަކީ ވަރަށް އުނދަގޫ ކަމެއް ކަމަށާއި އެއީ ހަމައެކަނި ބެލްޖިއަމްގެ ޖާސޫސީ އިދާރާތަކަށް އޮތް ގޮންޖެހުމެއް ނޫން ކަމަށެވެ.
މީގެ އިތުރުން ޕީއެސް 4 ކޮންސޯލް ބޭނުންކޮށް ފޮނުވާ މެސެޖްތައް ޓްރެކް ކުރުމަކީ، ވަޓްސްއެޕް އިން ފޮނުވާ މެސެޖްތައް ޓްރެކް ކުރުމަށް ވުރެ މާ އުނދަގޫ ކަމެއް ކަމަށް ވެސް ޖަންބޮން ވަނީ ބުނެފައެވެ.
ޖަންބޮން މިގޮތަށް ވިދާޅުވެފައި ވާއިރު، ފްރާންސްގެ ބައެއް މީޑިޔާތަކުން ވެސް ވަނީ ޕެރިހުގައި ދިން ހަމަލާ އާއި ބެހޭ މައުލޫމާތު ޖާސޫސީ އިދާރާތަކަށް ނޭގުނީ އެ ހަމަލާ ރޭވުމުގައި ހަނގުރާމަވެރިން، ޕީއެސް4 ކޮންސޯލްތައް ބޭނުން ކޮށްފައިވާތީ ކަމަށް ބުނެފައެވެ.