އަންނަ އަހަރަށް ލަފާކުރާ ދައުލަތުގެ ބަޖެޓްގައި ޝަރުއީ ދާއިރާއަށް ކަނޑައަޅާފައިވާ މިންވަރު އިތުރުކުރުމަށް ޕީޕީއެމުން ހުށަހަޅައިފިއެވެ.
ޖުޑީޝަރީއަށް ބަޖެޓް އިތުރުކުރުމަށް އެޕާޓީން ހުށަހެޅީ، ބެޖެޓްގައި ހިމެނުމަށް އެދާއިރާއިން އެދިފައިވާ އަދަދުން 512.08 މިލިޔަން ރުފިޔާ ފިނޭންސް މިނިސްޓްރީން އުނިކޮށްފައިވާތީ، ދަތިތައް ކުރިމަތިވާނެކަމަށް ޖުޑިޝަރީ އިން ބުނުމާއި ގުޅިގެންނެވެ. އަންނަ އަހަރަށް ލަފާކުރާ ދައުލަތުގެ ބަޖެޓްގައި 973 މިލިޔަން ރުފިޔާ ހިމަނައި ދިނުމަށް ޖުޑީޝަލް އެޑްމިނިސްޓްރޭޝަނުން އެދުން ނަމަވެސް ފިނޭންސް މިނިސްޓްރީން ބަޖެޓް ކޮށްދީފައިވަނީ 461 މިލިޔަން ރުފިޔާއެވެ.
މިހާރު ބަޖެޓްކޮށްފައިވާ 461 މިލިޔަން ރުފިޔާއިން ޖުޑީޝަރީ ނުހިންގޭނެކަމަށް ބުނެފައިވާއިރު، އެދާއިރާއަށް ބަޖެޓް އިތުރުކުރުމަށް ހުށަހެޅުއްވީ ވިލިފުށީ ދާއިރާގެ މެމްބަރު ރިޔާޒު ރަޝީދުއެވެ. ޕީޕީއެމުން ހުށަހެޅި އެހުށަހެޅުމަށް ތާއީދުކުރެއްވީ ޖުމްހޫރީ ޕާޓީގެ ލީޑަރު ގާސިމް އިބްރާހިމްއެވެ. ނަމަވެސް ބަޖެޓު އިތުރުކުރާނެ އަދަދަކާއިމެދު އިއްޔެގެ ބައްދަލުވުމުގައި އެއްބަސްވުމަކަށް ނާދެވުނެވެ.
ބަޖެޓް ކޮމިޓީގައި ދައުލަތުގެ މިނިވަން މުއައްސަސާތަކުގެ ބަޖެޓްތައް ދިރާސާކުރަމުންދާއިރު، 18 މުއައްސަސާއެއްގެ ތެރެއިން 13 މުއައްސަސާއަކުން ބުނެފައިވަނީ އެދިފައިވާ މިންވަރަށް ބެޖެޓް ލިބިފައިނުވާތީ ދަތިތައް ކުރިމަތިވާނެކަމަށެވެ.