ދުނިޔޭގެ އެންމެ ކާމިޔާބު ޓީމު ތަކުގެ ތެރެއިން ސްޕެއިން ގެ ބާސެލޯނާ އަދި ރިއަލް މެޑްރިޑް ބައްދަލު ކުރާ މެޗު، 'އެލް ކްލެސިކޯ' މާދަމާ ކުޅޭ އިރު ދެ ޓީމުގެ ސަޕޯޓަރުންވެސް ކުރަމުންދާ ސުވާލަކީ ދުނިޔޭގެ މޮޅު ކުޅުންތެރިޔާގެ މަގާމު 4 ފަހަރު ހޯދައިފައިވާ ބާސާގެ ވައިސް ކެޕްޓަން ލިއޮނަލް މެސީ އަށް މި މެޗުގައި ފެނިގެންދާނެތޯއެވެ؟
މިދިޔަ މަހުގައި މެސީ ކުޅުމާ ދުރަށް ދާން ޖެހުނީ ފައިގެ ލިގަމެންޓަކަށް ލިބުނު އިންޖަރީ އަކާ ގުޅިގެންނެވެ. މި އަނިޔާ އަށް ފަހު ހަ ހަފްތާ ވަންދެން ކުޅުމާއި ދުރުގައި ހުންނަން ޖެހޭނެ ކަމަށް ޑޮކްޓަރުން ވަނީ އަންގާފައެވެ.
ނަމަވެސް ހީކުރި ވަރަށް ވުރެ އަވަހަށް މެސީ ފިޓްވެ 'އެލް ކްލެސިކޯ' ގައި ކުޅެވިދާނެ ކަމަށް ޑޮކްޓަރުންގެ ޓީމުން ބުނެފައި އޮއްވައި އެއީ ވަރަށް ބޮޑު ރިސްކެއް ކަމަށާއި އެކަން ނުކުރުމަށް ޓީމަށް ނަސޭހަތްތެރިވެފައި ވާ ކަމަށް ޚަބަރު ލިބިފައި ވެއެވެ.
މިކަމާ ގުޅިގެން ބާސެލޯނާ އިން އަދި އެއްވެސް އެއްޗެއް މީޑިއާ އާ ހިއްސާ ކޮށްފައި ނުވެއެވެ.
ކޮންމެއަކަސް ބާސާ ސަޕޯޓަރުންނަށް މެސީ ކުޅުމާާ ބައިވެރި ވެއްޖެނަމަ އިތުރު ހިއްވަރެއް ލިބޭނެއެވެ. ރިއަލް ގެ ދަނޑުގައި މި މެޗު އޮތް ނަމަވެސް ރިއަލް ސަޕޯޓަރުންނަށް މެސީ މެޗުގައި ބައިވެރި ވުމަކީ އެހާ ހިތްހަމަ ޖެހޭނެ ކަމެއް ނޫނެވެ.
މާދަމާ ރޭ ރާއްޖެ ގަޑިން 10:15ގައި ކުޅޭ މިމެޗު ބެލުމަށް މިހާރު ވެސް ގިނަ ބަޔަކު ތިބީ ކެތް މަދު ވެފައެވެ.